78
God An His Peopo
One Asaf kine song fo teach
1 Eh my peopo! Lissen up!
I goin teach you guys someting.
Lissen to eryting I goin tell.
2 ✡ 78:2: Matt 13:35I goin tell you guys stories
Fo teach importan kine stuff fo make you tink,
Fo make you guys undastan
Wat da local kine peopo wen talk about
Long time befo time,
Dass hard fo undastan.
3 All us guys wen hear dis stuff awready,
We know bout um,
Cuz oua faddah guys
Wen tell us da stories.
4 Same ting fo us guys,
We no goin hide da teaching.
We goin let oua kids know bout um.
Cuz us guys gotta tell
Da ones dat goin born bumbye
How awesome Da One In Charge stay,
An how strong him,
An tell bout all da tings
Dat stay hard fo do,
But he do um.
5 Da One In Charge, he wen do stuff
Fo make da Jacob ohana peopo
No foget wat dey gotta do.
He wen give da Israel peopo
Da Rules he wen tell oua ancesta guys,
Fo make shua da peopo dat come
From dem goin know all dis.
6 He do all dis, fo da peopo know
Dat goin come bumbye,
Even da ones dat not born yet,
Da ones dat come bumbye,
Dey goin stay ready
Fo tell dea kids da stories too.
7 Cuz a dat, dea kids goin trus God too,
An no foget
Da awesome tings God wen do.
Az how dey goin stick
Wit his Rules an do um.
8 God no like fo dem ack
Jalike dea ancesta guys,
Cuz da peopo from dat time,
Dey get hard head,
An neva like do wat God tell um fo do.
Dose peopo, dey neva make shua
Dey stay solid inside,
Cuz da way dey stay inside,
God no trus um.
9 Da peopo from dat time,
Da army guys from da Efraim ohana,
Dey get bow an arrow fo fight.
But wen dey start fo fight,
Dey run away.
10 Dey neva stick wit da deal
Dey get wit God,
Dey wen tell, “Us no goin live
Da way da Rules From God tell!”
11 Dey wen foget all da tings
God wen do,
An all da awesome tings
He wen make um see.
12 ✡ 78:12: Outa 7:8–12:32God wen do plenny tings
In front dea ancesta guys,
Tings dat wen make dea jaw drop,
Ova dea Egypt side, aroun Zoan town.
13 ✡ 78:13: Outa 14:21-22God wen split open da Red Sea
An take da peopo thru da middo
To da odda side.
He wen make da watta pile up
Dis side an dat side
Jalike had one dam dea.
14 ✡ 78:14: Outa 13:21-22Day time, God wen use one cloud
Fo show da peopo wea fo go,
Nite time, he wen use da light
From one fire dat go up to da sky
Fo show um da way.
15 Inside da boonies,
He split open da big rocks
Fo give da peopo watta fo drink,
Uku plenny watta,
Jalike come from da deep ocean.
16 ✡ 78:16: Outa 17:1-7; Census 20:2-13He make watta
Come outa one cliff
An come down jalike rivas.
17 But da peopo, dey still yet
Stay do bad tings.
Dey go agains wat
Da God Dass Mo Importan
Den All Da Odda Gods
Tell um fo do.
Ova dea, wea no mo watta.
18 ✡ 78:18: Outa 16:2-15; Census 11:4-23, 31-35Inside, dey tink lidis:
“Eh, we go tes God!
We tell him he gotta give us guys
Da kine food we like!”
19 Dey grumble bout God.
Dey tell, “Dis God, he can make
One big luau fo us guys,
Hea inside da boonies, o wat?!
20 Fo shua, Moses wen wack da cliff
An plenny watta come out,
Jalike rivas.
But wat bout bread? You tink God
Can give us guys bread, o wat?!
You tink he can give his peopo meat,
O no can?”
Dass how dey talk.
21 Da One In Charge, he hear
Da stuff dey tell.
Dass why he get real mad.
He sen fire fo wipe out
Da Jacob ohana.
He come huhu wit da Israel peopo.
22 Cuz dey neva trus God, az why.
Dey neva like tink lidis: “God da One
Fo get us guys outa trouble!”
23 So God tell da clouds up dea
Wat fo do,
Jalike he open one door
From da sky.
24 ✡ 78:24: John 6:31God make da manna food come down
From da sky jalike rain
Fo give da peopo bread from da sky.
25 All da peopo eat jalike dey alii.
He sen um plenny food,
All dey can eat.
26 God tell da wind from da east
Fo blow from da sky.
