7
Yeisu toinina senao geya sinumiseyeta tetelina
1 Amo dogoiyadi sikavava, Yeisu Galili goi ivanibiníbita. Kidi Diyuu adi tolovinayao Yudiya goi siipoikiki bego Yeisu sikaumate, tauna geya latuwona amoko goi ivaníbita.
2 Ego kai Diyuu ima káika Yoyou Aikanina‡ Yoyou Aikanina: Ame aikayana kidi Diyuu siguinuwe. Moe Basitáwana Aikanina mlina tukówana sikisi sikavava baige siwodugu. Moe Okotomba goi tala tamo tamo. Aikayana goi boda sina Yerusalema idi yoyou siyowóidi. Moe bego tubudiyao idi kaiyaka tutayana boi Itipita sikalave sinuwokavate. Aikayana siguinuwe bego oribe be oine adi dibayoya sinuwokavatedi. Maliyalina ainima aito goi siiuyáwana. bogina ana kebukebu.† Vin 23:42-43; Atu 16:13. 3 E tauna Yeisu ana gomanao sima silatuwoko sidigo kadi,
‘Ame dadavayana kwalāve go, kūna Yudiya bego im tovatotowanayao nakae amoko goi itoboinedi im guinuwa kuguuinuwedi sigitedi. 4 Moitamo. Geya vatau tayaamo ina guinuwa ivamoudi go, latuwona toinina valena tomota siyagoi. Neta moe guinuwayadi kuguuinuwedi, e da poyapoya liliudi matadi goi kuguinuwēdi bei sigitedi.’
5 Ana gomanaoyadi idi bóbwara nakae unana kidi woi Yeisu ana gomanao go, geya sinumiseyeta bego Tauyana Guyau. 6 E tauna Yeisu kana,
‘Yau guna tuta geya itoboineyeta bei ana amo aikayana goi. Ego komi ava tuta latuwomi moe itoboinemi kona. 7 Da poyapoya geya itoboinedita sikaolilivemi unana komi tauyadi nakae. E yau ataalavaita bego da poyapoya idi guinuwa goyogoyoidi, tauna sikaolilivegu. 8 Komi kotūko kōna Yerusalema amo aikayana manuna. Ago yau guna upa Yaubada nava geya iyatoeta, tauna geya atuko awoita moe aikayana manuna.’
9 E moe livalayadi bogina ilatuwokoidi, tauyadi sina go, iya Galili goi ikaaiyaka.
10 E tutayana Yeisu ana gomanaoyadi situko sina Yerusalema áika manuna, Yeisu nakae itaoya, ituko ina Yerusalema goi go, geya ivamamaetaleta, go sem ivatamtamumu. 11 E kidi go Diyuu adi tolovinayaoyadi áika sinaena goi Yeisu siilusale go, tomota silumadadedi sidigo kadi,
‘Amo Tauyana nako?’
12 Boda Yeisu manuna sikanasinamo. Maniyedi kadi,
‘Tauyana koroto dedevina.’
Go maniyedi kadi,
‘Geya, go sem tomota ivasulaaigidi.’
13 Go geya vatau tayaamo Tauyana manuna ikamamaétala, unana Diyuu adi tolovinayao simatooitedi.
Yeisu ina vatulúkwana Yaubada goi
ima go, tomota siikatae tetelina
ima go, tomota siikatae tetelina
14 E aikayana nauyayanaina goi Yeisu ituko ina Vada Kimaasabaina ana kali goi isiu ivaatulúkwana. 15 E tauna kidi Diyuu adi tolovinayao sikaaiyaka, Tauyana ina vatulúkwana sinove, sikainaopa kadi,
‘Amo Tauyana manakaena Gínina Kimaasabaina iyagoidoko? Tauyana ima sikuru goi geya isikuruta.’
