53
Azid Aeng Zaget Pam
1 ⌊Prropeta⌋ bóktan yalkomólóp wagó,
“Ki ne bóktan büdrrat kwarilnürrü, ia nótó kuri amkoman yangune?
Ia ⌊Lod⌋ tóba arüng noaka kuri okaka simzazile? Zon 12:38; Rrom 10:16
2 Ene wa Lodón ubi yarilürr wa, oya zaget pama dódórr baine kari nugup kumabzan oya obzek kwata,
wamaka simkündügab kuba amtómólda mólóg tüpdü.
Oyaka darrü morroal obzek ó amerr zyón babul yarilürr mibü ngakanóm oya.
Oya büban obzek morroal koke yarilürr, mi ubi bainüm oyaka.
3 Pamkolpama oya koke ok inóp a i ma oya alzizi amaiknónóp,
wa wirri azid aengórr, akó wa azid aengbóka umul yarilürr.
Wa inzan olom yarilürr, pamkolpama tibiób obzek noakagabi nalüngóp.
Pamkolpama oya alzizi amaiknónóp akó mi oya morroal koke yangónóp.
4 “Anda, mibü blaman azid wa tüób bamselórr
akó wa azid aengórr mibü pabodó.
A mi igó gyagüpi ogobnórró wagó, oya azid aeng wata God wató sekyanórr tóba kolae tonarran darrem apadóm. Metyu 8:17
5 A ene mibü gida amgünanbókamde, oya gaopükü emkalnóp óeande,
oya bidame emkalnóp, mi ne kolae tonarr tómbapónónóp.
Oyaka ne ⌊kolaean darrem⌋ yamselnóp, mibüka paud sidódürr;
oya sosoanme mi dólóng bairrünakla.
6 Mi blaman apól kwarilnürrü, bamrükürrün ⌊sipzan⌋,
mi blamana mibiób ubi kwata bagólnórró.
Da Lod mibü kolae tonarr oyaka yamselórr,
ene kolaean darrem mi ne kla ki ipüdórre. 1 Pita 2:25
7 Oya kari kolae amkal koke emkalnóp, a wa wata piküp yarilürr,
wa darrü poko kokean bóktanórr.
Oya sip kupozan idüdóp bódabón pokodó.
Sipazan zamngólda bóktan-koke, ngüin alük paman obzek kwata,
wa darrü poko kokean bóktanórr. Apostolab Tórrmen 8:32-33; Okaka Amzazirrün Kla 5:6
8 Oya amiógdi akó zaz aindi, oya we idüdóp büdülüm.
Darrü oloma gyaur koke esenórr,
oya ne arról itülóp.
Wa kolae tonarran darrem ipadórr mibü pamkolpamab kolae tonarrabme.
9 Oya gapókdó ingrinóp kolae tonarr pampükü,
oya gapók ilüngóp mórrel pam ne gapók balüngdako,
enana wa darrü kolae kokean tónggapónórr,
akó darrü pam babula ilklió bülión bóktan nótó arrkrrurr oya ulitüdügab. 1 Pita 2:22
10 “A ene Lodón ubi yarilürr oya amkalóm bidame akó oya azidan ngitanóm.
Oya büdül sab ⌊urdü agasil larzan⌋ yarile kolae tonarr barrgonóm.
Olgabi wa sab tóba olmalbobatal nóserre; wa sab wirri kokrrap ngyabene,
akó oyabókamde Lodón ubia sab amkoman tómbapóne.
11 Azid aeng kakóm, wa sab morroal ngyaben yarile.
Wa sab umul yarile wagó, wa küp-koke pokodó koke azid aengórr.
Lod bóktanda wagó, ‘Kürü dümdüm zaget pama sab abün pamkolpamab kolae tonarr bamsele
akó oyabókamde, ka sab ibü ⌊dümdüm tonarr⌋ pamkolpamóm ninünümo.
12 We ngarkwatódó, ka sab oya wirri ngi mórran poko ekyeno,
ka sab oya mórran poko ekyeno arüng pampükü.
Zitülkus módóga, wa tóba arról ekyanórr akó nurrótókórr,
akó oya igó ngakónóp wagó, wa gida amgün pama.
Wa abün pamkolpamab gida amgün bamselórr
akó wa kürüka tóre ugósüm ekorr, ka ibü kolae tonarr iade ki amóna.’ ”