1 Tuna kubiine Aisiki, Jeikap ikwatui da ivi biibiini ma ivonei bo, “Ke Keinan wavine kuna ravagha tovoni. 2 Yaghiyaghinai kenae ku Padan Aram* Padan Aram kana vava sago na Northwest Mesopotemiya. da am maduwa ina mamai Betuwel ina ku numa. Ma nani dobunai am maduwa novuna Leiban natunatuna wivinesi kamosiyai sago kuna viiya da kawam. 3 Ainowi God Rewapana Kirakiina† Hibru gamonai ‘Mamai God Rewapana Kirakiina’ kubiine ina vona bo ‘El Sadai.’ kurina da ini biibiinim ma ina berai da natunatum ina peyari ma am koroto ina rakata da dam sago ina tupuwa. 4 Ma bade ainowi da ikikava Abraham ivi biibiini na nani vibiibiinina ini damani tam ma tupurereghim kurimi. Ma karako weni dobunai kemakamakai na tam nakanani ma numataya, tuna kubiine ainowi da God ini vaghinei da dobuna tam kuni rapenei. Ma dobuna na God, Abraham iverei.” 5 Vaghina ma, Aisiki, Jeikap ivonatawei inae ku Padan Aram, ina mamai kikei Leiban kurina. Leiban novuna na Rebeka, tuna na Jeikap da Iso i maduwa. Ma Leiban da Rebeka i mamai na Betuwel, ina dobu na Aram.

6 Iso iakovi da Aisiki, Jeikap ivi biibiini ma ivonatawei inae ku Padan Aram da nani dobunai wavine sago ita viiya da kawana. Ma bade iakovi da ivivi biibiini na tuna maranai ina sisiya bagibagina iverei da ke Keinan wavine sago ita ravaghi. 7 Ma Jeikap na ina maduwa da ina mamai i sisiya ivotekatekei da inae ku Padan Aram. 8 Iso nani maranai iakova bubuni da ina mamai ke ina kayowana Keinan wivine. 9 Tuna kubiine Iso inae Ismayel kurina da natuna Mayalati iravaghi, tuna genebuna na Nebayoti. Iso kakawana ruwa ma weni tuna na kana viaroba.

10 Jeikap Beyaseba dobuna ikiibukuyowei inenae ku Haran. 11 Ma inenae da ravi ipika na gawara sago biibiina ipanani da ita kena. Nani dobunai wakima sago iviiya iterei da ina kunuwana ma ivi kiikenei da ita kena. 12 Ma ivi matu da kiitete ikitai, kaena na dobuwai ma damona na ighae da ku kunuma. Ma ikitai da God ina aneaneya nani kiitetenai igheghae ma iororu. 13 Ma nani kiitetena damonai na Bada imiimiiri, ma ivonei bo, “Taku na Bada, am mamai Abraham da Aisiki i God. Ma weni tanona tepanai kekenakena na tam ma tupurereghim ana veremi. 14 Ma tupurereghim ina peyari da dobu ini yoghoyoghoi ma ina kiibau da ku dobu kudubina ina ne yavui. Ma tam ma tupurereghim tepamiyai na dam ma dam dobuwai ani biibiinisi. 15 Ma mike kuna nenae na taku yavata ma ani tarapaparanem ma ana viinim kuna vovira weni ku dobuna. Ma ke ana voterem da aviyavisina avonakiiyapa kurim na ana berai na vaghina.”

16 Jeikap irumataka ma nota iviiya na ivona bo, “Vona bubuna Bada na weni dobunai ma taku ke atakovi.” 17 Ma iyabumana da ivona bo, “Weni dobuna ivi iniririmona ghagha, weni tuna na kesago avai da Bada ina numa. Weni tuna na kunuma kana matuketa.”

18 Mara itom ma mara boiboiyai Jeikap nani wakimina ivivi kunuwanei na iviiya da ivi miirini ma oira ku tepana itepoi. 19 Ma nani dobuna ivi vavei ‘Betel’‡ Hibru gamonai ‘Betel’ iyamna ‘God ina numa.’ , kunona nani kwanatuna ikwatukwatui Lus.

20 Vaghina Jeikap vonakiiyapa bagibagina iberai, ivona bo, “Mikeda God gwabikuwai weni babana kamonai na ani vaghinei da tuna na aku God. Ina kitaruviku ma vavai ina vereku da ana kam ma gara ina vereku da ani kote, 21 ma mikeda biibiinai ana vovira aku mamai ina ku numa na vaghina, Bada ana vonei da tuna na aku God. 22 Ma weni wakimina avi miirini na ini debei da tuna na gawara vovokaravina. Ma aviyavisina peyarina kuna vereku na riba ivi imaruwa ana terei ma sago ana verem.”