12
Meri Yeisu iiputumi
ina valiwoga ana katubayasi manuna tetelina
ina valiwoga ana katubayasi manuna tetelina
(Madiu 26:6-13; Maki 14:3-9)
1 E iya go Yeisuyana kai taiyao asa Eparaim kakalave. Moe nava maliyalina sikisi sikaaiyaka baige Basitáwana Aikanina siguinuwe. Asayana kakalave kana Betani. Amoko goi Lasalo ikaaiyaka, tauyana boi tokámasa yaidi goi Yeisu ikaitáoe. 2 E kama Betani goi áika siguinuwe Yeisu manuna. E Marita awoinu ikatubayasi, ivaideda go, iya Lasaloyana ikaaiyaka, Yeisu be kai taiyao liliumakova katugúguna kakakáika.
3 E iya go Meriyana† Luk 7:37-38. pútuma ma bootorina ikabi; putumayana moe nadi‡ Nadi: Ame pútuma tayamo yoina. Nadiyana lamna goi sikabi. maavadaina goi siwodugu go, ana maisa gagaina. Ikabi ikavava, Yeisu aena ikatukoisidi. Ikavava, isakululu kununa goi aenayadi isekukudi. E vada ana madabokina putumayana mainina ivakayaodei. 4 E iya Yudasa guma Keriota, tauyana tayamo tovatotówana kai taiyao go, nava bei Yeisu inuwotuluye. E idigo kana,
5 ‘Iyaa! Itoboine putumayana ikaigimone, ana maisa mani gagaina ikabi; nakae neta tala tayamo ana paisewa ana maisa. Ikaigimone ikavava, maisana ikabi, tookaidi ivinidi. Go kaga unana tauna nakae geya iguinuweyeta?’
6 Ego geya kada tauyana inuwonúwana tookaidi manudi geya, go sem tauyana tovaináwana. Mani dedeogaina irugwausi go, tomota idi mani siidodoidi maniyedi ivainaoidi. Ame pasina tauna amo nakae ibóbwara. 7 E Yudasa ibóbwara ikavava, Yeisu idigo kana,
‘Tuwo, tauyana kwalāve! Bego pútuma ame guna valiwoga ana katubayasi ana tuta manuna iivakume, guna kaba nuwokavata. 8 Kidi tookaidi tuta liliuna sikaaiyaka yaimi itoboinemi kovaaitedi. Go yau sem tuta kaakupina bei akaaiyaka yaimi.’† Atu 15:11.
9 E tuwo boda gagaina Diyuu yaidi goi vala sinove bego Yeisu Betani goi ikaaiyaka, tuwo sima go, geya kada Yeisu anetava latuwodi sigite geya, go sem latuwodi bego Lasalo nakae sigite. Tauyana boi tokámasa yaidi goi itaoyamna. 10-11 Lasaloyana ina taoyamna pasina Diyuu badabadaidi adi tolovinayao sikalavedi go, Yeisu siinumise. Tauna kidi Tonúwala Gagaidi siyupu bego Lasalo nakae sikaumate.
Yeisu tokalibúbuna nakae
Yerusalema goi isiusiu tetelina
Yerusalema goi isiusiu tetelina
(Madiu 21:1-11; Maki 11:1-11; Luke 19:28-40)
12 Vanuwo itomo, boi bodayadi gagaina simamaima Basitáwana Aikanina manuna sinove bego Yeisu imamaima Yerusalema goi. 13 Tuwo magimagi libidi sikabidi, asa goi sisowóduwo sima Tauyana sivalobode. Sima siiduduwo kadi,
‘Tauyana yoina takilagāsi!
Tauyana Yauwe yoina goi imamaima kaaipakuna!† Mad 23:39; Luk 13:35.
Tauyana kita Isileli tubunao ida Tokalibúbuna!’
Same 118:25-26
14 E Yeisu ase bonatuna ikabi, yatana goi itulaga nakae Gínina Kimaasabaina idigo kana,
Taabu kuumatōita! Gwa!
Im Tokalibúbuna ase bonatuna yatana goi
iitulaga, imamaima!’† Mad 21:5.
Sakarayau 9:9
16 Ame guinuwayadi adi yagoina kai ina tovatotowanayao boi mainao geya kayagoiyeta, go sem tutayana Yaubada ina togaga ana káeyana Yeisu ina kámasa be ina taoyamna goi ivagitakoe, e kakinane bego guinuwayadi tokabivalavala boi nimatu bogina iginidi moe Yeisu manuna. Aiyuwoina boda idi guinuwa Tauyana yaina nakae boi iginidi sisowóduwo.