16 E tauna iya Yeisuyana idigo kana,
‘Yau guna vatulúkwana moe geya yau toinigu guna vatulúkwana geya, go sem guna Toetuna ina vatulúkwana. 17 Avatauwa neta latuwodi Yaubada ina nuwonúwana siguinuwe, bei siyagoi guna vatulúkwana moe Yaubada goi ima gea toinigu guna nuwonúwana goi abobóbwara. 18 Avatau neta toinina ina nuwonúwana goi ibobóbwara, tauyana toinina ana taimámina manuna iitokuma. Go avatau neta ana toetuna ina taimámina manuna iitokuma, tauyana moitamo. Geya tayaamo sinapu goyo tauyana yaina goi ikaaiyaka geya. 19 Yaubada ina nuwonúwana ikaaiyaka ina Katukeda goi. Atukedayana Mosese boi nimatu tubumiyao ivinidi ae? Go moitamo geya vatau tayaamo komi yaimi goi ikabikaone. Atukedayana goi Yaubada aumata isanabode ae? Tauna kaga unana latuwomi kokaumategu?’
20 Go bodayadi kadi,
‘Ana kaigigita dimoni ikinaagovem. Avatau ipooikikim bego ikaumatem? Geya!’
21 Go iya Yeisuyana idigo kana,
‘Madabokimi kokainaopa unana yau boi Sabati goi guinuwa tayamo aguinuwe moe koroto tayamo akidedevine. 22 Kidedevina pasina iya Mosese boi nimatu sakava ana kúpwana ana lovina ivinimi. Go lovinayana Mosese goi geya imaita, go sem tubumiyao Eberamo, Aisake be Yakobo goi ima.†a Abv 17:10. Go lovinayana goi tutayana gogómana adi maliyalina ainima aitonina bogina sibabane, e sakavaidi kokupoidi.†b Vin 12:3. Go neta maliyalinayana moe Sabati goi isowóduwo, e tuwo nakae itoboinemi kokupo. 23 Sabati goi koroto sakavaina kokupo bego Yaubada ina Katukeda Mosese ivini geya kokapipilaveyeta ae? Manakae? Koegamogamoguyegu unana koroto tayamo wowona madabokina Sabati goi akidedevine? 24 Taabu tomota adi kaigigita goi kotaakinōidi bego toogoyoidi, go sem mami kivavasa goi kootakīnona.’
25 E tauna da Yerusalema maniyedi sidigo kadi,
‘Ame Tauyana siipoikiki bego sikaumate ae? 26 Go kogīta. Tomota matadi goi ikamamaétala go, ida tolovinayao geya sisaanabode. Manakae? Nakona ame Tauyana bogina sidovatusiye go, siyagoi iya moitamo Guyau, Yaubada ana Vadámana? Nakona geya, 27 go sem ame Tauyana tayagoi nako goi ima. Tutayana Guyauyana bei ima, e geya vatau tayaamo bei iyagoi nako goi ima.’
28 E tauna Yeisu nava Vada Kimaasabaina goi ikaaiyaka, niyana gagaina goi ivatulúkwana idigo kana,
‘Moitamo? Bego bogina yau koyagoigu be nakae koyagoi nako goi ama ae? Geya toinigu guna nuwonúwana goi ama geya, go sem yau guna sowóduwo moe guna Toetuna mooitamoina ina nuwonúwana goi. Tauyana komi geya koyagoiyeta 29 go, yau aayagoi unana Tauyana goi ama. Tauyana ietunegu ama.’
30 E tauna kidi tomotayadi siipoikiki bego Yeisu siyoisi go, ina kámasa ana tuta nava, tauna geya vatau tayaamo ibisikone.‡ Da Giriki niyadi goi tomwana ame geya imavadeta. Itoboineda takaigavile kada, ‘Da Yerusalemayadi siipoikiki’ o kada, ‘Diyuu adi tolovinayao.’ 31 E boda badabadaidi sidigo kadi,
‘Nakona koroto amo Guyau, Yaubada ana Vadámana ae? Unana geya vatau tayaamo itoboine aba kinana ana badabada iguinuwedi nakae amo korotoyana bogina iguuinuwedi!’
