13
Da One In Charge
Stay Huhu Wit Da Israel Peopo
Stay Huhu Wit Da Israel Peopo
(1 Corint 15:55)
1 Befo time wen da Efraim ohana leadas talk,
Da odda peopo stay sked an shaking.
Had importan peopo inside da Efraim ohana.
But laytas, da Efraim guys wen go do someting bad,
Cuz dey go down in front da Baal gods,
Az why dey goin mahke.
2 Now, dey stay do bad kine stuff mo an moa.
Dey cova idol kine gods wit dea silva.
Dey know how fo make um real good.
But dass ony peopo dat make um.
Odda peopo talk bout dem. Dey tell,
“Dose peopo dat make da sacrifices to odda gods,
Dey kiss da bebe cow statues.”
3 Az why dey goin disappea fas,
Jalike da clouds, morning time.
Jalike da dew dat come out early an den go way.
Jalike da junk kine stuff dat da wind blow way from da wheat an barley.
Jalike da smoke dat go outa one window.
4 Da One In Charge tell, “But me Da One In Charge, I yoa God.
I wen bring yoa ancesta guys outa Egypt.
You guys betta not know any odda god, ony me.
Me, da ony One can get you guys outa trouble.
5 ✡ 13:5: Rules2 8:11-17I wen take kea yoa ancesta guys inside da boonies,
Wea stay real hot an dry.
6 Wen I wen feed dem, dey get full.
Wen dey full, den dey ack high makamaka.
Dass how dey foget me.
7 Az why I goin make to dem jalike I one lion!
Jalike one leopard,
I goin stay hide by da road side fo jump um.
8 I goin attack dem jalike one bear
Wen somebody steal her bebes.
I goin rip dea heart open.
I goin eat um up right den an dea, jalike one lion,
Jalike da wild animals bus up da body a da animals dey catch.
I goin bus up dea body!
9 “You Israel peopo, somebody goin wipe you out
Cuz you stay agains me,
An I da ony One can help you guys.
10 ✡ 13:10: 1Sam 8:5-6So! Wea yoa king, aah?!
He suppose to get you outa trouble, aah?!
Wea yoa leada guys in all yoa towns?!
Da ones you guys wen tell bout,
‘Give us one king an leada guys!’
11 ✡ 13:11 a: 1Sam 10:17-24; b: 1Sam 15:26So, cuz I wen stay huhu, I give you one king.
Den I come real huhu one mo time, an take him away.
12 “Da Efraim peopo get plenny blame.
I write one lis a all da bad kine stuff dey do,
An I keep dat lis fo punish.
13 Da Efraim peopo hurt jalike one wahine born one bebe.
But da bebe no like come outa da muddah!
14 ✡ 13:14: 1Cor 15:55You tink I goin pay da price fo dem
So da Mahke Peopo Place no mo powa ova dem? No ways!
You tink I goin pay fo dem no mahke? Not even!
Az da real bad kine sick goin make dem mahke!
Da Mahke Peopo Place goin wipe dem out!
No way I goin show dem pity!
15 No matta da Efraim peopo stay good mo den da odda nations,
One wind from me Da One In Charge
Goin come from da east side boonies.
Goin blow ova hea from da boonies.
Ery puka dat get watta goin come dry.
Odda peopos goin rip off all dea rich kine stuff.
16 Da Samaria peopo gotta get punish,
Cuz dey wen go fight me dea God.
Dey goin get kill wit swords.
Odda peopos goin throw da Samaria small kids down
Fo dem mahke on top da groun,
An dose odda peopos, dey goin rip open da hapai wahines.”
✡13:5 13:5: Rules2 8:11-17
✡13:10 13:10: 1Sam 8:5-6
✡13:11 13:11 a: 1Sam 10:17-24; b: 1Sam 15:26
✡13:14 13:14: 1Cor 15:55