20
Zofar Talk Secon Time To Job
1 Den Zofar from Naamat tell Job:
2 “Cuz get stuff dat bodda me plenny,
I betta talk one mo time right now,
Cuz I stay bum out inside.
3 Eh Job! I hear you try fo teach me someting,
But you no show respeck fo me.
I undastan plenny stuff,
Az why I know how fo ansa you.
4 “Fo shua you know how was from long time befo time,
From da time God put da peopo on top da earth till now.
5 Da peopo dat do bad kine stuff,
Ony short time dey get fo dance an sing.
Da peopo dat ack jalike God no matta,
Dey stay good ony fo short time.
6 No matta dey real big head,
An dea head touch da clouds,
7 Dey goin come wipe out foeva, jalike da doodoo dey make.
Da peopo dat see dem befo time goin tell, ‘Wea dey stay?’
8 Dat kine peopo disappea, jalike one dream.
Dey go way, jalike someting dey see nite time.
9 Da peopo dat wen see dem
No goin see um one mo time.
Da place wea dey wen stay,
Nobody stay dea now.
10 Dea kids gotta give back da stuff dea faddah guys wen rip off
From da peopo dat no mo notting.
Dey gotta pay um back from da stuff dea faddah own.
11 Dea faddah guys bones stay strong wen dey was young.
But dey goin mahke, an dose bones goin lay down on top da dirt.
12 “No matta da guys dat rip off stuff like do bad kine stuff,
An tink bout um long time, jalike candy.
13 Dey no like fo da sweet stuff pau,
So dey hold um inside dea mout long time.
14 But wat da guys dat rip off stuff fo eat goin come sour inside dea belly.
Goin come jalike snake poison inside um.
15 Dey goin bahf up all da rich kine stuff dey wen swallow.
God goin make dea belly throw um up.
16 Wen da guys dat rip off stuff get rich kine stuffs,
Az not dea candy.
Dey suck da poison from da poison snakes.
Dat poison goin kill um!
17 Da guys dat rip off stuff no goin live long enuff
fo see da streams dat dey own,
An da gulches dat run wit honey an sof cheese.
18-19 Da guys dat rip off stuff wen put presha on top da peopo dat no mo notting,
An dey grab houses dat dey neva build,
Az why da guys dat rip off stuff gotta give back da stuff dey wen work fo.
Dey no can eat um up.
Dey no goin stay good inside
Bout da stuffs dey get from trading.
20 “Fo shua da guys dat rip off stuff no can res,
From da way dey like get eryting fo ony dem.
Get plenny stuff dey like get,
But dey no goin find um.
21 No mo notting lef ova fo dem eat up.
Az why dey no can stay rich long time.
22 “Even wen da guys dat rip off stuff stay rich, dey goin get hard time.
All kine bad stuff goin make dem suffa.
23 Wen dey stay fill dea opu,
God goin come real huhu wit dem,
An wack um ova an ova.
24 No matta dey run away from guys wit iron swords,
One arrow wit bronze poin goin stab um.
25 He pull da arrow stick outa his back,
Afta da shiny poin go thru his liva.
He come real sked.
26 Get one real dark place wea all dea rich kine stuffs goin go.
One fire dat nobody start goin wipe out all dat stuff,
An burn up eryting dat still stay inside dea tent.
27 Da sky goin show dat da guys dat rip off stuff get da blame.
Da earth goin lif up agains dem.
28 I like da flood take away da house a da guys dat rip off stuff!
Da big watta goin smash um wen God come huhu!
29 Dass wat God goin give to da bad guys,
Dass wat dey goin get from God!”