Ikitaabo kyoꞌmuleevi
Sefaniya
Indangiriro
Yiki kitaabo kya Sefaniya, kiyerekiini ngiisi kwo Rurema agaahana abandu beꞌkihugo kyeꞌBuyuda hiꞌgulu lyeꞌbyaha byabo. Neꞌkyanya agabahana, ikikembere naaho kyo kigasigala. Ha nyuma, yabo bandu ábagasigala, Rurema âye baholeeze noꞌkubagalulira ikihugo kyabo.
Yikyo kyanya kyoꞌkuhanwa, Sefaniya akakibuuza «ulusiku luhamu lwa Nahano». Anadeta kwo ku kyekyo kyanya, ibindi bihugo bingi byeꞌmahanga nabyo bigateerwa, ngeꞌBufirisiti, neꞌMohabu, neꞌHamooni, neꞌHendyopiya (i Kuushi), neꞌHasuriya.
Muziizi muguma gwiꞌsikamiro, guli mu Sefaniya 3.15: «Kundu Nahano âli kizi kuhana, haliko keera akaleka, anashaabula abagoma baawe. Nahano yenyene, ye mwami waꞌBahisiraheeri, aganayama amùtuuziri mwo. Mutanaki shubi yoboha, mbu mugalonga inguuke.»
Íbiri mwo ku bwofi
a) Sefaniya akengula booshi ábatuuziri mu kihugo (1.1-3)
b) Amaleevi goꞌkudaaka Abayuda (1.4-13)
c) «Ulusiku Luhamu lwa Nahano» (1.14–2.3)
d) Ngiisi kwo yaba bagoma bagaahanwa: Abafirisiti, naꞌBamohabu, naꞌBahendyopiya, naꞌBahasuriya (2.4-15)
e) Abandu beꞌYerusaleemu bagaahanwa, si ikikembere kigasigala (3.1-20)
1
1 Ino ndumwa, Nahano akagimenyeesa umuleevi Sefaniya, ku kyanya Yosiya mugala Hamooni, âli riiri mwami weꞌBuyuda. Uyo Sefaniya, âli mugala Kuusi, mwijukulu Gedaliya. Gedaliya naye, âli mugala Hamariya, wa mu kibusi kya mwami Hezekiya.* 1.1 2 Baami 22.1–23.30; 2 Kutondobola 34.1–35.27.
2 Nahano adetaga kwokuno:
«Ngashereeza byoshi íbiri mu kihugo!
3 Ngaminika abandu, neꞌnyamiishwa, noꞌtunyuni twa mu kyanyaanya, kiri neꞌfwi mu nyaaja.
Ngiisi ábakoli bihuusiri, ngaasiga nabalunda nga ndundo zaꞌmabuye.
Yabo bandu, ikyanya ngabaminika, batâye ki boneke mu kihugo.
4 «Ngahaniiriza ikihugo kyeꞌBuyuda, kuguma naꞌbandu booshi beꞌYerusaleemu,
na njaaze umuzimu Baali, gutaki boneke mu kihugo.
Na ndyose abaleevi beꞌbibeesha, halinde banayibagirwe lwoshi-lwoshi.
5 Ngashereeza ngiisi ábagweti bagashonera ku nyumba,
mbu bafukamire izuuba, noꞌmwezi, neꞌndonde.
Si bali mu kizi biika indahiro kwiꞌziina lyani,
banakizi biika igindi kwiꞌziina lyoꞌmuzimu Mirikomu!
6 Kundu bâli nzimbahiri, haliko ha nyuma bananjanda.
Buno, batakiri mu ngulikira, batanakiri mu mbanuusa.
7 «Muhulikage imbere lya Rurema Nahamwinyu.
Si ulusiku lwo agayiji twa kweꞌmaaja, lukola bu hika.
Nahano keera akalingaania abandu baage, gira baminikwe, nga kwoꞌmundu angalingaania ibitugwa byoꞌkutangwa ituulo,
keera anatoola ngiisi ábagalaalikwa ukubayita.»
8 Nahano adetaga kwokuno: «Mu lulya lusiku lwo ngaatwa kweꞌmaaja,
ngaahana abakulu baꞌBayuda, naꞌbaluzi baabo,
kiri na ngiisi ábagweti bagakulikira ingesho zeꞌkipagaani.
9 Ku lwolwo lusiku, ngaahana ngiisi ábagweti bagayikumba imizimu.
Banagweti bagayitana mu ndwaro zaabo, iri banalyalyania!»
10 Nahano adetaga kwokuno:
«Yulwo lusiku, hagayuvwikana ikimboloogo ukulyokera ku lwivi lweꞌFwi.
Bagakizi bululuka na mu luhande luhyahya lwaꞌkaaya.
Noꞌlunganga lugayuvwikana mu tugangazi.
11 Mwe mutuuziri haꞌkaguliro, mukizi bululuka!
Mukuba abadandaza booshi bagaminikwa, kuguma na ábali mu vuuja ifwaranga.
12 Yikyo kyanya, ngakoleesa itara, mu kulooza ábabishamiri mu Yerusaleemu.
Neꞌkyanya ngagwana ábagweti bagayifunda mu mabi, ngabahana ngana-ngana.
Si bagweti bagayitoneesa kwokuno:
“Nahano yehe, ndaabyo angatugirira, kiba kiija kandi iri kibi!”
13 Ehee! Si abagoma baabo, bagayiji bashahula ibindu,
halinde inyumba zaabo zinasigale mishaka!
Kundu bagweti bagayiyubakira inyumba,
haliko batagazituula mwo!
Na kundu bagakizi byala imizabibu,
haliko batagakizi nywa ku divaayi yayo.»
14 Lulya lusiku lukulu lwa Nahano, keera lwayegerera.
E maashi! Si lugweti lugayija duba-duba.
Haaho, abandu bagakizi bululuka.
Kiri neꞌbihagarusi, bigakizi lubanda kwaꞌkashiba.
15 Yulwo lusiku, uburaakari bwa Nahano bugayonerwa ku bandu,
banalibuuke, iri banashenguka bweneene.
Banashereezibwe, iri banasigwa mu mushaka.
Lulya lusiku, lugaaba lweꞌkihulu, na lwoꞌmwizingeerwe,
lunayidike mweꞌbibungu biiru, halinde kinabe kihulu kya namudidi.
16 Ku lwolwo lusiku, abandu bagadihiriza ibibuga hiꞌgulu liꞌzibo, iri banabanda akashiba.
Abagoma bagayiji hongola inzitiro zoꞌtwaya, kiri neꞌniizo zaatwo.
17 Abandu keera bakahubira Nahano,
kyo kitumiri bali mu kizi mamaata nga mbumi.
Umuko gwabo, gugayonwa nga luvu.
Neꞌbirunda byabo, bigakizi shemwa nga myanda.
18 Yulwo lusiku, Nahano agaaba akoli barakariiri bweneene,
batanaki kizibwe, mbu bwo batanga ifwaranga kandi iri inooro.
Mukuba agaaba akoli yuvwiti uluugi ngana, halinde ikihugo kyoshi kinasingooke.
Ee! Agaamala abandu booshi ba mu kihugo!