2
रूथइ जौए सिल म्हैब
1 चर बोअज बिबै प्लबै म्हि मुँल। च ह्रोंसए प्युँ एलीमेलेक ङाँइले नाओमीलै या नातो फेमल।
2 तिंगैं मोआब थेंस्यो रूथइ नाओमीने बिइ, “ङ म्रोंर ह्यासि खाबइ ङए फिर ल्हयो खमुँ, चए लिलि म्रोंमैंइ वाथेंबै जौ सिलमैं खुबर ह्याल् पिंन्,”✡ 2:2 लेबी १९:९-१०; व्य २४:१९ बिमा नाओमीइ “ओं ओं ह्याद, ङए च्हमि,” बिइ। 3 छतसि जौ खैंब्मैंए लिलि म्रोंर जौए सिलमैं म्हैबर रूथ ह्याइ। छले ह्यामा चए क्यें एलीमेलेकए नातो फेबै बोअजए म्रोंर च फेनेइ।
4 च्हमा बोअजै या बेथलेहेम सहरउँइँले म्रोंर फेनेइ। बोअजइ जौ खैंब्मैंने “याहवेह क्हेमैंने प्रे तरिगे!” बिमा चमैंज्यै या बिइ, “याहवेहजी क्हिए फिर आशिक पिंरिगे!”
5 झाइले बोअजइ ह्रोंसए के लब्मैं न्होंर्बै चिबने “चु च्हमिरि खाब् जा?” बिसि ङ्योएमा 6 चिबइ बिइ, “च मोआब ह्युलउँइँले नाओमीने खबै मोआबी थेंस्यो ग। 7 ‘म्रोंमैंए लिलि जौ सिलमैं खुल् पिंन्,’ बिसि चइ ङने यो छ्युँ लइ। च न्हाँग ओंनोंन् के लसिन् मुँ, तोगो तिस्यादे भों न्हरिइमुँ।”
8 छबिमा बोअजइ रूथने बिइ, “ओ ङए च्हमि, थेद्, अरूमैंए म्रोंर ह्यासि सिलमैं आम्हैद्, ङए के लबै म्रिंस्योमैंने प्रे चुर्न सिलमैं म्हैद्। 9 चमैंइ खैंबै क्ल्ह्योर चमैंए लिलि सिलमैं म्हैद्। खाबज्यै या क्हिने तोइ आलद् बिसि ङइ चुर्बै फ्रेसिमैंने बिइमुँ। धै क्हि क्यु पिस्याँ चर फ्रेसिमैंइ खामिंसि थेंबै गौरिर्बै क्यु थुँन्।”
10 छबिमा रूथइ बोअजए प्हलेर कुरसि बिइ, “ङ अरू ह्युलर्बै च्हमिरि बिब् था सेसेया क्हिइ ङए फिर तले च्हौ थेबै ल्हयो खइ?”
11 बोअजइ बिइ, “ह्रोंसए प्युँ सियासे या स्युमिलाइ म्हाँया लसि ह्रोंसए ह्युल, ह्रोंसए आबा-आमा वाथेंसि खाबै ङो आसेबै आगुए ह्युलर स्युमिने प्रे खब् ग बिबै ताँ ङइ थेइ। 12 छले छ्याँबै के लबइले क्हिए फिर इस्राएलए परमेश्वर याहवेहजी आशिक पिंरिगे। खी ङाँर क्हि खइमुँ, छतसि खीजी खोंयोंन् बिलै क्हिए फिर आशिक पिंरिगे।”
13 छबिमा रूथइ बिइ, “ङ क्हिए क्येब्स्यो आङिंलै या क्हिइ ङए सैं क्होमिंसि ङए फिर ल्हयो लइ, छलेन् खोंयोंन् बिलै ङइ क्हिउँइँले ल्हयो योंरिगे।”
14 प्रु चबै त्हे तमा बोअजइ चने बिइ, “खो खो, प्रु चखो, क्हें लुँसि सिर्कार तिंसि चद्।” छबिमा रूथ जौ खैंब्मैंनेन् बालु क्हुँमा बोअजइ चलाइ ङ्होबै जौ या पिंइ, धै चइ म्रेंनाले चसि ङैब थेंइ।
15 लिउँइ च धबै सिल खुबर रेमा “चलाइ सिलमैं मत्त्रे आङिं, खैंथेंबै प्हैंउँइँलेन् किंल् पिंन्। चने तोइ आबिद्,” बिसि बोअजइ ह्रोंसए म्रोमैंने बिइ। 16 “जौ खैंमा जौए प्हैंउँइँले दे-दे चए ल्हागिर वाथेंन्, चलाइ आहौदिल्ले त्हुँल् पिंन्।”
17 छतसि रूथइ ङेस समा म्रोंर जौ सिल खुइ। ह्रोंसइ खुबै जौ सिलमैं नेमा ङ्हब्योंदे तइ। 18 धै जौ नोसि च धिंर ह्यामा चइ पखबै जौ स्युमिलाइ उँइँइ। धै चसि ङैपखबै जौ या चइ स्युमिलाइ पिंइ।
19 धै स्युमिइ “तिंयाँ क्हि जौ सिलमैं खाबए म्रोंर खुल? क्हिलाइ ह्रोंसए म्रोंर सिलमैं म्हैल् पिंबै म्हिइ आशिक योंरिगे,” बिइ।
छबिमा रूथइ “तिंयाँ ङइ जौ सिलमैं खुबै क्ल्ह्यो क्ल्हेए मिं बोअज मुँल,” बिसि ह्रोंसइ जौ सिलमैं खुबै क्ल्ह्यो क्ल्हेए बारेर चइ स्युमिने ताँ लइ।
20 च ताँ थेसि नाओमीइ ह्रोंसए चोंने बिइ, “याहवेहजी च म्हिलाइ आशिक पिंरिगे! याहवेहजी सोगोंमैं नेरो सियाब्मैंए फिर ल्हयो खमिंइ!” धबै नाओमीइ चने बिइ, “च ङ्योए नातो न्होंर्बै म्हिन् ग। ङ्योए फिर दु:ख तमा ङ्योलाइ ल्होल् त्हुबै म्हिमैं न्होंर च घ्रि ग।”✡ 2:20 लेबी २५:२५
21 स्युमिइ छबिमा रूथइ धबै बिइ, “च म्हिइ ‘ङए म्रोंर्बै जौ खुल् आखाँन् समा क्हि या ङए म्रोंमैंने बालुन् जौ खुरिद्,’ बिसि ङने बिइमुँ।”
22 नाओमीइ बिइ, “अँ ङए च्हमि, क्हि चए केब्स्योमैंने बालुन् प्रब छ्याँब तम्। अरूए म्रोंर ह्यास्याँ क्हिलाइ हौदिब धोंब लल् खाँम्।” 23 छतसि जौ नेरो गउँ खुल् आखाँन् समा रूथै या बोअजए म्रोंमैंने बालु सिलमैं खुप्रइ। छले च ह्रोंसए स्युमिने प्रे टिरिल।