Nakae sibóbwara unana Yeisu sinumise.
32 Nakae bodayadi Yeisu manuna sikanasinamo go, kidi Parisi bogina sinovedi. Tuwo Tonúwala Gagaidi be Parisiyadi Vada Kimaasabaina adi polisi silatuwokoidi kadi,
‘Kōna Yeisu koyōisi.’
E tuwo sima Yeisu bego siyoisi 33 go, ilatuwokoidi idigo kana,
‘Nava tuta kaakupina yaimi goi bei akaaiyaka namliyeta baige akaluvilamna ana guna Toetuna yaina. 34 Bei kolusalegu go, geya kobabaneguta. Nako goi yau akaaiyaka komi geya itoboinemita koma.’† Iyo 7:36, 8:21, 13:33.
35 E tuwo kidi Diyuuyadi sidigo kadi,
‘Bei nako goi ina, e kita geya itoboinedeta tababane? Manakae? Bego ina sedao Diyuu boi bogina sigala sina Totuyoyowo idi kasa liliudi goi be Totuyoyowoyadi ivatulukoidi ae? 36 Amo tauyana kana,
“Bei kolusalegu go, geya kobabaneguta. Nako goi yau akaaiyaka komi geya itoboinemita koma.”
Go moe livalayana kaga ana yagoina?’
Yeisu ina vatulúkwana bwae maa yawoina manuna
37 E bogina aikayana ana maliyalina ana kaba lukavava go, moe maliyalinayana gagaina,‡ Maliyalinayana gagaina: Ame aikayana maliyalina ainima aiyuwo goi siguinuwe. Go maliyalina tamo tamo Tonúwala Gagaina bwae ikabi, aba kasala goi isiwoi. Bwaeyana aba kinana tayamo bego tomota sinuwaisi Yaubada manakaena boi nimatu ivanimdi tutayana yoyowo goi siketoiya besobeso. Maliyalina gagaina moe aikayana ana maliyalina vaamliyaina.† Vin 23:36. e Yeisu itaoya niyana gagaina goi idigo kana,
‘Avatauwa komi neta maemi siyápasa, kōma yaigu bei konim. 38 Avatauwa komi neta konumisegu, tauyami yaimi sákala nakae idaudau go, sakalayana moe bwae maa yawoina.† Isi 47:1; Sak 14:8. Moe nakae Gínina Kimaasabaina italavaita.’
39 E moe ina livalayana idigedige Baloma Kimaasabaina manuna. Balomayana nava bei ana tonumisayao sibabane. Yaubada ina togaga ana káeyana nava Yeisu ina kámasa be ina taoyamna goi geya ivagitakoeta,‡ Ivagitakoeta: Yaubada ina togaga ana káeyana tagite Yeisu goi tutayana ikámasa namliyeta Yaubada itukoe ina yábana. tauna Baloma Kimaasabaina nava geya imaita.
Tomota nukotodi siwówana Yeisu manuna
40 E tuwo boda yaidi goi maniyedi Yeisu ina livala amo sinove, sidigo kadi,
‘Amo Tauyana moitamo Yaubada ina tokabivalavalayana tatuuyaosi.’† Atu 18:15,18; Iyo 1:21.
41 Go maniyedi kadi,
‘Amo tauyana Guyau, Yaubada ana Vadámana!’
Go maniyedi kadi,
‘Tauyana Guyau geya. Tauyana guma Galili go, Guyauyana Galili goi bei geya imaita. 42 Gínina Kimaasabaina idigodigo bego Devida ina nunu goi Guyau bei ima be nakae Devidayana ina kasa Bedeliyema goi bei ibíbina.’† 2Sa 7:12; Mik 5:2.
