1 Kamini ina rofu niyo, “Rama ya nida, ya bedakai minari bi de muyegedi, idu Sei di ourefeidena amena sana ini vava nufa dego bi vegedi.”

2 Kamini meda 6 koina niyori, Iesu yaku Peter, James ma John afesi omuna tora yokoiri inaike maka boyadi. Mironari ina vene di nemokori, ini roaita idana niyo.✡ 2 Pet 1.17–18 3 Ini varuka bi feyo kamanika iniye niyo, feyo tayataya amiye yokoi mina kono tora noibanuri ka mina kana varuka koitena di feyo kana de. 4 Ma Elijah ma Moses bi ina vene rofu ogau nisi Iesu sa sina nigamadi. 5 Ye Peter yaku Iesu rofu niyo, “Oteimana amiye, bi buni una bi minari. Una bi karaga regode akugifa—yokoi bi yi, yokoi bi Moses di, ma yokoi bi Elijah di.” 6 Ina bi ina diba de beika ago nigamo bi, adina ori iniye reyadi.

7 Ma seuya desi ina vene bou riyo, ma ago goroka mina seuya gutuna baesi niyo, “Mina bi nai uka maida Mida; ini ago neidefa!”✡ Mt 3.17; Mk 1.11; Lk 3.22 8 Evade maka ne kero reyadi, idu amiye yokoi de veyadi, idu Iesu maka ina venesa amegamo.

9 Ye omuna degamadiri, Iesu yaku ago gira magamo, “Amiye yokoi ga nioteimafa beika veyadi bi, bogo Amiye di mida bi muyenari gutuna dadi rae rego mamo.”

10 Mina ago bi neidei mokesi iniye maka nidodi reyadi, “Muyenari dadi rae rena bi beika?” 11 Resi nikaiteyadi, “Beika resi ago gira oteimana vene yaku nidedi Elijah siko deyaine?”✡ Mal 4.5; Mt 11.14

12 Ye nikabai reyo, “Rama Elijah siko desi beika tau dudusa moi dogo rei mona rego. Ma beika resi bi bura reyadi Amiye di mida bi esika esika tora iniye baku rego ma etofa regedi? 13 Idu ya nida, Elijah bi sena baeyo, ma beika mokeyadi ma bura reyadi kana, ina rofu reyadi.”

14 Kamini ini usi dina vene rofu baeyadiri, bi amiye tau gade gade buru riyadi ma veyadi, ma ago gira oteimana vene be yaku ina venesa kayamo regamadi. 15 Minari maka, amiye tau gade Iesu vegasa vima disi raga bosi buni maradi. 16 Ma nikaiteyo, “Ya bi beika nisi ina venesa kayamo rededi?”

17 Ye mina amiye tau gade fogori, amiye yokoi nikabai reyo, “Oteimana amiye, nai mida ya rofu afei baeyaka, kaere bi vima no dui resi moi babo riyo. 18 Goidu moidori, bi konori makudo ma vena kabudo redo ma ini gade aki gigi resi ini roaita ka gira nido. Ye yi usi dina vene rofu mina vima no meki reyaganedi usa niyaka, idu ini yeiva dudu mina regi anua reyadi.”

19 Ma nikabai reyo, “Ya gua mokena vari gira de aena vene, gokaisanu ari doba yasa amegida? Meda gokaisanu yasa moimai regida? Na rofu afei baefa!” 20 Mina mida afei boyadi.

Vima no yaku Iesu vegasa minari maka moi tururu reyo. Mina mida konori maku nesi etagae riyo ma buyo buyo resi vena kabudo regamo. 21 Iesu yaku mina mida di baba nikaiteyo, “Gokaisanu meda mina gauka baku reyo?”

Ma nikabai reyo, “Ina mida kakuari gutuna. 22 Ari tau gade vima no yaku ka moisi ita mokari ma koruri makuyo muyeyaine. Idu ya mokeisa bi regiya vonisi, buni bi una iriyeduka resi una aede!”

23 Ma niyo, “Ya mokeisa bi regiya vonisi, vegu tau ya rofu bi aita ya kaere Sei rofu mokena vari gira aegiya.”

24 Ma evade maka, mida di baba yaku raka nisi usa niyo, “Nai mokena vari gira keika aeda bi na aede ye tora nigo!”

25 Iesu yaku amiye tora gade urana baeyadi vegasa bi ago gira vima no rofu masi niyo, “Ya anema kora ma vena babo vima no, ya rofu ago gira maida, mina mida di roaitari yakusi dudusa dui rena ga re!”

26 Kamini vima no raka tora nisi mina mida bi moi tururu resi ini roaitari yakuyo. Ye mida bi muyena kana varegamo, ye amiye tau yaku niyadi, “Rama iniye muyeyo!” 27 Idu Iesu bi vanau moisi moi odoro reyo, ma mida bi are reyo.

