1 Inyo a kamotdehan, maiparebbeng dyinyo a yapo di Āpo a anohdan nyo saw inyapwan nyo, ta nawriw malinteg kan kosto a parinen nyo a manganohed di Āpo. 2 Ta inpaitolas ni Āpo Dyos do Masantwanaw a Tolas a kāna, “Dayāwen mo si āmang mo kan si ānang mo.” Iyaw nyaya a bilin, ki iyaw nyaw nanoma a napawnotan so kari. 3 As no karyaya, ki iyaw nya: “Tongpalen mo sa tan matorohan kas bindisyon a iyaw maganay kan manaro a kabyay mo do tanaya.”* 6:3 Eks. 20:12; Deot. 5:16

4 Ki inyo a inyapwan, ki pasolyen nyo sabaw kamotdehan nyo, basbāli a siaannad kamo a mangnanawo dyira a maybibyay a asa manganohed a managtongpal do chirinaw ni Āpo.

5 As inyo a adīpen, anohdan nyo saw āmo nyo saw do tanaya, as kan ipaboya nyo kapasnek nyo a mapawnotan so anyib kan dāyaw. On, tongpalen nyo bilbilin da saw a abo kapaginsisingpet a akmay si Kristo pagsīrbyan nyo. 6 Nawri aba lang kapaytarabāko nyo so pakahwahokan da an chichiban daynyo, basbāli a ipasnek nyo kapaytarabāko nyo dyira a maynamot ta naibidang kamo na a adīpen ni Kristo, as kan maynamot ta mamarin kamo so pagayatan no Dyos a yapo do makatayrahem a kapangtokto nyo. 7 On, parinen nyo a siraragsak tarabāko nyo saw a akmay si Kristo pagsirsirbyan nyo kan tawo aba. 8 Ta kanakmen nyo pakono nyaya: Iyaw Āpo taya, ki gon-gonaan naw katakatayisa a aran adīpen mana siwayawaya sigon do maganay saw a pinarin na.

9 As inyo a āmo, parinen nyo pakono maganay dyirad adīpen nyo saya, as kan aryan nyo na sa amomohen. Ta kanakmen nyo a inyo kan siraw magsirsīrbi saya dyinyo, ki asaw Āpo a atbayen nyo do hanyit, as kan abaw itatārek na.† 6:9 Ara. 10:34; Roma 2:11; 1 Ped. 1:17

10 Kapanawdyan na, do tābo kabibyay nyo, ki nāw nyo pakono a tēnekan mabīlegaya a panakabalin ni Āpo Jesos tan maypaypahnyi kamo do kapanganohed nyo dya. 11 Osaren nyo a tabo sarāpa a intoroh dyinyo no Dyos tan maparin nyo maytēnek a machikontra do tabo pangasdok ni Satanas. 12 Ta nawri sabaw kalāban taw kapayngay ta saya a myan so inawan kan raya, an dya siraw marahet saya ispirito a mangitoray mana siraw myanaw so panakabalin. On, kontraen ta saw āpohen saw no anyito do lōbongaya mana do kademdemanaya a siraw mangitoray saya siras tawotawo saya a myan pa do kasarisaryan.‡ 6:12 Roma 8:38; Epe. 1:21 13 Dawa, nya pakono paynamotan na a osaren nyo komplito a sarāpa a intoroh dyinyo ni Āpo Dyos tan maparin nyo do aran āngo a ōras maytēnek a nāw nyo a somalap do marahet saya a kabōsor ta. As an tayoka danaw kapachilaban nyo, ki myan kam pa sitetēnek.

14 Dawa, sisasagāna kamo pakono. Nawri pakono pirmi a ibahey kan iktokto nyo oyod, ta nawriw akmay pinakasintorong nyo.§ 6:14 Iyaw sintorong no soldādo a Romano, ki masīrbi dyira a pamadpet so kayomkomen daw a imara da tan dya mangbalat do kapachigobat da. Sigon do inyarig ni Pablo, no oyod, ki iya pakono mapadpedpet dyaten. Eks. 12:11; Isa. 11:5; Jer. 13:1-11 As pirmi kamo pakono a mamarin so kosto, ta iyaw nyaya kinalinteg, ki pinakasarāpa no barōkong nyo. 15 As iyaw pinakasapatos nyo, ki iyaw kasisasagāna nyo pakono a mangay a mangikasaba so Maganay a Dāmag a maynamot do kapaychapya no Dyos kan tawo.* 6:15 Isa. 52:7 16 Nāw nyo pakono a mangig-igpet so kapanganohed nyo a pinakasarāpa nyo tan masarāpa nyo saw omapoy saya a pana ni Satanas a ipana na dyinyo. 17 As iyaw pinakatabahos nyo, ki iyaw kanāw nyo pakono a mangiktokto so maynamot do kaisalākan nyo di Kristo.† 6:17 No tabahos dan soldādo no Romano, ki naparin do matokpoh a lālat mana pasek. 1 Tes. 5:8 As iyaw chirinaya ni Āpo Dyos a ipanakenakem na dyinyo no Ispirito Santo, ki iya dana pakono pinakaispāda nyo.‡ 6:17 Heb. 4:12 18 Do kaosar nyo siras nya, ki nāw nyo pakono a maydaydasal a mangdakdaw do Dyos so kasidong na dyinyo sigon do kainanawowaw dyinyo no Ispirito Santo. On, makaridam kamo pakono a maydaydasal do aran āngo a kayayan nyo, as kan pirmi nyo sa pangdakdaw tawotawo saw no Dyos.§ 6:18 Roma 12:12; Pilp. 4:6; Kol. 4:2; 1 Tim. 2:1 19 Ki aran yaken, paydaydasal nyo pa yaken ah! On, mangdakdaw kamo pakono do Dyos tan itoroh na dyaken kosto a chirin kan katored ko a mangibahebahey so maynamot do nailimedaya do Maganayaya a Dāmag. 20 Ta maynamot do dyaya a dāmag, ki tinoboy na yaken ni Kristo tan yaken danaw pinakadangoy na, kan nya paw naynamotan kwaya a myan a naposasan do bahodanaya. Dawa, paydaydasal nyo pa yaken tan pirmi ako a matored a mangipakatoneng so maynamot di Kristo, ta nawriw maiparbeng a parinen ko.

21 Ki tan matonngan nyo a maynamot do kayayan kwaya dya kan iyaw napariparin saya dyaken, ki si Tikiko* 6:21 Ara. 20:4; 2 Tim. 4:12 anchiw makatoneng a mangilawlawag dyinyo. Ta an maynamot dya, ki asa mapateg a kakteh do kapanganohed kan asa matalek a tobotoboyen no Dyos. 22 On, nyayaw paynamotan na a tinoboy ko dyinyo tan mapatakan nyo kayayan namenaya dya kan tan ahwahoken naynyo tan dyi nyo na yamen a chabakel.

23 Kakakteh ko di Kristo, si Āpo Dyos a Āmang ta kan si Āpo Jeso-Kristo manoroh pakono dyinyo so kapya kan adaw do katakatayisa dyinyo a maynamot do kapanganohed nyowaya dya. 24 Myan pakono parābor no Dyos dyirad tabo a dya machipandas kadaw di Āpo ta a si Jeso-Kristo.