1 Da One In Charge give me anodda message: 2 “Eh! Fo Real Kine Guy! You tink da wood from da grape plant stay mo betta fo use den da wood from one branch from all da fores trees, o wat?! 3 Can use da grape wood fo make someting peopo goin use, o wat? Can make one peg from um dat stick outa da wall fo hang stuff on top um, o wat? No ways! 4 Maybe somebody put one stick grape wood inside da fire, an da fire burn da two ends an make da part inside da middo litto bit black. Den, wat you can use dat fo?! Notting! 5 If no can use da grape wood fo someting wen da wood stay good, den fo shua no can use um afta stay inside da fire an come black.

6 “Az why me, da Boss, Da One In Charge, tell dis: Tink bout how I use da grape wood fo burn, cuz no can use dat kine wood jalike da fores kine wood. Kay den, az how I goin make to da peopo inside Jerusalem! 7 I goin go agains dem. No matta dey wen come outa da hard times, jalike dey come outa da fire. Da hard times still yet goin wipe dem out, jalike da fire goin wipe um out. An wen I go agains dem, you guys goin know dat me, Da One In Charge, wen do all dat. 8 I goin make da land come all wipe out, cuz da way da peopo ack, az mean I no can trus um. Az wat Da One In Charge, da Boss, tell.”