7
No Marahet a Kaparin no Israel
1 Āngwa kapakasyāsi ko!
Akma akos tawowaw a mangdīdid do namoysan do rayon,
kan akma akos mangdīdidaw do kaobāsan.
Abaw mawngawngay a ōbas a makan,
mana manoma a maynoy a asin igos a oyod kos pakakdekden.
2 Nabo dana saw mapodno do tanaya.
Apabaw aran asa malinteg a tawo a natokos.
Tabo tawo, ki mangsaneb a mangdiman.
Kāda asa, ki otapan naw aran kakteh na.
3 Masisiglat tanoro da a mamarin so marahet.
Siraw opisyal kan siraw hwis, ki mangdaw sa so pasoksok.
Siraw mabibīlegaw, ki ipapāti daw chakey daw,
kan kasan daw mangipangta so marahet.
4 Iyaw kagaganayanaw dyira, ki akmay mohamoha a manōlok.
Iyaw kalilinteganaw dyira, ki akmay kemekemmeng.
Īto danaw araw a kadōsa no Dyos dyirad tawotawo
a akmas inpadto daw no magbanbantay saw a siraw propīta.
Changori, maychaychawaw dana sa tabo.
5 Magtalek kaba do karoba mo,
mana masaray kaba do sīt mo.
Aran si baket mo a kaoknod mo,
annadan mo ichirin mo.
6 Anyiben paba no anak a mahakay āmang na.
Kontraen dana no anak a mabakes ānang na.
As pachidimanan no manōgang a mabakes iyaw katogāngan na mabakes.
Siraw kabōsor no asa tawo, ki sira met lang mimbro no mismo na pamilya.
7 Ki an yaken, ahahayen ko si ĀPO.
Nanayahen ko Dyos a mangisalākan ko.
Adngeyen nanchi yaken Dyos ko.
No Kaiyangay ni ĀPO so Kaisalākan
8 Chamimyeng nyo aba yaken, inyo a kabōsor ko!
Aran nalba ako, ki mirwa konchi a maybangon.
Aran myan ako a maydisna do kasaryan,
si ĀPO anchiw soho ko.
9 Maynamot ta naygatos ako dya, ibtoran ko soli ni ĀPO,
manda do kapaysonong na so kāso ko,
kan kaitoroh na so kalintegan ko.
Ihtot nanchi yaken do sēdang,
kan maboya konchiw kinalinteg na.
10 Do dāwri, maboya danchi no kabōsor ko
a siraw nangoyawaw dyaken a nangibahey sya a kon da,
“Dino yanan ĀPO a Dyos mo?”
Ki sichangori, panyibaya danchiw kasnek da.
Maboya konchiw kasday da no kabōsor ko
a matokatokapan a akmay hota do kalkalsāda.
11 Tawotawo no Jerosalem, īto danaw araw* 7:11 Amos 9:1; Sak. 12:6 a kapangbangon nyo a mirwa so ahad no syodad nyo.
Do dāwrinchi a araw, mayparahawa anchiw sākop nyo.
12 Do dāwri a araw, mangay sanchiw tawotawo dyinyo
yapo do Assirya manda do Egipto,
yapo do Egipto manda do Oksong a Oprates,
kan yapo do tabo loglogar mangrogi do tāw
a manda do tōtok no tokon.
13 Ki mayparin anchi a let-ang iyaw kadwan a tana† 7:13 Do chirin Hebreo, ki “tanaya”.
maynamot do karahet dan tawotawo a omyan daw.
No Kāsi ni ĀPO so Israel
14 Onongan a pastoran mo pa saw tawotawo mo, mo ĀPO
a siraw arban a dyira mo a ipatāwid mo.
Aran maychatanyi sa do kahasan do hobok no Tokon a Karmel,
ki pagarāben mo sa do magla a pagarāban
do Basan kan do Gilead a akma do kaychowa.
15 Bata ni ĀPO a kāna, “Akmas araw saw a nakahtot nyo do Egipto,
ipaboya konchi dyinyo makaskasdāaw saw a kaparin ko.”
16 Maboya danchi no nasnasyon nya saya,
kan tod anchi a makasnesnek bīleg da.
Do kaōpay da, bengbengen danchi so tanoro daw dangoy da,
kan akma sanchiw bitor.
17 Magōyas sanchi do kahbekan a akmay boday,
kan akma sa so komayakayabaw do tana.
Maychahohtot sanchi do tinaywan daw a maychamirpir,
kan iditen da a chananawa si ĀPO a Dyos namen.
18 Sino Dyos a akma dyimo a mamakawan so nakagatos,
kan mangwayak so karahet dan tawotawo mo a nakalāsat?
Nāw mo saba isoli a magnanayon,
basbāli a chasoyot mo a ipaboyaw kāsi mo.
19 Ipadidiw monchi dyamen a mirwaw kāsi mo,
kan tokatokapan monchiw gatogatos namen,
kan itapwak monchi do kensad no tāw.
20 Ipaboya monchiw kapodno mo di Jakob,
kan dya mabdibdis a adaw mo di Abraham
a akmas insapata mwaw dyirad aāmang namen saw
yapo do kaychowa pa.