1 Ga dhiyakuyina märrwu ŋarra Bolyu yukurra bukumirriyamanydja nhumalaŋgu mulku'-mulkuruwunydja. Ŋarranydja dhuwala dhiyalami ḻoḻuŋura gärri yukurra, yurru walala nherraranydja dhipala ŋarranha ḻoḻulilinydja, liŋgu bitjan liŋgu ŋarra ŋuli ḻakarama yukurra nhumalaŋgala, ŋunhi Godthunydja walŋakuma ŋuli yukurra nhumalanha mulku'-mulkurunha, rrambaŋikuma ŋuli walalanha Djuwsnha. 2 Liŋgu muka nhuma ŋäkula ŋarranha ŋiniya? Godtja wirrki yukurra mel-wuyun ŋarrakunydja, bala ŋayi ŋarranhanydja djarr'yurruna, bala nherrara dhuwalayi dhäwuny'tja ŋarrakalana djäkalili, märr yurru ŋarra ḻakarama yukurra nhumalaŋguna mulku'-mulkuruwuna. 3-4 Ŋäthilinydja yolŋu'-yulŋuyu ŋuli guyaŋinya yukurranha yanapi Godtja ŋuli yukirri märr-ŋamathi ŋuruku yana Djuwsku walalaŋgu, yurru ŋarrakalanydja ŋayi maḻŋ'maraŋalana dhuwalayina dhäwu' ŋunhi ŋäthilinydja yukurrana be djuḻuḻ'yurruna ŋorrana; ŋayi yurru walŋakumayi nhumalanha mulku'-mulkurunhanydja ŋuliwitjan yana Djesu-Christkala, dhuwalayi ŋayi milkuŋalanydja ŋarrakala warraŋulkuŋalanydja. Liŋguna ŋarra wukirrinydja dhuwalayi dhäwu' dhipala djorra'lilinydja, yurru gurririkuŋalana bitjarrana yana. Ŋunhi nhuma yurru dhuwalayi nhämanydja djorra'nha maŋutji-ḻaw'maramanydja, bala nhuma yurru dharaŋanna yana, ŋunhi ŋarranydja yuwalk yana marŋgi dhiyakuyi dhäwu'wu, ŋunhi ŋayipi Godthu Gunhu'yu maḻŋ'maraŋala ŋarrakala warraŋulkuŋala ŋuruku yolŋu'-yulŋuwu. 5 Ŋilimurruŋgu ŋunhi märi'munydja walala yaka marŋgi dhiyakuyi dhäwu'wu, liŋgu yaka ŋayi Godthu maḻŋ'maraŋala warraŋulkuŋala ŋula yolkala ŋäthilinydja, yurru dhiyaŋunydja-wala ŋayi liŋguna maḻŋ'maraŋalana ŋuliyina nhanukiyingalaŋuwala dhäwu'-ḻakaranharamirriwala ga bo'puyŋuwalana walalaŋgala, liŋgu walalaŋgalana ŋayi maḻŋ'maraŋalanydja nhanukalay ŋuriŋi Birrimbirryunydja. 6 Ga dhuwalana ŋayi ḻakaraŋala warraŋulkuŋalanydja walalaŋgala gam': Nhumanydja mulku'-mulkuru yolŋu'-yulŋu Gunhu'wu Godku yolŋu walala, rrambaŋina nhuma Djuwskala; dhuwalayi maṉḏa nhuma waŋganynha yana miṯtji, liŋgu Godthu nhumalanha mulku'-mulkurunhanydja dhambay-manapara rrambaŋikuŋalana Djuwskalana, bala ŋuliwitjan Djesu-Christkalaŋukurru nhuma yurru rrambaŋiyirri yana märrama ŋunhinha nhänha malaŋunha ŋunhi Godthu dhawu'mirriyaŋala Djuwsku, rrambaŋina nhuma yurru märrma'yirrina nhinanydja yukurra ŋunhala Godkalanydja wäŋaŋura, waŋganynha miṯtji, liŋgu nhuma märraŋala ŋunhiyi bili waŋganynha dhäwu'nha Djesu-Christnha.

