11
God, Israel damsi ivi kamyuyuwesi.
1 Aku vitarakiiyana na weni. God ina wawaya na Israel damsi ma ibaresi bo? Kegha taweyana! Taku na Israel wawaya ma Abraham tupurereghina. Taku na Benjamin kana dam kamonai. Ma God ke ita bareku.* Plp 3:5 2 Mara katamaninai God tuna mani Israel ivinesi da ina wawaya ma ke ita baresi. Giruma katamana konotai. Israel damsi i bera kubiine na peroveta Elaidiya ina weno God kurina iterei, ivona bo, 3 “Bada, am peroperoveta ivi kiivunuwana ma am suwara kana kapukapuna kemasi ivi kiirikeyana. Ina kiku kava yawayawaku ma ipaparana da taku bade ina kiivunuku.”* 1Kgs 19:10, 14 4 Ma God weni nakanani ivonapotei bo, “Kegha. Aku wawaya 7 tausan emakamakai. Ti na ke meyani da kokoitau Beil ita vokavakavari bo ita runome tovoni.”* 1Kgs 19:18 5 Ma karako na bade berana sago, God ina agabiibai irakata da wawaya viya ivineta da tota ina wawaya. 6 Ina agabiibai kubiine na wawaya evinevinesi ma ke aviyavisina biibiina ti mani ita berai kubiine. Mikeda i bera kubiine ita vinesi na tuna ke agabiibai vaghata.
7 Bera weni nakanani itupuwa. Israel peyarisi keta iekwekwai da God yavata iti nuwasago ma ibera kavai. God wawaya voviyavina kava ivinesi na ti kava ipanani. Ma viya na God ivivi kwatu na tinisi ipota. 8 Ma giruma katamana evonavoneta bo,
“God iberisi da ivi nuwawapawapisi ma ke kovokovoghina da ina kita bo ini yana da God damina ina viini.
Ma karako ti na patana da nakanani emakamakai.”* Deut 29:4; Isa 29:10
9 Ma Kiivavo David ivona bo,
“Ina kamkamporaghamakai ma nani kamonai keberai da ku poko ina kona meyesi.
Keberai da ini gampiirisi! Kovogha keveresi.
10 Matasi kekiipotai da ke ina kita kiimatana.
Nuwapoya ini kuputuwakiiyovu nonowesi.”* Psa 69:22-23
11 Nakanani na ani tarakiiyana bo, “Maranai Jiu damsi ivi gampiirisi na ipeku tuwanonowa bo?” Kegha taweyana! Ma Jiu damsi i berabero kubiine, God yawasa makamakii nonowina na kupuna damsi iveresi. Ma iveresi da Jiu damsi ita kitai da ita nuwakapiyesi. 12 Jiu damsi Keriso ibarei kubiine na God ina vibiibiina ghamanakina ikiibau da wawaya peyarisi dobuwai iviiya. Jiu damsi ke iti tumaghana kubiine na God kupuna damsi ivi biibiinisi. Ma maranai Jiu damsi i nota ina virai ma ti bade ini tumaghana na dobuwai God ina vibiibiina ina rakata kirakai.
Kupuna damsi yawasa makamakii nonowina eviiviiya.
13 Wekarakava na tami kupuna dami kurimi aisisiya. God ivineku da tami kubiimi avi aposol ma anotai da weni bigana ivereku na iyamna irakata kirakai. 14 Tuna notanai na keta aekwekwai da dam turaku ina nuwakapiyemi ma ti bade God ini tumaghanei da ini yawasisi. 15 Maranai God aku wawaya ibaresi na wawaya kudubisi dobuwai taraboga iveresi da tuna yavata vimakiiberowana ita voterei ma iti nuwasago. Ma mara sago God ina kayowana meyesi, tuna nakanani ma ti na raborabobosi ma nani maranai na ita yawasame.
16 Mikeda parawa kukapuni ma kunona bedina God kusuwarei na nani parawina kudubina na bade vovokaravina, God rapenai.* Weni miibiina kamonai parawa bedina na Israel damsi i kaekiki mau, ti na God ina wawaya. Ma mara sago Israel kudubisi God ini tumaghanei, ti na nakanani ma nani parawina kudubina. Num 15:17-21 Ma mikeda oliv kiina ramramna na God kubiine kuna vonagubai na bade kiina kudubina ere ragharaghana na vovokaravina, God rapenai. 17 Tami kupuna dami na nakanani ma oliv dipa kiina. Ma Israel na nakanani ma oliv vovonina. Ma God, oliv vovonina raghana itamogai ma oliv dipa raghana iviiya da gawarinai ivi kabai da iyanumapotai da tami nani oliv kiina ramramnai kami vavai koviiviiya. 18 Tuna kubiine na nani kii ragharaghasi ivi tamogiiyana da ami taraboga iveremi na ke kona kitaoruwesi. Ke kona kayotata, tami na ragha kava. Tami kii ramramna vitana ke kota kavakavari, kii ramramna tami vitami ekavakavari.
