1 Nonta eg pay laeng epalsowa iya dobong, ẃara ngo eshan i kadẃa nen Apo Shiyos, jet sotan na kadẃa toy engipa‐amta alid ja dobong ni maypangkep son Apo Shiyos. Jet si‐kato met laeng si Apo Shiyos. 2 Sigod sotan ja ẃara ngo eshan son Apo Shiyos. 3 Jet si‐katoy kabol la edaga‐an ni emin na angken nganto. No enshi sotan, enshi ngoy epalsowen angken nganto. 4 Si‐katoy engi‐kan ni biyag jet sota biyag ja in‐akan to, si‐katoy dimawag so ni nemnem ni totoo. 5 Emansidew sotan shi embolinget, jet sota embolinget, eg to mebedin na ebaken sota silew.

6 Si Apo Shiyos, ẃaray inbetkag ton too ja si Juan i ngaran to. 7 Sajay ya too, si‐katoy inbetkag nen Apo Shiyos ja en mengikowan so ni totoo maypangkep nonta ondaw alin toon may‐eshig ey emansidew shi embolinget ja ondawag ni nemnem ni totoo, say emin na mengitneng ni kowan nen Juan, memati ira nonta toon ondaw ali. 8 Si Juan, si‐katoy en engikowan bengat ni maypangkep nonta ondaw alin ondawag ni nemnem ni totoo; aliẃen si‐kato sotan na ondaw ali.

9 Sajay ya dimaw alid ja dobong, si‐katoy podnon kaondawag ni nemnem ni emin na totoo. 10 Si‐katoy kabol la epalsowa‐an ni dobong, nem idi dimaw ali, eg binigbig ni tood ja dobong ey si‐kato sotan. 11 Dimaw pay shi mismon ili to, nem sota kaidiyan tod man, eg sha ineẃat. 12 Nem sota emin na too ja engawat son si‐kato, ono emati son si‐kato, inkowan to ey nebeng shen maybidang ey annak ma nen Apo Shiyos. 13 Say itsora ni kaybidangan ni totoo ey annak nen Apo Shiyos ket kabol nonta panakabalin nen Apo Shiyos; aliẃen inges toy itsora ni kay‐enak ni too so ni maka‐anak so, tep say too, ẃaray nemnem sha ey man‐enak koma ira, tan sakey pay, shaka i‐onod i dekna ni bakdang sha; isonga sotan i kabol la kay‐enaki ni too.

14 Sotan na sigod ja ẃara son Apo Shiyos, ja engipa‐amta ali ni maypangkep son Apo Shiyos, nanbalin ni too, jet eki‐iyan son si‐katejon too. Inon‐an min mismoy kina‐Shiyos to — sota kina‐Shiyos ja in‐akan nen Ameto ta si‐kato bengat i Anak to. Emin na inon‐an min dingka to, ma‐sas ni olay ey ebadeg i semek to tan podnon emin i kowan to. 15 Si‐kato sota torong nonta kowan nen Juan nonta inkeljaw to ey, “Sajay sota inkowan ko ey ondaw ali ja maysa‐dat son si‐kak. Sajay, engatngatoy saad to ey say si‐kak tep sigod ja ẃara ngo eshan iyay nonta ekak pay laeng nay‐anak.” Sotan i inpaneknek nen Juan. 16 Saja dimaw ali son si‐katejo, ebadeg ga pasiyay semek to, jet engi‐kan ni nansigshan tayon emin. 17 Siya, si‐kato si Jesucristo et inpawasha toy semek shiya dobong. Jet si Moises ngo nonta bayag da, inpawasha to sota sigod ja bilin nen Apo Shiyos, nem si Jesucristo i engitosho ni podnon olog nontan na bilin. 18 Angken sipa, enshiy en engasas son Apo Shiyos, nem eg sota sesakey bengat ja Anak to. Sajay ya Anak to pay i engipa‐amta ni maypangkep son Apo Shiyos ja Ameto.

