30
Anduane Homogohondo ka̱i̱ lalu bi lenego ogo
1 Anduane Homogo-o í̠na i̱ waitigi hearume i̱ bo hengedalu turu nahelo
i̱ pele ngialu haru dai birigonaga
i̱na turu timbuniore howa
í̠naga mini yaraga halu kogoni.
2 Anduane Homogo-o í̠ i̱naga Ngode Datagaliwabeore kegonigo✡ Iba 6.2, 88.13, 103.3
i̱na í̠hondo biamogo bia lalu olarugola hale hari.
Hale howa í̠na i̱ biamogo bialu mo dabi ho helarigo ko.
3 Anduane Homogo-o i̱ homene ale hewaria✡ Iba 28.1, 86.13
í̠na i̱ lone mo heya harigoni.
I̱ homene dininiru pu hagaha hewaria
í̠na i̱ha holene karula halu ngia dai birigoni.
4 Anduane Homogonaga wali agali mini bilinaheore kamiru-o✡ Har 3.15, Iba 135.13, 149.1
tígua ibu mini yaraga halu iba gana lalu hadaba.
Mbirali mini Baya Buruguleore kago
ibunime tíhondo mbirale bigi biyarunaga mitangi bialu
ibunihondo ka̱i̱ lalu hadaba.
5 Ibugua keba tigimandi hangu ho haga kagoyu✡ Iba 103.9, Ais 26.20, 2 Ko 4.17
ina dindini kamangi ina mitangitangi bialu
biamogo biaabo haga kagoni.
Mbiraga de iba ibalu palu heyalu
horo mendengi turu ha aribia holebira.
6 I̱ni hangu mitangi bialu lalu,✡ Yob 29.18, Iba 10.6, 62.2, 62.6
I̱ karulapeore kogo i̱naga waitigi karume
i̱ mo para nahabehe ko, laru.
7 Anduane Homogo-o í̠na i̱hondo bayale bialu haabo kegoni.
Í̠na anda hongohe hari neneni hagagobi howa
i̱ helarigo kogoni.
Ani birigoyu i̱ helalu pialu í̠ ha do harigola
i̱ha gi holene timbunime bo hengeda dambi haga biya.
8 I̱na Anduane Homogo í̠ olarugoni.
I̱ dara howa biamogo bia, hongo howa lalu harugoni.
9 I̱ homaruyagua nde
i̱ha howa bayale mbira agi tagira ibulubadabe.
I̱ homaliha piruyagua nde
bayale agi bia tagi holobadabe.
Homenerume í̠naga mini yaraga holobadabe.
Í̠na bayale biaabo haga kegonaga
tigua latagi agua holobadabe.
10 Anduane Homogo-o í̠na i̱naga bi larogo hale howa dara habe.
Anduane Homogo-o í̠na i̱ biamogo bibe laro.
11 Í̠na i̱ha genda wiwaru bibahende mo wahai harigola✡ Aga 3.4, Ais 20.2, Yar 31.13
turu howa mali lulene wia aribia helarigoni.
Abale i̱ mbirali homaragola daraho hagagobi hewaria
í̠na i̱ha dara holene uruni mo wahai halu
i̱naga bu miniha turu holene mo wia aribia helarigoni.
12 Ainde i̱na í̠hondo bi nale holebero ndo
i̱na í̠naga mini yaraga halu iba ganaru lalu holebero.
Anduane Homogo-o í̠ i̱naga Ngode Datagaliwabeore kegonaga
i̱na í̠hondo ka̱i̱ lalu haabo holebero.