19 Ma mikeda wawaya sago ina kayotata bo, “Vaghina, ma kegha da raghana sago ivogiitawei na kaku gawara ivoviyaghari.” 20 Tuna na vonavaghata. Ma ti na Keriso ke ita vivitumaghanei kubiine da ivi vogiiyana, ma tam na am vitumaghana tepanai da nani gawarinai kemakamakai. Tuna kubiine ke kuna kayotata. Kegha, God kuna yabumanei. 21 Jiu damsi na kii ragharaghana vaghata, ma kegha da God ke ita nuwaghanesi. Ma tam na kupuna wawayim, tuna kubiine ke kuna notai da ina nuwaghanem. 22 Kevi nuwanotanota da God na agabiibai wawayina ma bade wawaya bagibagina. Wawaya God ikawakiikiiyei na ti damsi kurisi nuwanuwana ipughu. Ma tam mara nonowa ina agabiibai kuni tumaghanei na nani agabiibiina kuna kita nonowei. Ma mikeda ina agabiibai kuna barei, tam bade ina kiiyaraghatawem. 23 Ma mikeda Jiu damsi vitumaghana ini karei na God ku kiina raghana ini kaba meyesi, iyamna tuna kovokovoghina da ina tere meyesi kii ku gawara. 24 Tam kupuna wawayim na nakanani ma oliv dipa raghana ita kiiyaraghatawei, ma kata notai da ke kovokovoghina da ku oliv vovonina iti kabim ma kegha da God iberai kubiim. Ma Jiu damsi na nakanani ma oliv vovonina ragharaghana, tuna kubiine na itekateka kirakai da God ku kiina ini kaba meyesi.
God kudubita ini kamyuyuweta.
25 Varevaresiku, akayokayowei da vonavaghata gavugavuna na ani debei kurimi da ke kona nota meyemi da tami nakanani ma nuwanuwagiurimi. Vonavaghata na weni, Israel damsi i vitinakurukuru mara sago ina voterei. God iakovi da kupuna damsi ruvana viya ekayokayowei da ina ku vikiivavona ina rui. Ikoyakoyagha da nani ruvana ini tumaghana yavu ma muriyai da Israel ini yawasisi. 26 Giruma katamana evonavoneta da Israel kudubina weni nakanani yawasa ina panani.
“Viviyawa wawayina Zayon kamonai ina vomiiri,
da Jeikap tupurereghina ina tinaviresi da bera didibarisi ina voterei.* Isa 59:20
27 Aku vivaghina makamakiina ti yavata kana berai
da i berabero kudubina ana pupunatawei.”* Jer 31:33-34
28 Jiu damsi Keriso varana biibiina ibarei, tuna kubiine na God yavata ivi ghavighaviyana da tami kupuna dami ami taraboga iveremi. Ma God namada ivovinesi da ina wawaya ma patana da ekayokayowesi, iyamna i kaekiki mau yavata mara katamaninai vivaghina makamakiina iberai. 29 Ina kayowanai wawaya evinevinesi ma ibiibiinisi na ke meyani da ina nota ina virai. 30-31 Rorova tami kupuna dami na God kovivi kawakiikiiyei. Ma bade ina wawaya vaghata, Jiu damsi ikawakiikiiyei, tuna kubiine God ivoteresi da tami ikamyuyuwemi. Bade berana maghimaghinina ina tupuwa. Ikikava God ikamyuyuwemi na bade nakanani Jiu damsi ini kamyuyuwesi. 32 Wawaya kudubina God ikawakiikiiyei. Tuna kubiine ivi vaghinei da i berabero ekukutatanisi. Nakanani eberaberai da karakava ini kamyuyuwesi ma ku biibiina ina teresi.
God tavokavakavari.
33 God ina biibiina irakata kirakai. Ina mura ma akova ma nuwagiura ine kirakai da ke kovokovoghina da kata ruvai. Ina nota irakata kirakai da ighekuyoweta. Ma ina bera tanota kavakavai.* Isa 55:8
34 “Ke sago iyai Bada ina nota itakovi.
Ke sago iyai ina vomiiri da God ina giuvibeyebeyei.* Isa 40:13
35 Ke aviyavisina God kata vere tovoni
da tuna ita notai da kana tupi ita kovoghi.”* Job 41:11
36 Bera kudubina imanai itupuwa ma bera kudubina ima tepanai emakamakai ma bera kudubina rapenai. Tuna kubiine mara nonowa tighegheni ma tavokavakavari da kana kadara ina rakata. Amen.* 1Kor 8:6
*11:3: 1Kgs 19:10, 14
*11:4: 1Kgs 19:18
*11:8: Deut 29:4; Isa 29:10
*11:10: Psa 69:22-23
*11:16: Weni miibiina kamonai parawa bedina na Israel damsi i kaekiki mau, ti na God ina wawaya. Ma mara sago Israel kudubisi God ini tumaghanei, ti na nakanani ma nani parawina kudubina. Num 15:17-21
*11:26: Isa 59:20
*11:27: Jer 31:33-34
*11:33: Isa 55:8
*11:34: Isa 40:13
*11:35: Job 41:11