43
Iyosepa senao
adi koidádana aiyuwoina tetelina
adi koidádana aiyuwoina tetelina
1 E logayana Kenani goi nava gagaina. 2 E tuwo tutayana Yakobo ma natunao idi witi boi sigiimonedi Itipita goi bogina sikanisavedi, e tamadi idigo kana,
‘Kokaluvilāmna kōna ada witi tuwaina kogimōna, e kōma.’
3 Go kina Yuda idigo kana,
‘Go tamagu, korotoyana boi ikatumatalidokoima idigo kana,
“Neta ami gómana kome yau yaigu, e bei atagona ami witi kogimona, go geya, e geya kogiteguta.”
4 Tuwo neta kutagona bego ama gómana kanave, e kana ada witi kagimona. 5 Go neta gomanayana geya kutagoneyeta, e kai geya kanoita. Bogina kuyagoi; korotoyana idigo kana,
“Neta ami gómana kome yau yaigu, e bei atagona ami witi kogimona, go geya, e geya kogiteguta.” ’
6 Go kina tamadiyana idigo kana,
‘Kaga unana korotoyana kolatuwoko kami,
“Ama gómana tayamo amoni?”
Kogite? Guna mou bogina koyato!’
Tauyadi kadi,
7 ‘Korotoyana ilumadádana ima boda manuna. Tauyana idigo kana,
“Tamami nava ikaaiyaka? Ami gómana tayamo amoni?”
Tuwo kai katalavaitamo. Ago tauyana idigo kana,
“Ami gómana kokābi, kōme.”
Ego neta kayagoi tauyana ina nuwonúwana nakae, geya katalavaiteta.’
8 E Yuda idigo kana,
‘Tamagu, kutagōna bego gomanayana kakabi kanave, e bei mainao kana kama bego kita be natudao taiyao loga geya takamaseta. 9 E yau akatótula toinigu gomanayana bei arugwausi. Tauyana yau guna puwoya. Neta ama gómana geya akaluvileyeta nakae matam goi geya ayatoeta, e yawoigu ana madabokina goi kuwowokōigu. 10 Kai bogina kakaimúmuna unana gomanayana kuvagagale. Moitamo. Neta boi mainao kutagona, e kai neta bogina sivayuwo kaketoiyako.’
11 E Isileli idigo kana,
‘Neta moe nakae, ame nakae koguinūwe. Dogoi dedevidi kita ida kasa goi sikaaiyaka nakae pútuma, mokava, alovamamaina sisina‡a Alovamamaina sisina: Isileli tubunao kadi, ‘Muro.’ Go muro alova tayamo mainina alovamamaina nakae. Alovayana sisina toinina idaudau go, mainao ikasa. E sikabi sikeli bego pauda nakae isowóduwo. be taniya‡b Taniya: Ame nakae taniya dimdim. Dimdim kadi, ‘Pistachio’ o kadi, ‘Almonds.’ kokabīdi, imi baiki goi kododōidi, e konavēdi tolovinayana kovīni. Moe ida yabobona korotoyana yaina. 12 Go imi mani tuwaina kokabīdi be nakae maniyadi boi koonavedi nakae kokabīdi taiyao konavēdi. Konuwāisi boi imi mani sivadodoimneidi imi baiki sinaena. Nakona tauyadi sibágala. 13 Ami gómana nakae kokābi, e woilīmi konāve korotoyana yaina! 14 Bei Yaubada Tokalika inuwokapisiyemi korotoyana matana goi, e bei tauyana latuwona Simion be Beniyamina italigeidi taiyao kokaluvilamna koma. Go yau sem neta natugowo ivagagaledi, bogina sitagau, e nuwogu imou.’
15 E tuwo idi yabobona be idi mani gagaina sikabidi nakae Beniyamina sikabi, e woilidi sina Itipita. Itipita goi sisiu sina Iyosepa matana goi sitaoya. 16 E Iyosepa ikandobala Beniyamina igite kidi taiyao. Tuwo ina vada ana tovakumgo ilatuwoko idigo kana,
‘Ame korotoyadi kukabīdi, kumēdi yau guna vada goi. Kumedi ikavava, kūna tayamo yoguyogu kwaumāte kuvaipōlu. Ikavava, e dine goi taiyao kakáika.’