19 Sota ira pangolo ni Hodiyos shi Jerusalem, engibetkag ira ni papashi tan sota ira kaontolong so nonta papashi, ja en mengiro‐pet son Juan nem ngarantoy koston saad to. 20 Jet inkowan nen Juan i agpayso son si‐kara, ja kowan to ey, “Aliẃen si‐kak sota naypadto nonta bayag da ey ibetkag ali nen Apo Shiyos ja mengisedakan.”

21 Insho‐petan sha pay ja kowan sha ey, “Jet sipa ka ngarod? Si‐kam sota naypadton ondaw ali ja maykadẃen idaw ali nen Elias?”

Say songbat nen Juan, “Enshi, aliẃen si‐kak.”

Jet kowan sha mowan son si‐kato ey, “No kasta, si‐kam ali sota para padton tayoka sesseskeren ibetkag ali nen Apo Shiyos?”

Simongbat si Juan ja kowan to mowan ey, “Aliẃen si‐kak.”

22 Jet inbag‐an sha mowan ja kowan sha ey, “Ikowan mo ga no sipa ka, say ẃaray ikowan mi so nonta ira engibetkag son si‐kami. Jet sipa ka ngarod?”

23 Si Juan, simongbat ja kowan to ey, “Si‐kak i kaytoshongan nonta padto nen Isaias nonta bayag da ja kowan to ey ẃara aliy toon ikeljaw toy esel to shima dogad ja nay‐araẃi shi ili, ja kowan to ey, ‘Pandeteg joy shalan na pan‐akshan nen Apo!’ ”

24 Jet sajay iren inbetkag ni Parisiyo, 25 kowan sha pay so nen Juan ey, “Apay ngarod nga kaka memonjag, no aliẃen si‐kam sota naypadton ibetkag ali nen Apo Shiyos, ono sota mengibengon son Elias, ono sota para padton tayoka sesseskera ja ondaw ali?”

26 Jet si Juan, simongbat son si‐kara ja kowan to ey, “Shanom i naka osala ni naka pemonjag so ni totoo, nem ẃara son si‐kayoy naydaok ja eg jo amta, 27 jet si‐kato aliy maysa‐dat son si‐kak. Ebadbadeg i panakabalin to ey say si‐kak, jet ekak pay maykeshi ja angken baga‐en to komen mengokas ni kalot ni sapatos to.”

28 Emin iyay, edaga shi Bitania, ja baliw nonta pa‐dok ja kowan sha ey Jordan, ja emonjagan nen Juan.

29 Idi nonta eẃa‐ẃa, si Juan, inon‐an tos Jesus ja emandaw son si‐kato, jet kowan to ey, “Sajay sota mengikesho ni basol ni totood dobong ni ketey to di. Si‐katoy may‐eshig ey singa kalniron in‐akan nen Apo Shiyos ja maydeton. 30 Sajay sota inkowan ko son si‐kayo ey ondaw ali, ja maysa‐dat son si‐kak. Sajay, engatngato i saad to ey say si‐kak, ta sigod ja ẃara ngo eshan nonta ekak pay laeng nay‐anak. 31 Jet angken si‐kak, istay ya ekak amta no sipay toshongen nonta naypadto nonta bayag da ey ondaw ali, nem say kawashak niman shiyay ja emengosal ni shanom ni naka pemonjag ket say amta‐an ni tood Israel nem sipa sota naypadton ondaw ali. 32 Jet amtak ma tep inon‐an koy Ispirito Santo nen Apo Shiyos alid dangit ja emandespag ja singa inges toy itsora ni kalopati. Simepa et imonong son si‐kato. 33 Istay ekak pay laeng amta ey si‐kato sota kaytoshongan nonta padto, nem si Apo Shiyos, ja engibetkag son si‐kak ja memonjag ja shanom i osalen ko, inkowan to pay ey sota asen ko ja despagan ni Ispirito Santo to ja pan‐iyanan to, si‐kato sotan na too ja say pemonjag to di ket Ispirito Santo. 34 Jet sajay ya naka pan‐ikowan na inon‐an ko, sajay sota Anak nen Apo Shiyos.” Kowan nen Juan.

