19
God Goin Get Jerusalem Outa Trouble
(Isaiah 37:1-13; 2 Records 32:20-22)
1 Wen King Hezekiah hear dat, he rip his clotheses, put on burmbag kine clotheses fo show he stay sad inside, den he go inside da Temple Fo Da One In Charge. 2 He sen Eliakim, da guy dat stay in charge a da palace kine biznis, Shebna da secretary, an da Main Pries guys, an dey all stay wear burmbag kine clotheses too, fo go by Isaiah, Amoz boy, da guy dat talk fo God. 3 Dey tell Isaiah, “Dis wat Hezekiah tell: Us stay supa presha out today an hard time us get! Da One In Charge stay punish us guys. Us come shame in front da odda peopos! Az jalike one bebe goin born, but da muddah not strong enuff fo born um. 4 Maybe yoa God, Da One In Charge, hear eryting da territorial govna guy from Assyria wen tell. His boss, da Assyria king, wen sen him ova hea fo make fun a Da God Dat Stay Alive, an he stay talk bad bout him. Maybe Da One In Charge goin punish him cuz a wat he wen tell. Az why I aks you, Isaiah, fo pray fo all us guys dat still stay alive.”
5 Afta King Hezekiah guys come tell Isaiah dat, 6 Isaiah tell um, “Dis wat you guys gotta tell yoa boss: ‘Da One In Charge tell: No stay sked cuz a wat you wen hear—bout da guys from da Assyria king dat wen talk bad bout me. 7 Cuz you know wat I goin do?! I goin jam up da king head. He goin hear wat somebody tell, an he goin figga dat he betta go back his land. An wen he get dea, I goin make somebody go kill him wit one sword.’ ”
8 Wen da territorial govna guy from Assyria start fo go back by da Assyria king, he find out da king wen leave Lakish town awready, so he go Libnah town fo meet da king wea dea army stay fight.
9 Den, da Assyria king Sennakerib hear dat Tirhakah, da king from Sudan, stay bring his Egypt army guys fo fight da Assyria king. So Sennakerib sen messenja guys by Hezekiah one mo time. He tell um: 10 “Go tell Hezekiah, da Judah king, dis: ‘No let da god dat you trus bulai you. Cuz he goin tell you, “No way I goin let da Assyria king take ova Jerusalem!” 11 Fo shua you wen hear wat us Assyria king guys wen do to all da odda countries awready! Us guys wen wipe um out! An you tink yoa god goin get you outa trouble?! No way! 12 Da gods fo da peopos dat my ancesta guys wen wipe out, dea gods neva help dem get outa trouble! Us guys mo strong den da gods fo Gozan, Haran, Rezef, an da Eden peopo dat wen live Tel Assar! 13 Wea da king fo Hamat, aah? O da king fo Arpad, da king fo da big town a Sefarvaim, o Hena, o Ivvah? Wea dese guys stay now?!’ ”
Hezekiah Pray
(Isaiah 37:14-20)
14 Hezekiah get da letta from da messenja guys, an read um. Den he go up da Temple Fo Da One In Charge, an put down da letta in front Da One In Charge. 15 ✡ 19:15: Outa 25:22Hezekiah pray lidis in front Da One In Charge: “Eh! You Da One In Charge! You da God fo da Israel peopo. You stay in da middo a da awesome angel watcha guys. You da ony God ova all da king guys on top da earth. You da One wen make da sky an da earth. 16 You Da One In Charge! Lissen real good! Open yoa eyes, an look! Lissen wat Sennakerib wen tell me. He stay talk bad bout you, da God Dat Stay Alive!
17 “You Da One In Charge, an fo shua az true, dat da Assyria kings wen bus up all dose peopos an dea lands, dat da Assyria king talk bout! 18 Da Assyria guys wen throw dose peopo gods inside da fire an burn um up, cuz dey not real kine gods, but ony tings dat peopo make from wood an stone. Az why dey can wipe um out. 19 Da One In Charge, you da God fo us guys! Help get us outa Sennakerib powa! Den all da kings in da world goin know fo shua dat you Da One In Charge, az da ony God dass fo real!”
