No Somarono A Tolas Ni Juan
No Pakatonngan so Paytābwan no Nya Tolas
Nya tolas, ki yapo di Juan a mangay do asaw a mabakes a napidi no Dyos kan siraw anak naw. Siraw nagadal so Biblya, batahen da a siraw nyaya a may-ānang, ki sīt sa ni Juan a mismo. Dawa, intolas na dyira tan maypayit kapanganohed da. No naibahey dan kadwan, ki no chakey na batahen ni Juan do tolas naya, ki iyaw iglisya, ki kayarig no asa ānang, as kan siraw mimbros saw, ki kayarig na saw anak naw. No chakey na batahen nyaya, ki para dyaten a tabo a manganohed nyaya tolas ni Juan.
Do dyaya manyid a tolas ni Juan, inbahey na a masisīta a maysin-aadaw saw manganohed, ta nawriw bilin no Dyos. Binallaāgan na sa a maynamot dyirad mangallīlaw saw a mangnanawo so bayataw. Intolas na dyira a kāna, “Inpanakem ko nyaya dyinyo a maynamot ta naychawpit danad lōbongayaw āro sa mangallīlaw so tawotawo. Sigon do kapangnanawo da, ki nayparin aba tawo si Jeso-Kristo do nakangay na do lōbongaya. No aran sino a mangnanawo so komwan, ki iyaw mangal-allīlaw kan mabata a antikristo a kabōsor no Dyos.” (2 Jn. 7)
No Naychakarwan no Nya Tolas
Pakatoneng 1-3
No oyod kan adaw 4-11
No kapanawdyan na 12-13
2 Juan
1
Pakatoneng
1 Dyimo a madāyaw a asa ānang:
Yaken si Juan a asa panglakayen dan manganohed. Nyaw tolas ko dyimo a napidi no Dyos kontodo siraw anak mo saw, as kan oyod a chadaw koynyo do kapanganohed taya. Maychatanyi akwaba a madaw dyinyo, an dya sira tabo makapatakaw so oyod a maynamot di Jesos. 2 On, chadaw namen inyo, ta naimoha dana do aktokto taw oyodaya, as kan nāw narana dyaten a abos pandan.
3 Myan pakono parabor, kāsi, kan kaydamnayan no kapangtokto a maitoroh dyaten a yapo do Dyos a Āmang ta kan si Jeso-Kristo a Anak na. On, marawat ta pakono saw nya a maynamot do katongtong ta do oyod kan kapaysin-aadaw.* 3 1 Jn. 1:8; 4:8, 16
No Oyod kan Adaw
4 Ay so kasoyot ko a nakapatak sya a siraw kadwan do anak mo, ki maybibyay sa do oyod a nanawo a akmas inbilinaw ni Āmang ta a Dyos dyaten! 5 Dawa, myan ibahey ko dyinyo a may-aānang: Machita taw maysin-aadaw. Bayo aba bilin itolas kwaya dyinyo, an dya iyaw bilinaw a myan dyinyo do dāmo nyo a nanganohed. 6 Nyaw kapatakan ta sya a oyod a chadaw taw Dyos an maybibyay ta a machitōnos dyirad bilbilin na saw dyaten. Ta no bilin na, ki nadngey nyo a tabo do kadāmo nyo paw a nanganohed a masisīta a maysin-aadaw ta.
7 Inpanakem ko nyaya dyinyo a maynamot ta naychawpit danad lōbongayaw āro sa mangallīlaw so tawotawo. † 7 1 Jn. 2:26; 3:7 Sigon do kapangnanawo da, ki nayparin aba tawo si Jeso-Kristo do nakangay na do lōbongaya. No aran sino a mangnanawo so komwan, ki iyaw mangal-allīlaw kan mabata a antikristo a kabōsor no Dyos.‡ 7 1 Jn. 4:3
8 Dawa, magannad kamo, ta āngonchan mabo nyo saw nayhohopagan nyowaw. On, magannad kamo tan rawaten nyo tabo a insagāna no Dyos a gon-gona nyo.
9 Ta no aran sino a dya manongtong so nanawo ni Kristo, as basbāli a anawban na, syimpri, aba dyaw Dyos. Ki no manongtong so nanawo ni Kristo, machasa dyaw Dyos Āma kan si Kristo a Anak na. 10 Dawa, an myan aran sino a mangay a mangnanawo dyinyo so machitarek do nyaya nanawo, rawaten nyo aba do bahay nyo mana padayāwan nyo aba. 11 Ta no mangpadāyaw sya, ki mairāman do marahetaw a kaparin na.
No Kapanawdyan a Pakatoneng
12 Āro payaw chakey ko a ibahey dyinyo, ki itolas kwaba sichangori do nyaya a tolas, basbāli a hahawen ko omsarongkar dyinyo tan makapagsasarīta tanchi do rōpanrōpa tan maypataywaraw kasoyot ta.
13 Pakomostaan daw inyo no anak sayan kakteh mwaya a mabakes a napidi no Dyos a akma dyimo.