35 Idi eẃa‐ẃa mowan, kadẃa nen Juan sota showen too to. 36 Inon‐an tos Jesus ja eman‐ekad, jet kowan nen Juan ey, “Sajay sota may‐eshig ey kalniron in‐akan nen Apo Shiyos ja maydeton.”

37 Jet sota showen too nen Juan, intenengan sha iya inkowan nen Juan jet imonod ira so nen Jesus.

38 Si Jesus, ẃiningi to ira ja eman‐onod ali son si‐kato, jet kowan to ey, “Ngarantoy ibaga jo?”

Jet kowan sha son si‐kato ey, “Maistoro, toway moka pan‐iyani?”

39 Si Jesus, kowan to ey, “Kalejo say jo asen.”

Ekidaw ira son Jesus jet inon‐an sha i toka pan‐iyani. Jet nontan na akew, sota ira showen too, eki‐iyan ira nin son Jesus, ta mama‐shem mala ja oras ni alas kowatro. 40 Say sakey so nonta engitneng ni inkowan nen Juan pangkep so nen Jesus, si Andres ja agi nen Simon Pedro.

41 Si Andres, dimaw wa shagos, ja to simbi si Simon ja agi to, jet kowan to son si‐kato ey, “Simbi mi sota tayoka sesseskeshen ibetkag ali nen Apo Shiyos!” (Say piyan ton a‐seden, simbira sota naypadton ibetkag nen Apo Shiyos ja mengisedakan.)

42 Si Andres, inodop to si Simon ja dimaw ira son Jesus, jet si Jesus, inningning tos Simon jet kowan to son si‐kato ey, “Si‐kam si Simon ja anak nen Juan. Jet say ingaran ko ma son si‐kam niman, si Cipas, ono Pedro.” (Nan‐inges i olog niya showen inngaran to son Simon, ja say piyan ton a‐seden, bato.)

43-44 Idi eẃa‐ẃa mowan, si Jesus, ninemnem ton ondaw shi Galilia, jet simbi to si Felipe shiman ja kaidiyan nen Andres nen Pedro ja i‐Bitsaida. Kowan nen Jesus son Felipe ey, “Kala, kay‐olop ka son si‐kak say manbedin ka men took.”

45 Jet si Felipe, simbi tos Natanael, jet inkowan nen Felipe son si‐kato ey, “Wara ma niman sota inpadto nen Moises ja insolat tod dinteg tan insolat nonta ira para padto. Jet inaspol mi! Say ngaran to, Jesus. Si‐kato ket i‐Nasarit ja potot nen Jose.”

46 Jet si Natanael, simongbat ja kowan to ey, “Apay ẃara ayay mapteng nga mandepod Nasarit?”

Jet kowan ngo nen Felipe ey, “Eti, mo asas.”

47 Jet si Jesus inon‐an to alis Natanael, ja emandaw son si‐kato, jet kowan to ey, “Iyay ali i podnon i‐Israel. Emin na ẃara son si‐kato, agpayso.”

48 Jet si Natanael, inbag‐an tos Jesus ja kowan to ey, “Ita et mangon amtamak?”

Si Jesus, simongbat ja kowan to ey, “Nonta ẃara ka pay laeng ja nansirom shi kadasan, ja eg toka pay laeng inodop nen Felipe, inon‐an taka.”

49 Jet si Natanael, simongbat ja kowan to ey, “Maistoro, amtak ma ey si‐kam sota Anak nen Apo Shiyos! Si‐kam i Ari ni tood Israel!”

50 Jet si Jesus, simongbat ja kowan to ey, “Kaka memati ta inkowan ko ey inon‐an taka ja nansirom shi kadasan. Jet mas ẃara pay i asen mo ali ja kaskasshaaw ey say sajay. 51 Kinapodpodno to iya ikowan ko son si‐kam. Asen jo i dangit ja medo‐katan, jet asen jon ẃaray anghil nen Apo Shiyos ja ondespag ali son si‐kak jet on‐oli mowan shi dangit, ta si‐kak sota kowan sha ey Anak ni Too.”