Isaiah Tell Dat Sennakerib Goin Mahke
(Isaiah 37:21-38; 2 Records 32:20-21)
20 Den Isaiah, Amoz boy, sen one message fo Hezekiah. He tell: “Dis wat Da One In Charge, da God fo da Israel peopo, tell: I hear wat you tell me wen you pray, bout Sennakerib da Assyria king. 21 Me, Da One In Charge, I get someting fo tell agains him:
“ ‘Eh, King Sennakerib!
All da wahines from Zion Hill
Hate yoa guts an make fun a you.
Dey goin stick finga at you wen you run away.
22 “ ‘You stay talk bad bout me, aah, Sennakerib?!
You stay talk big, aah?!
You tink you get mo powa den me, aah?!
Me, da God dat stay good an spesho fo da Israel peopo!
23 You wen sen yoa messenja guys hea
Fo talk bad bout me, da Boss.
An you, Sennakerib, you wen tink lidis:
“Me, Sennakerib, I ride inside my war wagon
An bring all my war wagons wit me
On top da mountains,
All da high mountains inside Lebanon!
An I wen cut down da tall cedar trees,
An da bestes pine trees!
An I go make camp
In da far place wea get da bestes kine trees.
24 I wen dig pukas fo watta inside odda lands,
An drink da watta from dea.
I wen make supa plenny army guys
Walk all ova da streams Egypt side,
An dey dry up all da streams ova dea!”
25 “ ‘You neva hear dis long time befo, o wat?!
Me, Da One In Charge wen make da plan bout all dis.
From befo time, I wen set up eryting.
Now, I stay make um all happen jalike I tell.
Dass how come you can make big towns dat get strong wall
Fall down an come piles a rocks wea nobody live.
26 Da peopo dat live dea, no mo powa.
Dey lose fight an come shame.
Dey stay jalike da plants inside da field,
Jalike da young grass plants,
Jalike da grass on top da flat roofs
Dat da sun burn befo can come up strong.
27 “ ‘But I know how you stay make,
An wea you stay all da time.
I know how you stay come all piss off at me.
28 Cuz wen you come all piss off at me,
An I hear you talk like you no give a rip bout notting,
I goin put my hook in yoa nose,
An put my horse bit inside yoa mout
An I goin make you go back
Da same way you wen come ova hea!’ ”
Dass wat Da One In Charge tell Sennakerib.
29 Den Da One In Charge tell Hezekiah:
“Dis goin be da sign fo show you bout wass goin happen, Hezekiah:
Dis year, you goin eat ony stuff dat you neva plant,
An nex year, ony wat grow from dat.
But da year afta dat, you guys goin plant seed an harves da food.
Plant grape farms, an eat da fruits.
30 Jalike befo time, da peopo dat still stay alive from da Judah ohana,
Dey goin get one strong root fo go down unda dem,
An make fruits dat grow up ova dem.
31 Cuz from Jerusalem, da peopo dat still stay alive goin come out one mo time,
Da ones from Mount Zion dat goin get outa trouble.
“Cuz me, Da One In Charge, Da God Ova All Da Armies,
I goin go all out fo make shua az wat goin happen.
32 “Me, Da One In Charge,
Az why I tell dis
Bout da Assyria king:
He no goin come inside dis big town.
He no goin shoot arrow ova hea.
He no goin come ova hea wit one shield.
He no goin pile up dirt by da town wall
Fo his army guys run on top an go inside.
33 He goin go back da same way he wen come.
He no goin go inside dis big town.
Az wat me, Da One In Charge, tell.
34 “An he tell dis too:
“ ‘I goin fight fo dis big town,
An get da peopo dea outa trouble
Cuz a who me, an fo David my worka guy.’ ”
Sennakerib Mahke
35 Dat same day, nite time, one angel messenja guy from Da One In Charge go out inside da Assyria army camp. He kill 185,000 guys inside dea. Wen da Assyria guys dat no mahke get up da nex morning, get all da mahke bodies all ova da place! 36 So Sennakerib, da Assyria king, broke camp, an go back Nineveh town, an stay ova dea.
37 Laytas, Sennakerib stay pray inside da temple fo his god Nisrok. Wen he go down in front Nisrok, his boys Adrammelek an Sharezer kill him wit dea swords. Den dey run away to da Ararat land. An Sennakerib odda boy Esarhaddon come da nex king.