17 E boda boi Yeisu sigite tutayana Lasalo tokámasa yaidi goi ikaitáoe namliyeta ina valiwoga tukubu goi iduduwe ima, e ina guinuwayana nava sitaalavaite. 18 Moe pasina kidi da Yerusalemayadi nakae sisowóduwo sima Yeisu sivalobode. Vala sinove bego ame aba kinanayana iguinuwe. 19 E kidi go Parisi taudiva sibóbwara sidigo kadi,
‘Kogīta! Geya tayaamo kaga itoboineda taguinuwe bego Tauyana tasanabode. Gwa! Tomota liliudi sinonoina latuwodi Tauyana!’
Totuyoyowo idi numisa pasina
Yeisu ina tuta isowóduwo tetelina
Yeisu ina tuta isowóduwo tetelina
20 E da Giriki‡ Da Giriki: Ame tauyadi Totuyoyowo go, Yauwe Yaubada yaina goi sisakululu. Ago geya latuwodi simaladiyuu unana Yaubada ina Katukeda goi itoboine sakavaidi sikupo go, moe odi ikai. maniyedi nakae situko sina Yerusalema bego Aikayana goi sisakululu Yaubada yaina. 21 E amo tauyadi sina Pilipo guma Betesaida yaina. Betesaidayana moe Galili ana dadava. Sina Pilipoyana yaina goi silumadádana sidigo kadi,
‘Tomoya, latuwoma Yeisu kagite.’
22 Tuwo Pilipo ina Anduru ilatuwoko. Adi taiyuwokova sima Yeisu yaina goi da Girikiyadi idi nuwonúwana silatuwoko. 23 E iya go Yeisuyana idigo kana,
‘Tomalatomota ina tuta bogina ima bego Tauyana ina kámasa goi Yaubada ina togaga ana káeyana ivagitakoe. 24 U, ina tuta bogina ima, tauna ame alatuuwokoimi konōve: Neta witi kutukutuna geya tabaguliyeta, kutukutuyana ikaaiyaka tayamo toito. Go neta isou poyapoya goi ikámasa, itabo, keuwoina gagaina bei isowóduwo. 25 Avatauwa neta yawoidi nukotodi iyoiyoi, yawoidi vata bei geya sibabaneyeta. Go avatauwa neta yawoidi poyapoya ame goi sikaaolilive, yawoidi vau bei sibabane.† Mad 10:39, 16:25; Mak 8:35; Luk 9:24, 17:33. 26 Avatauwa neta latuwodi bego yau guna tovaita, itoboine sisabokuuliyegu. Nako goi akaaiyaka, amoko goi bei guna tovaita nakae ikaaiyaka. Avatauwa neta sivaaitegu, Tamagu bei iwowooinedi.’
27 Tuwaina Yeisu kana,
‘Ame nuwogu taitáiya iuyoi.† Sam 42:5. Go bei manakaegu? Kagu,
“Tamagu, mou ame goi kuyavēgu”?
Go moe nakae geya akawanoita, go sem ama bego ame mouyana alotowo. 28 Tamagu, latuwogu kom im togaga ana káeyana kuvagitakōe.’
E níyana tayamo yábana goi iduduwo kana,
‘Bogina avagitakoe go, nava bei aiyuwoina avagitakoemnei.’
29 E kidi go bodayadi amoko goi sikaaiyaka, niyanayana sinove kadi,
‘Palapala idududu.’
Go maniyedi kadi,
‘Geya. Anerose tayamo ibóbwara Tauyana yaina.’
30 Go iya Yeisuyana idigo kana,
‘Niyanayana konovenove moe geya yau guna dedevina manuna geya, go sem moe komi ami dedevina manuna. 31 Tuta ame moe da poyapoya adi takínona ana tuta. Tuta ame Yaubada poyapoya ame ana tolovina‡ Poyapoya ame ana tolovina: Ame ida Kaleya. bei ivatapiye. 32 Go yau sem tutayana poyapoya ame goi sikailagasigu, tomota liliudi bei sima siwuwuligu.’
33 Ego moe idigedige bego ivatulukodokoidi giyakainava manakaena bei ikámasa. 34 Go kidi bodayadi sidigo kadi,
‘Yaubada ina Katukeda goi bogina kanove bego Guyau ikaiyako vata.† Sam 110:4; Ais 9:7; Isi 37:25; Dan 7:14. Kom manakae kam,
“Tomalatomota bei sikailagasi”?
Ame Tomalatomotayana avatau?’
