Vala Dedevina Paulo itaalavaite
da Galetiya goyo ina togaga goi italigeidokoidi
da Galetiya goyo ina togaga goi italigeidokoidi
5
(Galetiya 5:1—6:10)
Da Galetiya bogina taliigavidi,
tauna sakava ana kúpwana geya ivaitedita
tauna sakava ana kúpwana geya ivaitedita
1 Ada talígava manuna Guyau italigeida! Tauna koovadōkana. Geya tayaamo kaga yaina kokasalemnēimi bego ipakomneimi.
2 Konovēgu! Yau Paulo alatuwokoimi neta sakavaimi kokupoidi, Guyau ina guinuwa geya ivaitemita! 3 E komi koroto latuwomi sakavaimi ana kúpwana aiyuwoina akatumatalimneimi bego ava koroto yaimi neta sakavaina ikupo, mana tasíkwana Yaubada ina Katukeda goi lovina liliudi ikibobosidi. 4 Avatauwa komi bego Atukedayana ana guinuwa pasina Yaubada ivayokoimi komi kiboobosimi ina kanasíuna manuna, e Guyau yaina bogina toinimi kotavileiyemi. Moeko goi Yaubada ina kanuwóiya bogina kokalave. 5 Moitamo. Atukedayana ana guinuwa geya ivaitedeta niga Yaubada ina kivavasa manuna. Kita go Yaubada Balomaina ina togaga goi ida numisa pasina mada lotuta taatuyáwata bego Yaubada nava bei itakinoida kita kiboobosida ina kanasíuna manuna. 6 U moe moitamo. Avatau neta ispwagógana Guyau Yeisu taiyao, ina spwagoganayana goi sakava ana kúpwana be sakava geya ana kupwanamo, aiyuwokova dogoi besobeso Yaubada yaina, go sem dogoi gagaina Tauyana yaina moe Yeisu tanumise go, ida numisayana matakoi goi ikéuwo.
7 Numisa ana kenao vavalákuna nakae. Boi mainao vavalakunayana goi kolokooina dókana. Go avatau ilokoinabodebodemi, tauna Vala Dedevina mooitamoina geya kokabikaoneyeta? 8 Ame sinapuyana ada Toduduwo goi geya imaita! 9 Ame vatulukwana polapola bei itagayagaya be ibíbina nakae isti giyaina go, isiu ina parawa madabokina goi ibíbina.† 1Ko 5:6. 10 Guna spwagógana ida Tomoya yaina pasina alotowoimi ituli ta nuwonúwana bei geya koyoisikavateyeta. Tauyana ina tamyábina goi nukotomi ikiwoowonidi, Yaubada ina liuna bei ibabane. 11 E segowo, maniyedi topola sidigodigo bego yau nava ataalavaita tomota yaidi bego itoboinedi sakavaidi sikupoidi. Neta moe moitamo, kaga unana nava mou siivinigu? Neta moitamo atalavaita bego itoboinedi sakavaidi sikupoidi, e topolayadi gamodi geya sigoyoita, e mou geya siviniguta. Go moe yau nakae geya. Yau atalavaita bego Guyau kerose goi ikámasa, kita ada katumapu. Tauna gamodi asowolidi, e moe pasina mou sivinigu. 12 Latuwogu tauyadi nukotomi sikiwoowonidi sakavaidi kaka geya, go sem madabokiina sikupoidimo sikalavedi!
13 Guna nuwonúwana tuwaina ataligei, segowo. Yaubada bogina iduduwemi komi ina bodao be nakae ina Katukeda ina lovina goi italigeimi. Ago ami taligavayana taabu kooetāko sakava sinapuna manuna, go sem imi matakoi goi semiyao kovaitēdi. 14 Ame moitamo. Yaubada ina Katukeda goi lovina liliudi itoboineda talamgogoidi livala tayamo goi. Livalayana kana,
‘Siyami komataakoīye nakae toinimi komatakooiyemi.’† Mad 5:43, 19:19, 22:39; Mak 12:31,33; Luk 10:27; Rom 13:9; Ibe 13:1; Yem 2:8.
Vininabeso 19:18
15 Go neta komi taiyao kokaumakimaki be nakae kokausapesapemi, e ami dodōkana, govila bei toinimi komtulimi.
Da Galetiya Baloma
Kimaasabaina goi siiketōiya
Kimaasabaina goi siiketōiya
16 E yau guna nuwonúwana ame nakae: Baloma Kimaasabaina ina togaga goi kooketōiya yawoim madabokina, bei sakava sinapuna ina yalagau geya koguuinuwedi. 17 Ame moitamo. Sakava sinapuna ina yala ituli go, Yaubada Balomaina ina yala ituli, e taiyao sigibiubíuna. Bogina koyagoi. Ame yalayadi aiyuwo taiyao sivakaleya, govila bei kaga goyogoyoidi neta kooyaledi koguinuwedi.† Rom 7:15-23, 8:5-8. 18 E neta Baloma Kimaasabaina ivaakededa, Yaubada ina Katukeda geya ikaukabolideta.
19 E sakava sinapunayadi bogina tayaagoidi. Sinapuyadi ame nakae:
| • Masisi goyogoyoina | • Egamogamogu |
| • Nuwonúwana goyogoyoidi | • Tomota aditava idi yala manudi sipoisógana |
| • Sakava ana vikaiya owáowana | • Livisi |
| 20 • Yaubadayao adi sakululu | • Tavilei |
| • Méyava o bowou | 21 • Matakikiwo |
| • Vakaleya | • Aumata |
| • Aumakimaki | • Nim ginagina |
| • Vakipikipi | • Uyawana owáowana |
| • Ava sinapu ame dogoiyadi nakae. |
Boi akatumatalimi go, tuwo aiyuwoina akatumatalimneimi bego avatauwa neta dogoiyadi siguuinuwedi, e Yaubada ina kalibúbuna goi geya sisiuta.
22 E kina go Baloma Kimaasabaina keuwoina Yaubada ina bodao yaidi ame nakae:
| • Matakoi | • Mesayágana | •Aba numisa |
| • Uyáwana | • Yabobona | 23 • Sakululu |
| • Tuboina | • Sinapu dedevina | • Toinidi sikabikunuidi |
Avatau neta ame dogoiyadi iguuinuwedi, e ina sinapu dedevina toina. Ago ame sinapuyadi manudi geya tayaamo lovina ikaaiyaka Yaubada ina Katukeda goi isanabodeda bego taabu taguuinuwēdi. 24 E kita go Guyau Yeisu ina bodao, sakava sinapuna be ana vikaiya be nakae ana yalagau bogina takalavedi; moe nakae tatupatukoidi kerose goi takaumatedi.
25 Yawoida vau Balomaina Kimaasabaina goi taababane, tauna Baloma Kimasabainayana ina vakeda kiyaena tavaekūli. 26 Taabu tanuuwatūe. Nakae taabu sedao tadumwaamwainīdi be nakae taabu tamatakiikivēdi.