1 Ina anona eaf wapotiꞌ, owaꞌ. Eaꞌ aeꞌ efela agel aeꞌanai atona wapotiꞌ. Andaꞌam naꞌama ina laꞌifima migiambamapa, owaꞌ. Eaꞌ hapaimi, aeꞌ endaꞌam. Deiꞌ aeꞌ aꞌi iꞌi basefa enin epen naꞌoh nandondoꞌoha basef mape mandambahiꞌi God nawalapameam ma aeꞌ. 2 Aeꞌ egawa anona aman* Basef amama maꞌi anona aman Kraisi maꞌi Pol atona, eaꞌ anan nambahoꞌ agel ananinai. Kraisi, basef ananimi mape naꞌama. Fowaꞌ afagof 14-peleim mafeꞌma eaꞌ, God nofaꞌana nalata ilif heven nafeꞌma wenifiguma gani ilif. Aman anama ambal atona nalata o naloma alop nalata, ina egawana. God atona nogawana. 3 Eaꞌ aeꞌ egawa aman anama God nofaꞌana nalata ilif heven. Aman anama ambal atona nalata o alop napaina nalata aeꞌ ina egawana. God atona nagawana. 4 Gani ilif heven anan nameꞌ basef hiami mamumami epes owaꞌ laꞌifisa siꞌiama diga, God nandaiwaꞌ ma epes sowalapami. 5 Aeꞌ aꞌi efela agel aman anama luꞌuna. Agel aeꞌanai owaꞌ. Aeꞌ iꞌiam iꞌi aeꞌ owaꞌ laꞌifiwi, eaꞌ amama atom efela agel aeꞌanai. 6 Endilisi, iꞌi aeꞌ efela agel aeꞌanai atona, aeꞌ ina siꞌi epen okom nololani, owaꞌ. Deiꞌ main, aꞌi endilisi etin. Owaꞌetin. Aeꞌ andaiwaꞌ. Naꞌama enin epen niꞌi aeꞌ epen buꞌuwei endilisi ikilaꞌ waf feꞌ pe ki aeꞌanai. Aeꞌ aꞌi ipeꞌ piti waf aeꞌ andaꞌanai pemeꞌe ma basef aeꞌ aꞌiami. Eaꞌ naꞌama etin ipeꞌ pegawa waf aeꞌanai andeandeꞌ.

7 Basef amama God nihiꞌambeam aeꞌ luꞌum endilisi. God nandaiwaꞌma efela agel aeꞌanai endilisi, owaꞌ. Amama atom deiꞌ naseꞌe anom amamaga siꞌi higata nape alop aeꞌanai ekep pahe. Amama anona ensel Satan nasapaꞌana nafiꞌi ma nandaꞌ aeꞌ ekep pahe. Amama mandaꞌ agel aeꞌanai nowala. 8 Aeꞌ andaꞌ betena Dembinai wenifa anan ataꞌ notofa amamaga mandaꞌe ekep pahae, epan andeandeꞌ. 9 Eaꞌ anan naꞌipi naꞌama naꞌi, “Aeꞌ agiambamena naꞌa, waf anama laꞌifinai ma ineꞌ. Deiꞌ main, pepel aeꞌanai anama nandaꞌ maol laꞌifinai endilisi ma epes owaꞌ laꞌifisi.”

Eaꞌ aeꞌ deiꞌ ina ataꞌ okom aona, owaꞌ. Aeꞌ andanifel endilisi ma amama ma pepel Kraisi napaiwe. 10 Amama atom deiꞌ maol anama Kraisi etin, aeꞌ ina laꞌifiwi, owaꞌ. Esis sandaꞌme waf aonai eaꞌ sandaꞌme nimanimi mamumami hiami, enis sahambombage. Eaꞌ hapaimi. Aeꞌ andanifel ma amamaga amama. Nemaf anama aeꞌ owaꞌ laꞌifiwi, nogota anama aeꞌ laꞌifiwi endilisi.

11 Basef amama ahoꞌmaꞌiami amama basef falafalafumi aꞌiam siꞌi epen okom nololani. Eaꞌ ipeꞌ pefela aeꞌ deiꞌ aꞌiam naꞌama. Iꞌi ipeꞌ pefela agel aeꞌanai, anama waf buꞌunai. Owaꞌetin. Endilisi, aeꞌ epen falafuwei, eaꞌ ina afeꞌ owina amam amama “Aposel ipeꞌimi” maliꞌi, owaꞌetin. 12 Aeꞌ andaꞌ okom aeꞌanai laꞌifina eaꞌ andaꞌ ikwaf laꞌifinai hianai laꞌafena ipeꞌ, awalapai ikwaf hianai aposeli. Amama naꞌama. Amama laꞌifimi siꞌi God nandaꞌami mataga hiami mamumami laꞌafena ipeꞌ mandahama maol Godi. Sati pepel anama, esis gegelalasis kwapeteꞌas. Laꞌifimi amama mihiꞌambepa aeꞌ aposel endilisiwei. 13 Ipeꞌ ina pape owina enis Kristen sios sape ganigani, owaꞌ. Ipeꞌ palomas pape dendeꞌ etina waf hianai aeꞌ andaꞌmepanai. Eaꞌ anona waf aonai† Pol ina nandaꞌ anona waf aonai, owaꞌ. Anan naꞌi nefela ukup asasimi ma sogawa anom amam esis Korin sofalom aposeli. Amam mawalipasa basef Godi esis Korin mofaꞌ otamba, eaꞌ Pol owaꞌ. andaꞌmepana ipeꞌ etipei ma esis owaꞌ, anama naꞌama. Aeꞌ ina aꞌipipama anom amamaga ipeꞌimi, owaꞌ. Deiꞌ aeꞌ ati uwahipipa, ipeꞌ pekwahome waf aonai anama andaꞌmepanai.