43 E tauna livisi bodayadi yaidi goi isowóduwo Yeisu pasina. 44 E kidi go boda maniyedi latuwodi Tauyana siyoisi go, geya vatau tayaamo ibisikone.
Parisi geya sinumiseta Yeisu yaina tetelina
45 E kidi Vada Kimaasabaina ana polisiyao sikaluvila sima Tonúwala Gagaidi be nakae Parisi yaidi goi. Go tonuwalayadi be Parisiyadi sidigo kadi,
‘Kaga unana amo Tauyana geya komeyeta?’
46 Kidi polisiyadi kadi,
‘Geya tayaamo koroto ina bóbwara amo korotoyana nakae!’
47 E tauna kidi Parisiyadi kadi,
‘Manakae? Komi nakae bogina ivasulaigimi ae? 48 Tolovina o Parisi kai yaima goi ama taivina amo Tauyana kanumise? Geya tayaamo ae? 49 Go sem amo bodayadi sinumise unana Yaubada ina Katukeda geya siyagoiyeta. Tauna Yaubada ina lovina moumouna ikaaiyaka yaidi goi.’
50 Go iya Nikodimoyana Parisi tayamo nakae ikaaiyaka. Tauyana boi ina Yeisu yaina.† Iyo 3:1-2. E Parisiyadi ilatuwokoidi kana,
51 ‘Segowo, ida lovina Yaubada ina Katukeda goi itoboine mainao koroto tataiyakekedoko be tayagoi ava goyo iguinuwe namliyeta baige tatakino ae?’
52 Kidi tolovina be Parisi sidigo kadi,
‘Nakona kom nakae guma Galili ae? Gínina Kimaasabaina kugitedōko, bei kugite geya kada tayaamo Yaubada ina tokabivalavala Galili goi itaoya geya!’
[ 53 Tauyadi tayamo tayamo sina idi kasa.‡ Nakona Iyoni 7:53 ina 8:11 Iyoni geya iginiyeta, go sem tokaidámana tayamo toinina ina nuwonúwana igini.
‡7:2 Yoyou Aikanina: Ame aikayana kidi Diyuu siguinuwe. Moe Basitáwana Aikanina mlina tukówana sikisi sikavava baige siwodugu. Moe Okotomba goi tala tamo tamo. Aikayana goi boda sina Yerusalema idi yoyou siyowóidi. Moe bego tubudiyao idi kaiyaka tutayana boi Itipita sikalave sinuwokavate. Aikayana siguinuwe bego oribe be oine adi dibayoya sinuwokavatedi. Maliyalina ainima aito goi siiuyáwana.
†7:2 Vin 23:42-43; Atu 16:13.
†b7:22 Vin 12:3.
‡7:30 Da Giriki niyadi goi tomwana ame geya imavadeta. Itoboineda takaigavile kada, ‘Da Yerusalemayadi siipoikiki’ o kada, ‘Diyuu adi tolovinayao.’
‡7:37 Maliyalinayana gagaina: Ame aikayana maliyalina ainima aiyuwo goi siguinuwe. Go maliyalina tamo tamo Tonúwala Gagaina bwae ikabi, aba kasala goi isiwoi. Bwaeyana aba kinana tayamo bego tomota sinuwaisi Yaubada manakaena boi nimatu ivanimdi tutayana yoyowo goi siketoiya besobeso. Maliyalina gagaina moe aikayana ana maliyalina vaamliyaina.
†7:37 Vin 23:36.
†7:38 Isi 47:1; Sak 14:8.
‡7:39 Ivagitakoeta: Yaubada ina togaga ana káeyana tagite Yeisu goi tutayana ikámasa namliyeta Yaubada itukoe ina yábana.
†7:42 2Sa 7:12; Mik 5:2.
‡7:53 Nakona Iyoni 7:53 ina 8:11 Iyoni geya iginiyeta, go sem tokaidámana tayamo toinina ina nuwonúwana igini.