7 Yo, Godtja ŋarrakalaŋumirri ŋayaŋumirri yana, bala ŋayi djäma yuṯakuŋalana ŋarranhanydja ŋayaŋu ŋuriŋiyina nhanukalaynha ŋayi ganydjarryu, bala nherraranydja dhuwalayi dhäwu' ŋarrakalana djäkalili. 8 Ŋarranydja dhuwala ŋarrapinydja wal'ŋu yaka ŋula dharrpal yolŋu, yaka ŋarra bathala wal'ŋu. Ŋarranydja dhuwala dhuḏiŋuna wal'ŋu yolŋu Godkalaŋumirriwalanydja ŋurikala yolŋu'-yulŋuwala. Yurru Godtja ŋarraku mel-wuyurruna warray, bala ŋayi djuy'yurruna ŋarranhanydja nhumalaŋgala mulku'-mulkuruwalana; ŋarra yurru ḻakarama Christnha nhumalaŋguna, märr yurru nhumanydja marŋgiyirri nhanukalaŋuwu nhäku malaŋuwu ŋunhi mirithirri wal'ŋu dhika ḻatju'mirri ga biyapulnha wakin dhika wal'ŋu, gulkuru dhawar'maranharamirrina. 9 Ŋäthilinydja dhuwalayi dhäwu' yukurrana ŋorrana djuḻuḻ'yurruna, yaka ŋula waŋgany yolŋu marŋginydja dhiyakuyi, God yana ŋayipi waŋgany marŋginydja, ŋunhiyi ŋunhi ŋayi djäma bukmak nhä malanha. Yurru djuy'yurrunanydja ŋayi ŋarranhana dhiyakuyi ḻakaranharawunydja, ŋarra yurru ḻakarama warraŋulkumana yolŋu'-yulŋuwala bukmakkalana, 10 märr yurru Godkalaŋumirriwalanydja miṯtjiwala bukmaknha marŋgiyirri yurru, ŋunhiyi ŋunhi walala be ganydjarr-ḏilkurru wal'ŋu ŋurruŋumirri nhina yukurra waŋarr wal'ŋu be garrwar. Liŋgu bukmakthirri ŋunhi yurru marŋgiyirrinydja Godku, ŋunhi ŋayinydja biyapul wal'ŋu marŋgi ḻiya-djambatj, ga ŋuliwitjan nhanukiyingalaŋukurru guyaŋinyarakurrunydja ŋayi ŋuli djäma biyapulnha ḻatju'mirrinydja dhika wal'ŋu dhapirrkmirrinydja. 11 Liŋgu ŋunhala ŋurruŋuranydja gal'ŋu Godthu ŋayipi nherrara dhukarrnydja, nhä yurru maḻŋ'thun ŋunhala bala wal'ŋu; waŋgany yana dhukarrnydja ŋayi ŋunhi gurrunhara bukmakku yolŋu'-yulŋuwu, balanyara gam': Yaka dhuwala ŋamakurru' yolŋuwu walalaŋgu, walala yurru yukurra nhina gäna'-gana miṯtji, barrkuwatjthirri yana ŋarrakala. Ŋarranydja yurru walalanha walŋakuma, bala waŋgany-manapanna ḻuŋ'maramana bitjan ḻundukumana ŋuliwitjan Djesu-Christkalaŋukurruna. Ga yuwalkthi dhuwalayi maḻŋ'thurrunanydja ŋilimurruŋgalayŋuwala Garraywala. 12 Ga ŋunhi ŋali yurru märr-nherraṉmirri Christkalanydja, ŋalinydja yurru marrtji galkithirrina Godkala barrarimiriwnha ga rum'rumdhunamiriwnha, bili dhärranydja ŋali yukurra yurru gumurrŋura nhanukala, rrambaŋina yana dhambay Christkalana. 13 Yaka nhumanydja warwuyurra ŋarraku dhipala ḻoḻulilinydja, ŋunhi ŋarra yukurra burakirri ŋayaŋu-yätjthirri dhuwala, märr yurru nhumanydja walŋathirri nhina, liŋgu balakurruyinydja ŋarrakalanydja batjpatjtjunarayu, Godthu yukurra nhumalanha waŋgany-manapan ḻuŋ'marama nhanukalaynha ŋayi wapmarama ḻatju'lilina wal'ŋu.