14 Deiꞌ andandombam efeꞌmago ipeꞌ ma wenif, eaꞌ aeꞌ ina nambimb efaꞌ amamaga ipeꞌimi, owaꞌ. Deiꞌ main, aeꞌ andaiwaꞌma efaꞌ amamaga ipeꞌimi, owaꞌ. Aꞌi efaꞌai ipeꞌ etipa. Ipeꞌ pegawa, ipeꞌ siꞌi awasi aeꞌipei. Ina andeandeꞌma esis awasi sogolopa amamaga sigiambama mamasas asasisi, owaꞌ. Esis mamasas etis, sandaꞌ maol sagolopama amamaga sagiambama awasi. 15 Aeꞌ okom naꞌiam endilisi ma ekwaha amamaga hiami aeꞌami eaꞌ elelama ambal aeꞌanai ekwahona igiambamepa. Aeꞌ okom naꞌi naꞌama. Waf aeꞌ okom nanailipanai nataga nape luꞌuna endilisi laꞌelaꞌef nikilaꞌ fowaꞌ. Eaꞌ waf ipeꞌ ukup maimilianai nowala saꞌosaꞌona endilisi laꞌelaꞌef nape.

16 Eaꞌ ipeꞌ pegawa fowaꞌ aeꞌ ina aseꞌepa nimanimi ipeꞌ, owaꞌ. Eaꞌ enis saꞌi naꞌama saꞌi, “Endilisi anan ina nofaꞌ amamaga apeꞌimi alihim, eaꞌ anan aman nakikipapa ma waf basoꞌmainai eaꞌ nefaꞌapa mailana.”

17 Endilisi fowaꞌ asapaꞌ anom amam mafeꞌmago ipeꞌ. Deiꞌ siꞌi main? Aeꞌ ina ambasoꞌmepa efaꞌ anom amamaga ma lagof ipeꞌimi. Owaꞌ. 18 Aeꞌ afela Taitus aꞌipana nafeꞌmago ipeꞌ. Eaꞌ asapaꞌ owalomapa anama nafoꞌo nalomanago. Taitus ina nambasoꞌam nefaꞌ amamaga ipeꞌimi, owaꞌ. Afaꞌ deiꞌ waila waf buꞌunai ukup etifim. Ipeꞌ pegawa afaꞌ waila eaf atotona wafeꞌ.

19 Ipeꞌ ina piꞌi afaꞌ wandaꞌ basef amama hiami waliꞌ waꞌiami waꞌipipa waf afaꞌinai ina aona, eaꞌ wandaꞌ waf buꞌunai atona, owaꞌ. Afaꞌ wape epes Kraisi wandaꞌ basef amama ma naep Godi. Alupipei endilisi aeꞌipei, afaꞌ wandaꞌ basef amama hiꞌalama mondaꞌ ipeꞌ pembaleꞌefa God petaga laꞌifipa. 20 Aeꞌ umbamahe aꞌiam naꞌama aꞌi nabimb efoꞌo etaga ma itilipa ina pepe boꞌwepa siꞌi okom aeꞌanai naꞌi efoꞌo iti ipeꞌ pepe bowepa, owaꞌ. Eaꞌ ipeꞌ wapotiꞌ nambimb piti aeꞌ ina epe boꞌawe siꞌi paꞌi piti aeꞌ epe, owaꞌ. Naꞌama waf naninani hianai nope. Basef lopaꞌ fitapaimi, waf kowalepa ma anom amamaga, migimigah, findiwa, daha basef, sasambala basef, basef mandaꞌas sanda hapeꞌma sape deindeiꞌ. Eaꞌ ipeꞌ ina pemeꞌ andeandeꞌma pila ukup etifima waf sandaꞌ lotuwanai, owaꞌ. Paila ukup deindeiꞌ. Aeꞌ umbamahema amama. 21 Nemaf anama aeꞌ efeꞌmago ipeꞌ, God aeꞌanai nambimb nondaꞌ agel aeꞌanai nowala ma naep ipeꞌimi ma alopa ipeꞌ amam nematawa hipei fowaꞌ pandaꞌ waf aonai owaꞌ pemboma opalef pefeꞌma Gode. Ma ipeꞌ owaꞌ pewaꞌ alafugaha waf aonai soꞌa waolanai ma opalef awami maloma amamaga awami fowaꞌ paliꞌ pandaꞌami. Aeꞌ umbamahema amama.