1 Lau inai Paulo, lau be Keriso Iesu ena aposetolo tauna Dirava ena ura dainai. Lau bona iseda varavara tauna Timoteo ruaosi ese inai revareva ai torea inai, Dirava ena ekalesia Korinto dekenai, bona Akaia tano ibounai lalonai Keristani taudia, umui emui.

2 Lau ura Dirava iseda Tamana bona Lohiabada Iesu Keriso ese bogahisihisi bona maino umui dekenai do idia henia.

3 Dirava, iseda Lohiabada Iesu Keriso ena Tamana ita hanamoa. Ia be iseda Tamana, bona bogahisihisi bona durua ibounai ia henia Diravana. 4 Aiemai hisihisi ibounai lalonai ia ese ai ia durua noho. Unai dainai hisihisi idia abia noho taudia be ai ese ai durua diba. Dirava ese ai dekenai ia henia durua, be ai ese ma ai henia noho idia dekenai. 5 Badina be Keriso danu hisihisi ita abia ena bada hegeregerena, Dirava ena durua ita abia danu ia bada, Keriso dainai. 6 Bema hisihisi ai davaria neganai, inai be umui do ai durua, bona mauri do umui abia totona. Bona bema Dirava ese ai ia durua neganai, inai be ai ese umui do ai durua totona. Bema metau bona hisihisi lalonai umui gini goada, ai ese ai gini goada hegeregerena, Dirava ese umui do ia durua. 7 Unai dainai ai daradara lasi, to ai diba momokani aiemai hisihisi hegeregerena umui abia bamona, Dirava dekena amo ai abia durua, be umui danu do umui abia.

8 Aiemai varavara taudia e, ai ura Asia dekenai ai abia hisihisi toana do umui diba. Metau bona hisihisi ai dekenai idia henia be bada herea. Aiemai goada ia ore, bona ai laloa do ai mase. 9 Oibe, aiemai laloa be kota biaguna ta ese aiemai mase ia gwauraia vadaeni bamona. To inai ia vara, be do ai diba aiemai goada be ia hegeregere lasi totona. Vadaeni inai bamona ai diba neganai, mase taudia ia hatorea isi Diravana sibona ai abidadama henia. 10 Bona ia ese mase dika momokani dekena amo ai ia hamauria vadaeni, bona ai do ia hamauria noho. Ai abidadama henia noho danu, vaira neganai ia ese ai do ia hamauria lou. 11 To gau badana be, umui ese ai do umui durua noho emui guriguri dekena amo. Vadaeni emui guriguri momo be Dirava ese do ia kamonai, bona ia ese ai do ia hanamoa. Unai neganai taunimanima momo ese ai do idia laloa, bona ai dainai Dirava do idia hanamoa bada.

12 Ai be gau ta totona ai heagi noho, gauna be inai: Mai laloa namo danu ai diba momokani, aiemai kara, tanobada lalonai, bona umui emui vairanai danu, be mai momokani bona mai laloa maoromaoro danu. Tanobada taunimanima edia aonega dekena amo inai kara ai karaia lasi. To Dirava ena hariharibada ena siahu ese ai ia biagua dainai ai karaia. 13 Badina be aiemai revareva lalonai be hunia hereva ta lasi. To umui duahia diba, bona edia anina ibounai do umui diba namonamo gaudia sibona ai torea noho. 14 Hari be ai umui diba sisina sibona. To lau daradara lasi, gabeai ai do umui diba momokani. Vadaeni Lohiabada Iesu ena Dina neganai, umui ese ai do umui heagilaia, ai ese umui do ai heagilaia hegeregerena.

15 Umui emui abidadama lau hamomokania dainai, lauegu palani gunana be umui dekenai do lau mai, umui do lau hanamoa nega rua totona. 16 Badina be lau laloa Makedonia do lau lao neganai, umui do lau vadivadi henia, bona Makedonia dekena amo do lau giroa mai neganai danu, umui do lau vadivadi henia lou. Vadaeni lauegu lao dalana Iudea dekenai be umui ese lau do umui durua, lau laloa. 17 Unai bamona lau laloa dainai lau be daradara tauna bamona, a? O sedira lauegu laloa be tanobada tauna ena laloa bamona, lau be “oibe” bona “lasi” nega tamona lau gwauraia, a? 18 Dirava ia diba lauegu gwauhamata umui dekenai be “oibe” bona “lasi” lasi. 19 Badina be lau bona Sila bona Timoteo ese Iesu Keriso, Dirava ena Natuna umui dekenai ai harorolaia, be “oibe” bona “lasi” lasi, to ia be “oibe” sibona. 20 Badina Keriso be Dirava ena gwauhamata ibounai edia “oibe.” Bona inai anina be, Dirava ita hanamoa neganai, “Amen” ita gwauraia, inai be Iesu Keriso dainai. 21 Dirava ese ai bona umui ia hakapua tamona Keriso lalonai, bona ia ese ita ia haginia goada, daradara ta lasi. Bona Dirava sibona ese ita ia abia siri vadaeni, iena taudia ita lao. 22 Iena maka danu iseda latanai ia atoa vadaeni, bona iena Lauma Helaga danu iseda kudouna edia lalonai ia atoa vadaeni. Inai bamona Dirava ia karaia dainai, ita diba momokani iena gwauhamata gaudia ibounai be dohore ita abia.

23 Dirava be lauegu lalona ia diba, bona ia diba lau hereva momokani inai: Lau be Korinto dekenai lau mai lasi badina korikori be umui lau bogahisihisi henia dainai. 24 Ai ese umui emui abidadama ai biagua lasi. Ai diba umui emui abidadama lalonai umui gini goada noho. Unai dainai ai be umui danu ita gaukara hebou, emui moale do ai havaraia totona.