41
God Kokua Da Israel Peopo
(Hebrews 2:16; James 2:23)
1 Da One In Charge tell:
“No tell notting, jus lissen,
You islan peopos!
An all you peopos, try fo change
Fo come mo strong.
Try come ova hea by me,
Den we talk.
Good erybody come togedda by me, da Judge.
2 “Me, Da One In Charge,
I make one guy from da east side
Ready fo fight.
I tell um fo come work fo me,
Fo make right tings happen!
Az me, Da One In Charge, dat give him da peopos
Inside plenny countries.
I let him take ova da kings ova dea.
Weneva he use his sword,
Erybody he wack, come jalike dirt.
Wit his bow an arrows
Erybody he wack,
Come jalike da junk kine stuffs from da wheat.
3 Dis guy from da east side,
He chase da peopo dat stay agains him,
An den he go some mo
Cuz nobody goin hurt him.
Da way he goin go,
He neva go dat way befo time.
4 Me, Da One In Charge, I da One do all dis stuff,
An me da One dat pau do wat I start fo do!
Was me, Da One In Charge, wen tell da firs peopo fo come,
An all da ones dat wen born afta dem too,
An me da One goin tell da las ones wen dey pau!
5 “Da islan peopo wen see wat I do,
An cuz a dat, dey come sked.
Da peopo inside da mos far places on top da earth,
Dey stay sked an shaking too.
Dem an da odda peopos wit dem,
Dey stay come.
6 Erybody help each odda fo come in front me.
Dey tell dea braddahs, ‘Come strong!’
7 So da guy dat shape da metal
Fo make one idol kine god,
Wen he give da idol to da guy dat put da gold on top da idol,
He give one good kine word to da guy.
An da guy dat use da hamma
Fo make da gold come smooth,
Wen he give da idol to da guy dat poun da anvil,
He give one good kine word too.
He tell um, ‘Good, da way you put um togedda, aah?!’
Afta, dey poun da nails in da idol kine god
So da ting no fall down!
8 ✡ 41:8: 2Rec 20:7; James 2:23“But you Israel peopo dat work fo me
An come from Jacob,
I wen pick you guys.
You get Abraham fo yoa ancesta,
An he my fren.
9 I wen help you guys come ova hea
From da mos far places inside da world.
No matta you stay far, I tell you fo come.
I tell, ‘You guys work fo me.’
I pick you guys.
I neva tell you good fo notting.
10 So no sked,
Cuz you guys da one I stay wit.
No come bum out,
Cuz I yoa God.
I make you guys come strong inside.
Mo den dat, I help you guys.
I no let you guys fall down!
Az cuz I get plenny powa
Fo do da right ting fo you guys.
11 “But erybody dat go agains you guys,
Dey goin come shame an lose face fo shua.
Erybody dat stan up agains you guys,
Dey goin mahke an come jalike dey notting.
12 No matta you guys go look fo da guys dat stay agains you,
You no goin find dem.
Whoeva make war agains you guys,
Dey no goin stay cuz jalike dey notting.
13 Cuz me, Da One In Charge, I yoa God.
I da One stay hold yoa right hand,
Da One stay tell you guys, ‘No sked!
I goin help you.’
14 “No sked, you Jacob guys,
No matta you no mo powa, jalike one worm.
No sked, you Israel guys!
I da One goin help you!”
Az da spesho message from Da One In Charge,
Da Good An Spesho God fo da Israel peopo,
Da One dat pay da price
Fo get you guys outa trouble.
15 “An you know wat I goin do cuz a all dat?
I goin make you Israel peopo come strong
Fo bus up erybody dat stay agains you.
You goin come jalike da kine wood frame
Dat get two sides sharp, wit plenny teets.
Da cows pull da wood frame
On top da wheat dey wen harves,
Fo bus up da wheat an take out da junks.
Az Jalike you goin broke up da mountains
An smash da hills. An afta dat,
Ony goin be like da junk kine stuffs dat blow away.
16 Jalike wen you throw da junks up in da air,
An da wind blow um,
Den one strong wind blow um all away.
But you guys goin stay real good inside
Cuz you stay tight wit Da One In Charge,
An you goin talk plenny bout how awesome Da One In Charge stay,
Da Good An Spesho God fo da Israel peopo.
17 “Da peopo dat get hard time
An need somebody fo help dem,
Dey look fo watta, but no moa.
Dea tongue all dry up
Cuz dey thirsty.
But me, Da One In Charge,
I goin do someting fo help dem.
Me, da God fo da Israel peopo,
I no goin go way an leave um!
18 Jalike I goin make rivas come down on top da dry hills,
An pukas fo watta inside da deep gulches.
I goin change da boonies.
An make um ponds fo watta wit watta plants all aroun.
Da place dat no mo rain,
I goin make da groun
Come one place fo get watta.
19 I goin put trees inside da desert,
Da cedar tree, da koa tree,
Da myrtle tree, an da olive tree.
Inside da Arabah Valley I goin put
Tall pine tree, an short pine tree,
An da cypress tree, all togedda.
20 I goin do dat fo peopo see um.
Dass how dey goin know
Dat was me, Da One In Charge, wen do all dat
Cuz I get da powa fo do um.
Dey goin tink plenny bout um,
An try fo undastan,
Cuz was me, da Good An Spesho God fo da Israel peopo,
Wen make all dat.”
Da Idol Kine Gods, Good Fo Notting
21 Da One In Charge, da king fo da peopo dat come from Jacob, he tell,
“You peopo dat pray to da idol kine gods,
I da Judge. How come you no come in front me?!
Tell me wat you make argue bout!
22 Bring yoa idol kine gods in front me
Fo dem tell us guys wat goin happen bumbye.
Let dem tell us wat tings wen happen befo time,
Fo us guys tink bout um
An tink wat goin come bumbye cuz a dat.
O da idol kine gods tell us wat goin come layta,
23 An tell us wat goin happen bumbye.
Den we goin know dat you idol kine gods,
You fo real!
Do someting, good o bad,
Den we goin come bum out an sked,
Wen all us guys togedda see wat you do!
24 But you idol kine gods, you notting,
An wateva you do, no worth notting.
Whoeva pick you guys, dey pilau.
Da King From Da East
25 “I wen make one guy come from da north side.
He come dea from da place wea da sun come up.
He know my name cuz he know who me.
Dis guy walk all ova da guys in charge a da countries,
Jalike dey mud,
Ready fo make pots wit da clay.
26 Wat god you tink wen tell bout dis
From da time eryting wen start,
Fo us guys know who him?!
Da odda gods no can tell dis!
Wat god talk bout um befo time
Fo us tell, ‘Eh, dat one get um right!’
Da odda gods no can tell dis!
Fo shua, nobody talk bout dis befo time.
Nobody eva hear notting
From all you gods,
O from some odda guy.
27 I da firs One wen tell my peopo Mount Zion side,
‘Look, da guys dat goin help you guys, stay hea!’
I da firs One sen one messenja guy to da Jerusalem peopo
Fo tell dem good kine stuff.
28 I look da odda gods, but no mo nobody.
No mo even one a dem fo tell da peopo wat fo do.
I aks dem someting, but da odda gods donno how fo ansa!
29 You know wat?!
Dea idol kine gods, dey ony bulai!
Wateva dey do, not importan.
Dey jalike da wind,
No mo notting inside!”