He use his powa fo make da wind
From da south come by dem too.
27 Dass how God bring meat to dem
Jalike was dirt
Dat da wind blow aroun.
Had plenny birds dat fly down,
Was real plenny,
Jalike da sand on top da beach.
28 God make da birds fly down
Inside dea camp place,
All aroun da place wea God stay.
29 Da peopo, dey pig out
Till dey come full to da max.
God bring um all da food
Dey tell dey like eat.
30 But befo da peopo pau eat
Dat meat dey wen aks fo,
Wen da food still stay inside dea mout,
31 God show he huhu wit dem.
He kill dea mos stronges peopo,
An make da young guys
From da Israel ohana mahke.
32 But no matta wat God do,
Da peopo still yet do bad kine stuff.
Dey no trus God, even afta
Dey see da awesome tings he do.
33 Dass why God make eryting dey do,
All da time dey live, come poho.
He make da peopo come real sked,
Fo dem mahke.
34 But afta God kill some a dea peopo,
Da ones dat still stay alive
Change dea mind.
Dey like know God
Jalike dey wen know um befo time.
35 Den da peopo no foget dat God,
He stay jalike one big rock fo help dem.
Da God Dass Mo Importan
Den All Da Odda Gods,
He da One wen pay da price
Fo get um back.
36 Still yet, da Israel peopo wen bulai God,
Da way dey talk to him.
Dey open dea mout
Fo tell wass not true.
37 ✡ 78:37: JGuys 8:21Inside, erytime dey stay change
How dey tink bout him.
Da way dey ack, God no can trus um
Fo stick wit da deal
Dey wen make wit him.
38 But God, he get pity fo dem,
Az why he wen let da peopo go
Fo da wrong tings dey wen do,
An why he neva wipe dem out.
Ova an ova, God wen hold back
Da way he feel bout dose peopo,
An he neva bus um up,
No matta he stay huhu wit dem.
39 Cuz he tink lidis:
“Aah, dey ony peopo.
Dey jalike da wind,
Dat blow but no come back!”
40 Plenny time, ova dea inside da boonies,
Da Israel peopo wen tell God
Dey no goin do how he tell um fo do.
Dey wen make God
Come plenny sore inside,
Ova dea wea no mo notting!
41 Ova an ova, dey wen tes God
Fo find out wat he goin do.
Dey wen make him come sore inside,
Da One dass good an spesho
Fo da Israel peopo.
42 Dey neva rememba how strong God stay,
Da time God wen cut dem loose
From da Egypt peopo
Dat wen stay agains dem.
43 Dey neva tink bout
Da tings God wen do Egypt side
Fo show wat kine god him.
He wen do awesome kine stuff
Ova dea aroun Zoan.
44 ✡ 78:44: Outa 7:17-21Dis wat God wen do Egypt side:
He wen make da rivas ova dea
Come blood.
Even da streams,
Nobody can drink da watta.
45 ✡ 78:45 a: Outa 8:20-24; b: Outa 8:1-6He wen sen choke plenny bugs
By da Egypt peopo fo bite um,
An frogs fo mess um up.
46 ✡ 78:46: Outa 10:12-15He wen let da grasshoppas go afta
Da food da Egypt peopo wen grow,
He wen let da locust bugs
Eat up eryting da peopo wen work fo.
47 ✡ 78:47: Outa 9:22-25He wen make hail fall down
From da sky jalike rain
Fo kill da grape vines
An make da fig trees mahke
From da cold.
48 Dea cows, same ting,
God wen let da hail kill um,
An da lightning hit
Da animals dey own.
49 God stay plenny huhu dat time.
He neva take wat da Egypt peopo do.
Dass why he wen make hard
Fo dem an give um big trouble,
He wen sen
Choke plenny angel messenja guys
Dat do bad tings to dem.
50 Cuz God bus up
All da Egypt peopo cuz he huhu,
He no hold back fo kill um,
An he make da real bad kine sick
Get um.
51 ✡ 78:51: Outa 12:29Ery numba one boy
From ery ohana inside Egypt,
God wen kill um,
Da strong ones
Dat get Ham fo dea ancesta guy.
52 ✡ 78:52: Outa 13:17-22Fo God peopo, he wen tell dem
Fo start fo move jalike sheeps,
He wen bring um thru da boonies
Jalike he one sheep guy.
53 ✡ 78:53: Outa 14:26-28God neva let notting bad happen
To dem dat time.
Dey neva come sked notting.
