1 Ena kal iru kanigire pare, angel sui sui gariba gul ulin sui sui dungwa gul mile geril bomai te kobil kuman kamin gwi ta maakinama dire, si pere di milemue. Gwi maare gariba gul te pirin nil te eri si ku tekenama dire, si pere di milemue. Iru ere milungwa kaniwe. 2 Kanere te kobil kamin angel ta mile ungwa kaniwe. God kwi milungwal milungwa ibal kobe yalini gawliman milama di ibal iru pirama dire, angel iray ibalin kobi gain mina kal ta bile terala dire, kal ta aa tomue. Angel sui sui gariba te pirin nil i sutaw erama dire, God yobilaan iru pai angel kobi tongwa, angel ta gala dire ka iru di angel sui sui iray tomue. 3 Di tere ka iru dungwa, “Goma God nil konagi ibal maabin mina gain bilabingire pare, eme gariba gul te pirin nil te eri i sutaw eranwa. Eranba malia taw suul mile kane milo.” 4 Ibal maabin mina gain bile erangwa mere, ka dungwa piriwe. Isirel nen kobe gawliman anan kole kole muru kawnan milin sutan milungwa suna ibal binanwenbile, wan kandret poti po tausen, gain mina kal ta bile tenamue. 5 Yuda gawliman kobe tausen anan kole kole muru kawnan milin sutan gain mina bile terere, te Uruben gawliman kobe tausen anan kole kole muru kawnan milin sutan gain mina bile terere, te Gat gawliman kobe tausen anan kole kole muru kawnan milin sutan gain mina bile terere, 6 te Asa gawliman kobe tausen anan kole kole muru kawnan milin sutan gain mina bile terere, te Napalai gawliman kobe tausen anan kole kole muru kawnan milin sutan gain mina bile terere, te Manasa gawliman kobe tausen anan kole kole muru kawnan milin sutan gain mina bile terere, 7 te Simion gawliman kobe tausen anan kole kole muru kawnan milin sutan gain mina bile terere, te Ilibai gawliman kobe tausen anan kole kole muru kawnan milin sutan gain mina bile terere, te Isaka gawliman kobe tausen anan kole kole muru kawnan milin sutan gain mina bile terere, 8 te Sebulan gawliman kobe tausen anan kole kole muru kawnan milin sutan gain mina bile terere, te Yosepe gawliman kobe tausen anan kole kole muru kawnan milin sutan gain mina bile terere, te Bensamin gawliman kobe tausen anan kole kole muru kawnan milin sutan gain mina bile terere, te angel iray Isirel ibal iru gain mina bile tomue.

9 Ena kal iru kanigire pare, na kwi kanere ibal binanwenbile kaniwe. Kaniga mere ibal keramba, kere kuunin ta erekinamue. Te ibal kan diga iwe, gariba gul kuru kama ta ta para ibal taw u milungure, te gawlima ta ta para ibal taw u milungure, te gariba bilin ta ta para ibal taw u milungure, te ka kowa more more paangwa para muru ibal taw u milungure, te ibalin kobi mile kenin ere ke milungwa bol te Bolima Siipe Siipe Gawlin guman mina ale milere, galsuna pege sigi dire simil nima arin bale aa te milemue. 10 Milere gala bil dire ka iru dungwa,

13 Ena yal singaba milungwa kobi yal ta ka iru sirin bile na tongwa, “Galsuna pege sigi dungwa ibal kobi ibena mileme? Alde ibal u mileme? 14 Dungure na mile, “Singabo, i inin pirinwa,” digire yalini ka iru di na tongwa, “Ibal taalime gain giil bilkaw pire ibalin kobi tongure, ibalin kobi u milemua. Bolima Siipe Siipe Gawlin mayan ali ibalin kobi galsuna bigin sungwa, galsuna iray u pege wen ongure ibalin kobi sigare kule u wai omua. 15 Iru ere milemia, ena ibalin kobe God kenin ere ke milungwa bol guman kol mile, girungwa taangwa God milungwa ain nil konagi ere te milemua. Kenin ere ke milungwa bol amin di milungwa yal, ibalin kobi i mun waare milemua. 16 Ibalin kobi kwi komina kenan ta gulekire, te nil kwi ta gulekinamua. Te are dongwa ibalin kobi kwi ta dekenangure, te kalkan nega wen dungwa ibalin kobi gain kwi ta dekenamua. 17 Ibalin kobi iru ere milangwa main iwe. Kenin ere ke milungwa ain suna Bolima Siipe Siipe Gawlin, Yesu Kirisito, milere ibalin kobi kenin ere terere nil gibilin bilungwa gul awli namua. Nil iray nenangwa, nil gulungwa kwi ta gulekire mile painangwal painamua. Ibalin kobi kay miingwa God miriin pire omilin duul kire di ere tenangwa, kay miingwa kwi ta miikinamua.”