35 Tuwo Yeisu idigo kana,
‘Tuta giyaina mavada bei yaimi goi ikaaiyaka. Go ame tuta nava ikaaiyaka; mavadayana goi koketoiyāmo, govila bei mamaníwana ikalisavemi. Go avatauwa neta mamaníwana goi siiketoiya, geya siyagoiyeta nako sinonoina. 36a Tutayana mavadayana nava ikaaiyaka yaimi, to konumiseyāmo bego komi mavada natunao nakae.’
Boda geya sinumiseta Yeisu yaina tetelina
36b Ame livalayadi Yeisu iboboredi ikavava, bodayadi ikalavedi ina ivatamtamumuyedi. 37 Go ina kaba kinana badabadaaidi iguuinuwedi bogina siigitedi go, boda nava geya sinumiseyeta. 38 Moeko goi Yaubada ina tokabivalavala Aiseya ina livala itoboine imalatomota; livalayana idigo kana,
‘Yauwe, Geya vatau tayaamo talavaita ina pakonayana manuna kanove bei inumise.
Yauwe ina togaga ikaiwoduwe ina pakonayana ina guinuwa goi.’
Aiseya 53:1
39 Geya itoboinedita sinumise unana ame: Aiseya ina livala aiyuwoina kana,
40 ‘Matadi bogina ikigawuwulidi,
nakae nukotodi isanayatoidi.
Tauna dabadi sikasa,
govila bei matadi goi sigita
be nakae nuwodi goi siyagoi,
bei situgavila,
e simekoigu akidedevinedi.’† Mad 3:15; Mak 4:12; Gui 28:27.
Aiseya 6:10
41 Ame livalayadi Aiseya idigedi unana igimigite bego Yaubada ina togaga ana káeyana Yeisu goi ikaaiyaka, tauna Yeisuyana manuna italavaita.
42 E nakona boda maniyedi geya sinumiseta go, tuwo Diyuu adi tolovinayao badabadaaidi nakae Yeisu sinumise go, Parisi pasidi geya sitalavaiteta bego sinumise, govila bei idi kaba tugúguna goi sivatapiyedi go, sisanabodedi taabu sisiusīu. 43 Moitamo. Geya sitalavaiteta. Nukotodi ikabi taimámina tomota goi go, Yaubada ina taimámina geya latuwodi.
Numisa be apipilova manudi
44 E iya go Yeisuyana niyana gagaina goi iduduwo idigo kana,
‘Avatauwa komi neta konuumisegu, e aguta geya, go sem guna Toetuna nakae koonumise. 45 Avatauwa komi neta koogitegu, e guna Toetuna kogite. 46 Yau mavada nakae ama poyapoya ame goi bego avatauwa neta sinuumisegu, kokonótuya goi geya sikaiyaketa. 47 Ago avatauwa neta guna livala sinovedi go, geya siguinuwedita, yau geya atakinoidita. Moitamo. Yau ama geya kada komi da poyapoya ami takínona manuna geya, go sem yau ama bego da poyapoyayami ayavemi. 48 Avatauwa neta sikaataegu be guna livala geya siuyaonedita, idi totakínona tayamo bogina ikaaiyaka. Idi totakinonayana moe guna livala bogina alatuwokoidi. Tuta ana kaba lukavava goi ame livalayadi bei sitakinoidi kidi toogoyoidi. 49 Yau abobóbwara geya toinigu guna nuwonúwana goi geya, go sem Tamagu guna Toetuna iya lovina ivinigu kaga nakae aabobore. Tauna guna livalayadi moe idi totakínona. 50 Ago bogina aayagoi bego Yaubada ina lovina moe yawana vata unana. E tauna kaga nakae Tamagu ilatuuwokoigu, nakae aabobore.’
‡12:3 Nadi: Ame pútuma tayamo yoina. Nadiyana lamna goi sikabi.
†12:8 Atu 15:11.
‡12:15 Saiyoni natuna: Saiyoni moe koya yoina. Koyayana moe Yerusalema goi ikaaiyaka go, tomota kadi, ‘Saiyoni.’ Moe nakae Yerusalema youyuwoina. Aiyuwoina natuna moe tomota da Yerusalema.
‡12:20 Da Giriki: Ame tauyadi Totuyoyowo go, Yauwe Yaubada yaina goi sisakululu. Ago geya latuwodi simaladiyuu unana Yaubada ina Katukeda goi itoboine sakavaidi sikupo go, moe odi ikai.
†12:25 Mad 10:39, 16:25; Mak 8:35; Luk 9:24, 17:33.
†12:27 Sam 42:5.
‡12:31 Poyapoya ame ana tolovina: Ame ida Kaleya.
†12:34 Sam 110:4; Ais 9:7; Isi 37:25; Dan 7:14.
†12:40 Mad 3:15; Mak 4:12; Gui 28:27.