17 E tuwo tovakumgoyana ina kaga Iyosepa ilaatuwoko, e nakae iguinuwe. Korotoyadi ikabidi, imedi Iyosepa ina vada goi. 18 E ame pasina tauna simatoita gagaina. Tuwo sidigo kadi,
‘Ida mani boi ida baiki goi sivadodoimneidi pasina simeda vada goi. Tauyana latuwona iyoisida, ilauida, e bei kita ina pakonayao go, ida ase ikabidi.’
19 Tuwo tauyadi sina vadayana totomna goi Iyosepa ina vada ana tovakumgo silatuwoko sidigo kadi,
20 ‘Tomoya e, boi kama ameko avama kagimona. 21 Ego tutayana kanonoina ima kasa manuna, e tunagu tayamo goi kawaiwasi, e ima baiki kakatupaevedi go, kai tamo tamo ima mani ma saisailidi madabokidi kagitebabanedi! Tauna maniyadi kamedi; latuwoma bego kavinimneim. 22 Go mani tuwaina kamedi latuwoma bego ama witi tuwaina kagimona. Ago geya kayagoiyeta avatau ima mani ima baiki goi idodoimneidi.’
23 E tovakumgoyana idigo kana,
‘Mani manuna taabu konuuwonūwana be nakae taabu koomatōita. Imi Yaubada, Tauyana tamami ina Yaubada, nakona imi esaesa ivinimi; imi baiki goi idodoidi. Boi mainao imi mani komedi bogina akabidi.’
Ibóbwara ikavava, ina Simion ikabi, ime kidi yaidi. 24 Ikavava, Iyosepa ina vada ikatupáeve korotoyadi sisiu go, bwae ivinidi bei aedi sinikidi. Ivinidi ikavava, ina idi ase ivavanidi. 25 E korotoyadi idi yabobona Iyosepa ina sowóduwo dine manuna sikatubayasi. Bogina kuyagoi, livala sinove bego taiyao sikáika.
26 E Iyosepa ima, idi yabobonayadi maine simemedi sivini go, tauyana matana goi aedi sivatugúyala. 27 E idigo kana,
‘Manakae? Dedevimi? Go tamami, tauyana dedevina? Nava ikaaiyaka ae?’
28 ‘Tamama, tauyana im pákwana, nava ikaaiyaka dedevina’, tauyadi kaedi.
Sibóbwara ikavava, aiyuwoina madi wowoina aedi sivatugúyala tauyana yaina.
29 E tauyana imatavilavila go, ana gómana Beniyamina igite, tauyana toinina sinana natuna, tuwo idigo kana,
‘Ame tauyana ami gómana ae? Boi kovateteli ae?’
Ego Beniyamina ilatuwoko kana,
‘Natugu, Yaubada bei ikanuwoiyem.’
30 E woilina vada goi isowóduwo. Tutayana Beniyamina igite, e ina lotówana ana gómana manuna ivakaigaga, latuwona bego itáiya, tuwo isiu ina vabodaupa tayamo goi itáiya. 31 Itáiya ikavava, mataiuna iniki. Ina lotówana itoto go, ina pakonayao ilatuwokoidi idigo kana,
‘Avama kovaidēde.’
32 Tuwo awoinu sivaidede go, Iyosepa aneta ikaaiyaka, senao nakae aditava. Maniyedi da Itipita sikaaiyaka go, kidi nakae aditava. Bogina kuyagoi; kidi da Itipita geya itoboinedita kidi Iberiu taiyao sikáika. Moitamo. Moe sinuwomoláita. 33 E Iyosepa matana goi tuwowonao siitusobu go, ilovina bego idi tusobuyana moe adi bíbina goi. Botomoya isou ina bogomane. Siitusobu go, kidi simatavilavila nukotodi iwówana kadi,
‘Manakaena iyagoida ada bíbina?’
34 E Iyosepa toinina avana dedevina ikinavedi, ina pakonayao ilatuwokoidi sikabidi, korotoyadi sivinidi. Tuwo koroto tamo tamo noko tayamo go, awoinu gagaina Beniyamina ivini, nakae ana noko ainima. E tuwo sikáika, sinim siuyáwana Iyosepa taiyao.