28 Ma Iesu yava ideri dui reyori, bi ini usi dina vene sui dudu nikaiteyadi, “Beika resi bi meki regi anua reyafa?”

29 Ma nikabai resi niyo, “Mina kana meki rena ida bi koina, idu usa nina* Bura bedakai ka ma iruku oyo rena nufa. maka bi yeiva.”

30 Iesu ini usi dina venesa bi mirona sana feresi Galilee di kono ebu resi boi neyadi, ini ura de amiye yaku diba nigedi ini dibo sana, 31 adina ini usi dina vene oteimagasa niyo, “Amiye di mida bi amiye di vanari siri rego ma umuyegedi, ma meda regodenu koina nigori, dadi rae rego.”

32 Idu beika ago niyo bi ini adari de ufatesi nikaitegi ori reyadi.

33 Capernaum taoniri okiyadi. Kamini Iesu yaku yava ideri ina vene nikaiteyo, “Ya vene bi idau beika nigasa kayamo regamadi?”

34 Idu bi bere niyadi, adina bi idau digasa kayamo reyadi kaere bi tora iniye.✡ Lk 22.24 35 Ma ameinu resi bi ini usi dina vene 12 nirutu resi niyo, “Kaere amiye ouregi ura rego vonisi, mokego ina bi amiye tau gade di gabireri keika iniye nisi ka amiye tau di naivo rena amiye nigo.”✡ Mt 20.26–27; 23.11; Mk 10.43–44; Lk 22.26 36 Resi mida keika yokoi moisi ini fogori moi are resi binu masi niyo, 37 “Kaere yaku nai roka dudu mida yokoi makai kana moi dui rego, bi na ka moi dui rego. Ma kaere yaku na moi dui rego, bi diya na maka moi dui rego, idu kaere na nifeideyo amiye, ka moi dui rego.”✡ Mt 10.40; Lk 10.16; Jn 13.20

38 John yaku niyo, “Oteimana amiye, Amiye yokoi yi roka dudu vima no meki regamo ma veyafa, ye nivaigika reyafa, ini adina bi una usi de dido.”

39 Ma niyo, “Ga nivaifa, adina amiye yokoi ide yaku nai roka dudu bi mokena vegu rena moimai rego, ari yokoiri bi na dada ago deda no mina nigo. 40 Adina kaere una rofu no de redo, ina bi uni.† uni; bura bedakai yi nufa.✡ Mt 12.30; Lk 11.23 41 Adina rama iniye ya nida, kaere amiye biyori koru ya mago, bi Keriso di roka nufa dada, ini obini de youfeidego.✡ Mt 10.42

42 “Idu kaere amiye mina mida keika keika yokoi, kaere bi mokena vari gira na rofu aedo, bi ourefeidego vonisi, ma vegu no rego, bi kaunava tora moigo. Bi buni bi witi utei rena di fore tora ini kuriri ukita resi davarari makugo. 43 Ye yi vana yaku ya moi vegu no rofu ourefeidego vonisi, bi nugai feide! Makai bi buni, vana yokoi maka nufa vegu buni dui regiya, idu buni de vana remanu nufa ita moka dui rei bogiya, minari ita bi de kafedo.‡ Bura bedakai ka nanaka 44 nufa: 44 Mironari ‘bi adi muyena de ma ita vaido mina de kafego’ (nanaka 48 baku re).✡ Mt 5.30 44  § Bura bedakai bi nanaka 44 nufa: Mironari ‘bi adi muyena de ma ita vaido mina de kafego’ (nanaka 48 baku re). 45 Ye yi yuka yaku ya moi vegu no rofu ourefeidego vonisi, nugai feide! Makai bi buni, yuka kevo nufa vegu buni dui regiya, ma buni de yuka remanu nufa ita moka ya makugo.** Bura bedakai ka nanaka 46 nufa: 46 Mironari ‘bi adi muyena de ma ita vaido mina de kafego’ (nanaka 48 baku re). 46  †† Bura bedakai bi nanaka 46 nufa: Mironari ‘bi adi muyena de ma ita vaido mina de kafego’ (nanaka 48 baku re). 47 Ma yi nemoko yaku ya moi vegu no rofu ourefeidego vonisi, kini biyoka resi maku! Makai bi buni ya rofu Sei di ourefeidena amena sanari nemoko yokoi maka nufa dui regiya, ma buni de nemoko remanu nufa ita mokari makugo.✡ Mt 5.29 48 Mironari bi ‘adi muyena de ma ita vaido mina de kafego.’✡ Is 66.24

49 “Ramena yaku ori sisika moi buni rido kana, amiye tau ka ita dudu moi buni rigo.

50 “Ramena bi buni; idu ramena di safi koina nigo vonisi, bi gokai ida dudu ini safi dudusa moi safi rigiya?”✡ Mt 5.13; Lk 14.34–35

“Ya kaya ya kaya maka ramena risi ya neinei ideri bi uka amuta dudu maka amefa.”