Wialómórrón Peba Mórrag
Ibrru
Pamkolpamdó
Ngaensingül Bóktan
Mi taiwan umul-kókakla ini peba mórrag nótó wialómórr. Ngaensingül ne wata blakónórr, abün pamkolpama igó gyagüpi ogoblórr wamaka Pol wialómórr, a mi tai umul-kókakla. Mi ta akó umul-kókakla nólgab wialómórr. Aprrapórr pail 70 küsil nóma yarilürr Kerrison amtómól kakóm, singül kwata wialómórróna, zitülkus ene paildü ⌊Godón Gyabi Müót⌋ Zerrusalem wirri basirrdü kolae inóp.
Ibrru ne ngie, ⌊Zu pamkolpamab⌋ darrü ngia. Ini peba mórrag wialómórr ene Zu pamkolpamdó Kerrison amkoman angun pamkolpam nidi kwarilürr. Ngibürr ini Ibrru pamkolpama bólenóp Yesun mamoanóm, ama akó Zu pamkolpamab gida mamoanóm kain kwarilürr. We ngarkwatódó, wibalóm oloma ini peba mórrag wialómórr. Wa igó müsirrga ainda wa, Yesu wirriana ⌊anerrudügab⌋, Moses, akó ⌊singüldü prrist⌋. Akó wa igó wialómda, Yesun büdül wata amkoman darrpan kwat módóga kolae tonarr barrgonóm. Wa akó atang pamkolpam arüng bütanda Yesun metat amkoman angunüm, enana ngibürr pamkolpama ibü müp alióndako.
Ini Peba Mórragan Bóktan Zono Módógako:
A. Ini peba mórragan tapaku bóktan: God tóbtanórr tóba Olomdóma 1:1-4
B. Godón Olom wirriana anerrudügabi, da mi wata Godón bóktan arrkrru kwarilo, akó wa gaodóma mibü zid bainüm 1:5–2:18
1. Godón Olom wirriana anerrudügab 1:5-14
2. Mi tai arrkrru kwarilo God ne poko bóktanda 2:1-4
3. Godón Oloma pamakanóm bainürr mibü zid bainüm 2:5-18
C. Yesu wirriana Moseskagabi, da oya bóktan alzizi amaikgu, igósüm mi amkoman ngón bagón bwóbdü barrbuno 3:1–4:13
1. Yesu wirriana Moseskagabi 3:1-6
2. Yesun bóktan alzizi amaikgu 3:7-19
3. Amkoman ngón bagón Godón pamkolpamabkü 4:1-13
D. Singüldü Prrist Yesu 4:14–10:18
1. Yesu Kerriso Singüldü Wirrian Prrista 4:14-16
2. God Yesun mibü Singüldü Prristüm ingrinürr 5:1-10
3. Mi koke bólerre Yesun amkoman angunüm 5:11–6:12
4. God blaman tonarrdó tómbapónda, wa alkamül-koke bóktan ne kla angrinda 6:13-20
5. Prrist Melkizedek 7:1-10
6. Yesu Melkizedekzana 7:11-19
7. Singüldü Prrist, metat nótó ngyabenda 7:20-28
8. Yesu küsil alkamül-koke tónggapórrón bóktanan Singüldü Prrista 8:1-13
E. Kerriso kómal urdü agasil lara küsil alkamül-koke tónggapórrón bóktandó 9:1-18
1. Tüpdü Godón gyabi Palae Müótüdü ótók kwat 9:1-10
2. Kerrison óe kómalana larab óedógabi 9:11-14
3. Kerrison büdüla Godón küsil alkamül-koke tónggapórrón bóktan popadan syónürr 9:15-22
4. Kerriso tóba büb gyaur klamzan idódürr kolae tonarr amanóm wata darrpanóm 9:23-28
5. Kerriso kómal urdü agasil lara 10:1-18
F. Mi metat amkoman bangun kwarilo, ngaen Godón kolpamzan, akó mi Godón dümdüm atan azeb kwarilo 10:19–12:29
1. Mi koke bólerre Kerrison amkoman angunüm 10:19-39
2. Godón kolpam wirri amkoman bangun nidi okaka amzazil kwarilürr ngaen 11:1-40
3. God dümdüm atanda tóba olmal 12:1-29
G. Dómdóm arüng bóktan 13:1-19
H. Dómdóm alakón bóktan 13:20-25
1
Ini Peba Mórragan Tapaku Bóktan: God Tóptanórr Tóba Olomdóma
1 Ngaen-ngaen, God mibü abalbobataldó tóptalórr ⌊prropetódóma⌋ abün-abün tonarrdó akó abün-abün kwata. 2 A ini dómdóm ngürrdü, wa mibüka bóktanórr tóba Olomdóma, wa tüpdü nóma ngyabelórr. God oya ngaen ingrinürr blaman elklaza tóba-tóba bainüm dómdóm pokodó, akó ene oyakama yarilürr, wa pülpül akó tüp we tólnaelórr akó blaman elklaza ibüka ne klamko. 3 Godón ⌊wirri kómal zyóna⌋ oyaka ongang bapónda, akó wa wazana blaman kwata. Wa tomkompükü bóktanda, akó ini kwata wa blaman elklaza zürük amorranda. Wa kwat nóma tónggapónórr pamkolpamabkü, tibiób kolae tonarr barrgonóm, ene kakóm, wa Wirri Arüng Godón tutul tangdó mórranórr kwitüdü.* tutul tangdó mórranórr, oya küp módóga: wirri pabo ipadórr. 4 Ene igó poko okaka amzazilda, God ma oya wirrian yónürr ⌊anerrudügab⌋. Wata ene ngizane, God ne kla ekyanórr, ama wirriana ibü ngidügab.
