28
God Talk Bad Bout Da Tyre King
(2 Tessalonika 2:4)
1 Da One In Charge tell me: 2 “Eh! Fo Real Kine Guy! Tell da guy dat stay in charge Tyre side: Dis wat Da One In Charge, da Boss, tell:
“ ‘You get one big head.
You tell, “Me, I one god!
I sit on top da kine throne one god get
Inside da middo a da oceans.”
But you ony one guy! You not one god,
No matta you tink you akamai jalike one god.
3 You tink you know wat fo do erytime
Mo betta den Daniel?
You tink you know all da secrets?
4 You know wat fo do erytime, aah?
You undastan plenny stuff.
You pile up plenny stuff dat cost plenny fo ony you.
You get plenny gold an silva
Wit yoa odda stuffs dat cost plenny.
5 You know how fo trade stuff real good,
So you come mo rich.
But cuz you get plenny stuff dat cost plenny,
You tink you real high makamaka.’ ”
6 Az why dis wat Da One In Charge, da Boss, tell:
“You tink dat you know wat fo do jalike you one god,
7 An cuz you tink lidat,
I goin bring army guys from odda places agains you
Dey goin be da mos mean buggahs from all da odda nations.
Dey goin use swords agains you.
You guys get real nice kine tings
Cuz you know wat fo do erytime,
But dey goin wack um.
Dey goin make all yoa nice kine stuffs come poho.
8 Dey goin make you go down inside da Deep Dark Hole.
Da same way odda peopo get bus up, you goin mahke too,
Ova dea in da middo a da ocean.
9 So! You tink you goin tell, ‘I one god!’
Wen you in front da buggah dat goin kill you?
Wen da buggahs go fo stab you an put dea hands on top you,
You goin ony be one guy, not one god!
10 Da way peopo mahke
Dat no mo da mark fo show dat dey my peopo,
Dass how you goin mahke.
Guys from anodda place goin kill you.
Az wat me Da One In Charge, da Boss, tell.”
11 Den get anodda message from Da One In Charge fo me: 12 “Eh! Fo Real Kine Guy! Sing dis funeral kine song bout da Tyre king. Tell um: Dis da message from Da One In Charge, da Boss:
“ ‘You was da one dat show erybody wat perfeck mean!
You know wat fo do erytime,
An you real good looking to da max.
13 You wen stay inside Eden,
Da park wit plenny trees dat God wen plant.
You wear all kine jewelry stone dat cost plenny.
Da ruby, da topaz, da emerald,
Da chrysolite, da onyx, da jasper,
Da lapis lazuli, da turquoise, an da beryl.
Dey all put inside gold fo hold um togedda.
Da day I wen make you, I give you all dat.
14 I wen give da kuleana fo guard you
To one a da tings dat stay alive an go ery place God go, an fly wit God.
Me, God, I put you on top da mountain dat stay spesho fo me.
You walk wea get stones dat shine bright jalike get fire inside.
15 Da way you live befo time, you neva do notting fo get da blame,
From da time I wen make you
To da time I see dat you go agains wass right.
16 Cuz wen you trade wit peopo all ova da place,
You start fo bus up peopo, an you do bad kine stuff!
So me God, I take away yoa right fo stay on top da mountain dat stay spesho fo me.
Da one dat stay alive an fly wit God fo guard you, he throw you out,
Ova dea wea get da stones dat shine bright jalike get fire inside.
17 You come real big head
Cuz you so good looking.
Befo time you know wat fo do erytime,
But now wat you do cuz you so awesome
Come all hamajang.
Dass why I throw you down on top da groun,
An show da odda king guys how stupid you.
18 You do plenny tings dass not pono,
An you scam peopo wen you trade stuff wit um.
You even make da places dat stay spesho fo yoa gods come pilau!
So I make one fire come outa you an burn you up.
I make you come ashes on top da groun
In front all da peopo dat stay look you.
19 All da ones dat know you from da peopo you trade wit,
Dey wen come bum out cuz a you.
You wen come horraz,
An you no goin be no moa, foeva!’ ”
God Talk Bad Bout Sidon
20 ✡ 28:20: Joel 3:4-8; Zek 9:1-2; Matt 11:21-22; Luke 10:13-14Den get anodda message from Da One In Charge fo me: 21 “Eh! Fo Real Kine Guy! Face da Sidon land an grumble bout dem fo me, 22 an tell: ‘Dis wat Da One In Charge, da Boss, tell:
“ ‘I stay agains you guys, you Sidon peopo.
Wat I goin do to all you guys
Goin show erybody how awesome I stay.
I goin punish you guys,
Az how erybody goin know dat I stay good an spesho.
Den you guys goin know dass me Da One In Charge, da Boss,
Dat do all dat to you guys.
23 I goin sen one real bad kine sick on top you guys.
I goin make yoa blood go all ova yoa streets.
Da attack goin come from all ova.
Da peopo da army guys kill wit swords goin fall down
All ova da place inside dea.
Den you goin know dass me Da One In Charge do all dat.
24 “ ‘From dat time, da Israel peopo no goin get bad peopo dat live all aroun dem no moa, dat ack jalike thorns an stickas dat hurt. Den dey goin know dass me Da One In Charge, da Boss, da One dat do all dat.
25 “ ‘Dis wat me Da One In Charge, da Boss, tell: Da Israel peopo, dey goin live inside dea land one mo time! Dass da land I wen give my worka guy Jacob. I goin bring da Israel peopo togedda from all da diffren nations wea da odda peopos live, wea da Israel peopo stay scatta. An wen I stay wit dem inside dea land, I goin show erybody dat I stay good an spesho fo all da diffren peopos see. 26 Dey goin live Israel side an dey goin stay shua notting bad goin happen. Dey goin build houses an plant grape farms. Notting bad goin happen to dem wen I punish da odda peopos dat live nea dem—da ones dat wen ack jalike my peopo no good. Den my peopo goin know dass me Da One In Charge, da God fo dem.’ ”