14 Yo, Godthu walŋakuŋala nhumalanha mulku'-mulkurunhanydja ŋuliwitjarra Djesu-Christkalaŋukurruna, rrambaŋikuŋalana nhumalanha Djuwsnhana, ga dhiyakuyina ŋayaŋuwu ŋarra ŋuli bun'kumu-djipthundja, bala bukumirriyama Godkala Bäpawalanydja, 15 liŋgu birrka'mirri bäpurruny'tja ga miṯtjinydja yäku-nherraṉaranydja Gunhu'wuŋu yana. Ŋayinydja ŋunhiyi Godtja bäpa'mirriŋu bukmakku yana miṯtjiwu, liŋgu bukmak bäpurru' dhiyalami munatha'ŋura ga ŋunha djiwarr'ŋura dhawaṯthurruna ŋulaŋuru nhanukala Gunhu'wala, nhanukuŋu yana djämawuy. 16 Bala ŋarra ŋuli ŋäŋ'thundja ŋanya Godnha, märr ŋayi yurru nhumalanha gunganhamirriyama nhanukalay ŋayi djeŋarra'yunydja djarraṯawun'thu, ga wekama nhä ŋamakurru' nhumalaŋgu ŋunhi ŋayi yukurra ŋayathama biyapul wal'ŋu buku-yattjatkunhara ŋunha, märr ŋayina yurru nhuna ganydjarrmirriyama ŋayaŋunydja ŋunha, ŋuliwitjan nhanukalay Birrimbirryu ŋunhi ŋayi yukurra dhuwali nhina ŋayaŋuŋura nhokala. 17 Ŋarranydja ḏukṯuk nhe yurru yuwalkkuma yana märr-nherraṉmirri nhanukala, märr yurru Christ ŋayipi nhina yukurra dhuwali nhokala ŋayaŋuŋuranydja, märr yurru nhe dhärra wuṉḏaŋarr yana märr-ŋamathinyaraŋura, bitjan ŋuli dharpa ŋunhi yuṯuŋgurr ṉiṉ'-ṉiṉdhun ŋunhawala wal'ŋu munatha'lili djinawa'lili. 18 Bitjandhi ŋarra ŋuli ŋäŋ'thundja, märr yurru nhuma, rrambaŋi yana bukmak Godkunydja yolŋu walala yuwalkkuma yana marŋgiyirri Christkalaŋunydja märr-ŋamathinyarawu, nhä ŋunhi biyapul wal'ŋu be-wala bathala, ga ŋunha garrwar wal'ŋu be-wala, ga be-wala ŋunha ŋoyŋura. 19 Yo, nhanŋunydja märr-ŋamathinyara Christkunydja biyapul warray wal'ŋu, dhawar'yunamiriw warray, yakana yurru ŋula yol dhawar'yun ŋurikiyinydja marŋgithinyarawu. Yurru ŋarranydja ḏukṯuk nhuma yurru yukurra marŋgithirri biyapul wal'ŋu ŋayaŋu ŋunha nhuŋu, märr yurru ŋayaŋunydja nhuŋu dhaŋaŋdhirrina wal'ŋu biyapul'nha Godkala nhanukiyingalaynha walŋayu, bukmakthu yana.

20 Gul' ŋilimurru wokthunna nhanŋu Godku, liŋgu ŋayinydja dhuwala biyapul warray wal'ŋu ganydjarr-ḏumurru, ga djämanydja ŋayi yurru birrka'mirri yana. Ŋilimurruŋgunydja dhuwala guyaŋinyara yutjuwaḻa' warray, ga ŋäŋ'thundja ŋilimurru ŋuli yutjuwaḻa'wu warray, yurru Godthunydja yurru wekama biyapulnha wal'ŋu ŋurikala ŋunhi ŋilimurru ŋuli nhäku ŋäŋ'thun, ga djäma ŋayi yurru yukurra be-warray-wala, birrŋ'marama warray yurru ŋilimurruŋguŋunydja guyaŋinyara, ŋuriŋi liŋgu ganydjarryunydja ŋunhi ŋuli yukurra djäma dhika ŋayaŋuŋura ŋilimurruŋgala. 21 Yo, ŋayinydja ŋunhi Godtja yuwalkkuma yana ḻatju' dhika wal'ŋu, ga djeŋarra' dhika wal'ŋu ŋayi, ga nhinanydja ŋayi yukurra dhuwala ŋayaŋuŋura ŋilimurruŋgala Garraywalaŋumirriwalana yolŋu'-yulŋuwala, märr yurru bukmakthuna ŋula nhämunha'yu nhämanydja, bala wokthun yurru nhanukalaŋuwu ŋunhi djeŋarra'wunydja. Ga bitjandhi liŋgu walala yurru nhämayi Godku ŋunhi djeŋarra' ŋunhiwalayina Garraywala Djesu-Christkalana, gupaḏalnha-wala yurru. Yo yuwalk muka.