Godón Olom Wirriana Anerrudügab
5 Mi umulakla Godón Olom wirriana anerrudügab, zitülkus God kokean bóktanórr tóba anerrudü, wa oyaka ne poko bóktanórr, tóba Wialómórrón Bóktanzan wialómórróna wagó,
“Ma kürü Olomla;
ini ngürr ka pamkolpam bómtyandóla igó wagó, ka marü Abla.” Wórr Peba 2:7
Akó wa kokean bóktanórr tóba anerrudü, wa Olomdó ne poko bóktanórr wagó,
“Ka sab oya Ab namulo,
ó wa sab kürü Olom yarile.” 2 Samuel 7:14; 1 Krronikol 17:13
6 Akó darrü poko, God tóba ngaen Olom† ngaen olom: Ene tonarrdó ngaen olom wirrian yarilürr oya zoretaldógabi. nóma zirrsapónórr ini tüpdü, wa bóktanórr wagó,
“Godón blaman anerrua sab oya ki ⌊ótók⌋ kwarilün.”
7 God go tóba anerrubóka nóma apónda, wa bóktanda wagó, “Wa ene anerru, tóba popa zaget pam, igó zirrbapónda wór akó ur ulitzan.” Wórr Peba 104:4 8 A God go tóba Olombóka nóma apónda, wa bóktanda wagó,
“Godóe, ma sab metat-metat balngomól namulo Kingzan,
akó ma sab moba pamkolpam ⌊dümdüm tonarre⌋ balngomól namulo.
9 Marü ubi yarilürr, dümdüm tonarr ne klamko, akó ma alzizi aman namülnürrü gida ngarkwatódó koke ne kla kwarilürr.
We ngarkwatódó, God, marü God marü we müngrinürr wirri ngi bainüm moba kamdaldógab; wa marü müngrinürr akó bagürwóman ngimtanórr.” Wórr Peba 45:6, 7
10 Akó God ta bóktanórr, tóba Bukdüzan wialómórróna, wagó,
“Ngaen bwób zitüldü, mató ⌊Lod⌋, ma tüp we tónggapórró,
akó ene mató namülnürrü, pülpül nótó tónggapónórr.
11 I sab blakóni, a ma sab metat namulo;
i sab blamana praka bairre, mórrkenyórr pokoazan kainda.
12 Ma sab igó nórrngómnónómo, wamaka ma tumum mórrkenyórr arrngamla,
ma sab igó simbrutnünümo, wamaka pama ngaep mórrkenyórr poko aninda ama küsil poko batenda.
A ma wata metat enezanla,
akó marü arróla sab kokean blakóne.” Wórr Peba 102:25-27
13 God darrü anerrudü kokean bóktanórr igó,
“Ma ae mórra, kürü tutul tangdó,
kókó sab marüka nidi bóka bamgündako,
ka sab ibü inzan ninünümo, marü wapór nisab ngón ngagón klamóm.”‡ Ini bóktanan küp módóga: marüka bóka bamgün is nidipko, ka sab blaman ⌊ut-ut ninünümo⌋ marünkü. Wórr Peba 110:1
14 Da anerru ia tai larógako? I samuako, Godónkü nidi zagetódako, akó ibü wató zirrtapónóp ene pamkolpamdó, sab nibiób zid nirre, ibü tangbamtinüm.
*1:3 tutul tangdó mórranórr, oya küp módóga: wirri pabo ipadórr.
1:5 Wórr Peba 2:7
1:5 2 Samuel 7:14; 1 Krronikol 17:13
†1:6 ngaen olom: Ene tonarrdó ngaen olom wirrian yarilürr oya zoretaldógabi.
1:7 Wórr Peba 104:4
1:9 Wórr Peba 45:6, 7
1:12 Wórr Peba 102:25-27
‡1:13 Ini bóktanan küp módóga: marüka bóka bamgün is nidipko, ka sab blaman ⌊ut-ut ninünümo⌋ marünkü.