19
1 Mo betta you no mo notting,
An peopo trus you,
Den if you donno notting an easy fo you bulai peopo,
An talk real pilau kine stuff.
2 An no good, you go all out fo do someting
But you no tink good bout wat you doing.
An no good, you rush
An come jam up.
3 If you go all out fo do stupid kine stuff,
You goin jam up yoa whole life.
An den you goin come huhu
An tell dat Da One In Charge get da blame.
4 If you get plenny stuff,
You goin get plenny “frenz” too.
But if you no mo notting,
Yoa las “fren,” goin go way too!
5 Da kine guy dat bulai any kine in front da judge,
Fo shua, da judge goin punish him!
Da kine guy dat bulai all da time,
No way he goin get away!
6 Plenny peopo try make nice nice to all da alii guys,
An erybody like come fren wit da guys dat give um one present.
7 If you no mo notting,
All yoa ohana guys no goin like you,
An yoa frenz even moa,
Dey no like go by you.
You try talk to dem,
But notting happen.
8 Anybody learn how fo tink good,
Fo shua dey goin take good kea dea life,
An live long time.
Anybody try hard fo undastan wass happening,
Eryting goin come good fo dem, fo shua.
9 Da kine guy dat bulai in front da judge,
Fo shua, da judge goin punish him!
Da kine guy dat bulai erytime he open his mout,
He goin come wipe out!
10 No good fo one stupid guy
Dat tink he no need learn notting,
Get real plenny nice kine stuffs!
Stay mo worse,
Wen one slave guy
Stay tell all da leada guys how dey gotta make!
11 Wen you tink az good fo know how come tings happen,
You no goin come huhu real quick.
An if somebody go agains you
An dat no goin bodda you,
Plenny peopo goin respeck you!
12 Wen one king get mad, you betta watch out!
Az jalike wen one lion make big noise.
But wen da king like wat you stay do, eryting stay okay!
Jalike wen da dew come on top da grass.
13 Wen get one stupid kid
Dat figga he no need learn notting,
Da faddah suffa plenny.
Wen da wife like beef bout eryting,
Az jalike one puka roof dat stay leak all da time.
14 Da faddah guys leave dea house an dea money fo dea kids,
But da kine wife dass akamai
An tink good fo know wat fo do,
She jalike one present from Da One In Charge!
15 Da lazy buggahs, dey ony like sleep plenny,
Az why dey no mo notting fo eat.
16 Whoeva make shua dey do wat da Rules from God tell,
Same time, dey goin take kea dea life too.
Somebody no kea how dey ack,
Dey goin get cut off from God foeva.
17 You do good kine stuff
Fo da peopo dat no mo notting,
Jalike you stay lend stuff to Da One In Charge.
An Da One In Charge goin pay you back wit good kine stuff
Fo wat you do.
18 Punish yoa kids wen you gotta,
Wen still get chance fo teach um.
But no tink az all you gotta do,
Cuz if you ony punish yoa kids,
Bumbye goin make dem mahke inside.
19 Somebody show dey real mad erytime,
Dey goin pay fo dat.
Cuz if you help um get outa trouble,
You gotta do da same ting ova an ova.
20 Lissen up wen peopo tell you
Wass good fo you do.
An lissen wen dey tell you
How fo do da right ting,
Cuz If you do dat, den bumbye
You goin know wat fo do erytime.
21 You can make plenny plan inside yoa head.
But da plan dat Da One In Charge make fo you,
Dass wass goin happen fo shua.
22 Wen one guy stay tight wit his frenz,
He look real good.
Mo betta you no mo notting,
Den you come one bulaia guy.
23 If you feel jalike you sked wen you in front Da One In Charge,
Den you goin get one good kine life!
You goin feel jalike eryting goin be okay,
An no way you goin get trouble.
24 Get peopo dat so lazy,
Wen dey grab food, dea hand stay inside da dish,
Dey no even put da food inside dea mout!
25 Punish da buggahs dat no mo respeck fo nobody
Cuz dey tink dey smart.
An den, da odda guys dat donno notting an easy fo bulai dem,
Dey goin come mo akamai
An learn how fo tink strait.
An if you tell da kine guy dat undastan stuff,
Dat he wen do someting wrong,
Dat guy goin learn someting.
26 Anybody make dea faddah suffa,
O make dea muddah get outa da house,
Dey da kine kid make big shame fo da ohana
An make peopo talk bad bout dem.
27 Eh my boy, if you no like lissen no moa
Wen I tell you how fo do da right ting,
Dat mean you goin go da wrong way mo an moa,
An you make deaf ear fo know da stuff dat goin help you.
28 Wen one real bad guy
Suppose to tell wat he wen see, in front da judge,
Da kine guy no mo respeck fo wat da judge tell,
Cuz da guy tink he mo smart.
Da bad kine peopo, dey do wrong,
Jalike da bad kine stuff dey do taste good!
29 God stay ready fo punish
Da kine buggahs dat no mo respeck fo nobody
Cuz dey tink dey mo smart!
He get one whip fo wack
Da kine dumb buggahs dat no like learn notting.