13
1 You get somebody dat know wat fo do erytime,
Dat mean dea faddah make dem learn.
But da buggahs dat no mo respeck fo nobody
Cuz dey tink dey so smart,
Dass why dey no lissen, neva mind you scold dem.
2 Wat peopo tell, an how dey tell um,
Make good tings come fo dem.
Da buggahs dat you no can trus,
Inside, dey ony like bus you up.
3 Da peopo dat watch how dey talk,
Dey stay alive long time cuz a dat.
Da peopo dat no kea how dey talk,
Dey come wipe out cuz a dea big mout.
4 Da lazy buggahs ony tink bout how fo get stuff,
But dey no get notting.
Da peopo dat work hard,
Dey get da bestes kine stuff.
5 Da peopo dat do da right ting all da time,
Dey no like tell da kine bulai words fo cheat peopo.
Da bad kine peopo, shame how dey ack
An wat dey do.
6 Wen get peopo do da right ting,
Dey make shua fo do stuff da right way all da time.
Wen get bad kine peopo,
Dey all jam up, cuz dey do bad kine stuff.
7 Get some peopo,
Dey ack jalike dey get plenny,
But dey no mo notting.
Get some odda peopo,
Dey ack jalike dey no mo notting,
But dey get plenny.
8 Da rich guys get plenny silva fo pay anybody dat like kill um,
But da guys dat no mo notting,
Dey no need bodda bout dat kine problem.
9 Da peopo dat do da right ting erytime,
Dey make peopo feel good
An like dance an sing,
Jalike one light stay shine.
Da bad kine peopo,
Dey jalike one light dat goin pio bumbye.
10 Da kine guys dat tink dey so smart,
Dey ony like make argue all da time.
Da kine guys dat lissen smart peopo
Fo tink out wat da bestes ting fo do,
Dey da ones dat know wat fo do erytime.
11 Wen you no do notting fo da stuff you get,
Bumbye no moa.
Da kine guy dat work fo get stuff,
Bumbye he goin get plenny.
12 Wen you wait long time fo someting good,
An no get um,
Make you lose fight an come sick.
But wen you wait long time fo someting good,
Den you get um,
You feel alive inside!
13 Da peopo dat no kea an no lissen,
Dey goin come wipe out cuz dey make lidat.
Da peopo dat try fo make shua dey do wat dey suppose to,
Eryting goin come good,
Dass how God goin pay dem.
14 Wen you lissen somebody dat know wat fo do erytime,
Dass how you can get life,
Jalike one spring fo watta.
Dass how you can stay away
From da kine trap dat can kill you.
15 Wen you akamai an you can tink strait,
Erybody like dat.
But da kine guys you no can trus,
Dey goin be lidat all da time.
16 Da akamai peopo do stuff
Cuz dey know wat dey stay do.
Da peopo dat tink dey know wat dey stay do,
But dey donno,
No bodda dem fo do stupid stuff
In front odda peopo.
17 Da bad kine messenja guy,
He goin get into trouble.
Da real messenja guy you can trus,
He make eryting come good.
18 Da kine peopo dat no lissen
Even wen dey tell um fo learn wass right,
Dey goin come shame,
Cuz dey no mo notting.
But da kine peopo dat lissen good
Wen you tell dem dat dey wen jam up,
Bumbye, dey goin get plenny respeck.
19 Wen you get someting you fo real kine want,
You feel all good inside.
But da stupid kine peopo wit attitude,
Dey no feel good inside
Wen dey no do bad kine stuff.
20 Hang out wit smart kine guys,
You come smart jalike dem.
But if you good frenz wit stupid peopo,
You goin come jalike dem, an suffa.
21 Wen peopo do bad kine stuff,
Bad stuff goin happen to dem.
But peopo dat do wass right,
Good stuff goin happen to dem cuz a dat.
22 Da good kine peopo, dey save till dey mahke
Fo da kids an da grankids get plenny from dem.
Da peopo dat do bad kine stuff, dey save plenny stuff,
But da whole ting go to da peopo dat do da right ting.
23 No matta da peopo dat no mo notting
Harves plenny food from inside dea field,
If odda peopo no do da right ting, da peopo dat no mo notting no goin eat notting.
24 Da peopo dat no do notting
Wen dea kids do someting bad,
Dat mean, dey tink da kid no good.
Da peopo dat get plenny love an aloha fo dea kids,
Dey make shua dey teach um da right way
Wen dey still yet small kid.
25 Da peopo dat do da right ting,
Dey eat, dey come full, an dey feel good inside.
Da bad kine peopo,
Dea opu no mo enuff fo eat.