But da guys dat wen go
Agains God peopo,
Da Red Sea watta wen go ova dem.
54 ✡ 78:54: Outa 15:17; Josh 3:14-17God wen bring his peopo to da edge
A da land dat stay spesho fo him,
To da mountain he wen take ova
Cuz he stay strong.
55 ✡ 78:55: Josh 11:16-23He make da odda peopos
Run away from his peopo.
He make one plan an measure
Da property fo da Israel ohanas
Fo dem live wea da odda peopos
Wen stay befo time.
56 ✡ 78:56: Local 2:11-15But da Israel peopo,
Dey ony like tes God
Fo see wat he goin do,
Da God Dass Mo Importan
Den All Da Odda Gods,
Dey neva do da tings he teach um.
57 Jalike dea ancesta guys,
Dey wen bag from God
An neva stay tight wit him.
Az why God no can trus dem.
Dey jalike one bow dat no shoot strait.
58 Wen dey make place fo pray
On top da hills,
Dey make God feel bad.
Dey go down an pray
To dea idol kine gods,
An dat make God come jealous.
59 God know wat dey stay do,
An fo shua he tell “Laytas” to dat.
He tell dat da Israel peopo,
Dey not his peopo no moa.
60 ✡ 78:60: Josh 18:1; Jer 7:12-14; 26:6God wen bag from da tent
Dey wen put up Shiloh side,
Fo be da place wea da peopo
Can come togedda wit God.
61 ✡ 78:61: 1Sam 4:4-22God wen make da odda peopos
Capcha da Box
Dat stay fo make da peopo tink
Bout how strong God stay.
God make dem take ova da Box
Dat help peopo no foget
How awesome God stay.
62 God wen let odda peopos
Kill his peopo wit dea swords,
Cuz he plenny huhu wit his guys.
63 Da war eat up dea young guys
Jalike fire wen kill um.
Dea young girls,
Nobody sing wedding song fo dem
Cuz no mo nobody fo dem marry.
64 Da odda peopos kill da Jew pries guys
Wit dea sword,
Da widows, dey neva even have time
Fo make funeral.
65 But den, jalike da Boss Up Dea
Wen wake up afta he sleep,
Jalike one army guy drink wine,
But den he wake up ready fo fight.
66 God wack da peopo
Dat wen go agains him
An make dem come shame
Fo long time.
67 Dat time, Da One In Charge
Neva pick da Joseph ohana,
He neva like da peopo
Dat come from Efraim.
68 Da ohana dat God wen pick,
Az was da Judah ohana.
He wen pick Zion hill
Inside Jerusalem town,
Cuz he get love an aloha
Fo dose peopo ova dea.
69 God wen build da Place
Dat Stay Spesho Fo Him,
Fo stay jalike his place
Up dea inside da sky.
God wen make his place solid
Jalike da earth,
Wit solid foundation foeva.
70 ✡ 78:70: 1Sam 16:11-12; 2Sam 7:8; 1Rec 17:7God wen pick David, his worka guy.
He wen tell David fo leave da sheeps
Dat he take kea of.
71 God wen bring David back
From wea he help da muddah sheeps
Wit dea bebes,
Cuz God like fo David
Take kea God peopo, da Israel peopo.
72 Dass why David
Take kea God peopo,
Wit one good heart,
So no can poin finga him notting.
David wen know how
Fo show God peopo
Wea fo go an wat fo do.
✡78:2 78:2: Matt 13:35
✡78:13 78:13: Outa 14:21-22
✡78:14 78:14: Outa 13:21-22
✡78:16 78:16: Outa 17:1-7; Census 20:2-13
✡78:18 78:18: Outa 16:2-15; Census 11:4-23, 31-35
✡78:37 78:37: JGuys 8:21
✡78:44 78:44: Outa 7:17-21
✡78:45 78:45 a: Outa 8:20-24; b: Outa 8:1-6
✡78:46 78:46: Outa 10:12-15
✡78:47 78:47: Outa 9:22-25
✡78:51 78:51: Outa 12:29
✡78:52 78:52: Outa 13:17-22
✡78:53 78:53: Outa 14:26-28
✡78:54 78:54: Outa 15:17; Josh 3:14-17
✡78:55 78:55: Josh 11:16-23
✡78:56 78:56: Local 2:11-15
✡78:60 78:60: Josh 18:1; Jer 7:12-14; 26:6
✡78:61 78:61: 1Sam 4:4-22
✡78:70 78:70: 1Sam 16:11-12; 2Sam 7:8; 1Rec 17:7