Paul di bura
Galatia vene
rofu
Ago di ini adina
Iesu di ago buni tutubena idana vene rofu niokugi kora regamadiri, nikaitena yokoi bi amiye yokoi, kaere bi Moses di ago gira de neidego vonisi, bi ekalesia amiye rama nigo ba ide. Paul yaku nidodi reyo mina bi rama de—ye vegu Keriso ideri di ida yokoi maka bi mokena vari gira aena, makai amiye tau gade bi Sei di budari moi rama aego dada. Idu Galatia gagani, Rome di, Asia keika gagani ideri, ini dubu ideri, bi amiye bedakai, kaere Paul rofu tourage resi amiye yokoi yaku ka Moses di ago gira neideyaine, mina nikake reyadi, ye Sei di budari moi rama aegi dada.
Paul di bura Galatia vene rofu bura reyo, bi amiye kaere ofa ofa oteimana ago neideyadi, mokena vari gira aena ma vegu rena dudusa moi rama aegi. Paul siko bura reyo Sei yaku Iesu Keriso di nifeidena amiye kana vo niyo, ma amiye yokoi yaku de vo niyo. Ye ini reremama rena tora bi tutubena idana vene rofu. Kamini nidodi reyo amiye yaku Sei di budari moi rama aegika, bi mokena vari gira aego maka. Metona agori, oteimaro ekalesia vene yaku mokena vari gira Keriso rofu aesi amiye uka masi ini vegu buni regedi dada.
Beika sina ideri
Ago di ini adina 1.1–10
Paul di vava nifeidena amiye kana 1.11—2.21
Sei di buni tora gade mana di ago buni 3.1—4.31
Ekalesia vene di erufuna ma iniye ini moimai rena vegu 5.1—6.10
Metona ago 6.11–18
1
1 Na bi Paul, nifeidena amiye, kaere amiye yokoi o amiye tau yaku auba de reyadi, idu Iesu Keriso ma Baba Sei maka auba reyadi, kaere yaku Iesu muyena gutuna moi dadi rae reyo. 2 Nai usika ourena tau gade minari nasa amesi ya Galatia ekalesia vene rofu yuata nisifa:
3 Uni Baba Sei ma Varika amiye Iesu Keriso di buni tora gade ma uka amuta ya maragane.
4 Iesu uni vegu no rofu ina kaya muyeyo, ye mina gua meda nori moi vegu rigi, Sei uni Baba di ura redo kana. 5 Ye ina rofu toga toga iniye vabara maraine! Rama.
Ago buni yokoi maka
6 Ye meda doba deri, Keriso di buni tora gade* Keriso di buni tora gade; bura bedakai ini tora gade nufa. dudu ya raka niyo amiye gutuna moi kero resi ago buni bouna rofu usi didedi, mina neidesi tururu iniye reyaka. 7 Idu bi “ago buni bouna” yokoi de, idu amiye bedakai mironari, yi mokena moi forovai resi Keriso di ago buni moi kero resi ida bouna regika ura rededi. 8 Idu una o naivo naivo vima oma gutuna ago buni bouna mina sina ya rofu sena niokuyafa kana de, ya rofu ka niokugifa vonisi, bi Sei ya kiraini niyaine! 9 Sena niyafa kana, dudusa nida: amiye yokoi yaku ago buni bouna sena moiyadi kana de, ya rofu niokugo vonisi, bi kiraini niyaine!
10 Adina amiye ba Sei moi ada regika reida? O na bi amiye di nemokori nai roka moi tora regika reida, ye na nimagedi ba? Ye makai regida vonisi, bi Keriso di moimai rei tavoi redo amiye de nigida.
Gokai Paul yaku nifeidena amiye niyo
11 Nai usika ourena, ago buni sena ya rofu niokuyaka, mina nioteimagamaka bi amiye rofu de. 12 Adina bi amiye gutuna de moiyaka ma amiye yokoi na oteimana de reyo, idu Iesu Keriso maka na rofu moi ogau riyo ma moiyaka.
13 Adina ya bi sena neideyadi gokai Jew vene di toutou dudu nai veguri amegamaka; toga toga Sei di ekalesia vene esika esika masi ukero vau regika regamaka.✡ Acts 8.3; 22.4–5; 26.9–11 14 Ye na bi nai uru Jew vene di oteimana ago dudu, besa ebu resi moi gira ri mona rena dudu, uni tutubena di toutou ago rofu tari regamaka.✡ Acts 22.3
15 Idu nai nono di rivo ideri vata nina koderi, Sei sena na auba resi ini buni tora gade dudu, na raka nisi✡ Acts 9.3–6; 22.6–10; 26.13–18 16 ini Mida na rofu moi ogau rigi ada reyo, ye tutubena idana vene rofu, ago buni niokugida. Kamini minari maka amiye yokoi nidodi de resi 17 Jerusalem ri sena nifeidena vene di budari de boyaka, idu Arabia gagani rofu siko disi dudusa Damascus dairiyaka. 18 Kamini lagani regode koina niyadiri, Jerusalem rofu Peter† Peter: Greek agori bi Cephas. egoru regi bosi meda 15 ri inasa amegamaka.✡ Acts 9.26–30 19 Idu nifeidena amiye yokoi de veyaka, idu Varika amiye di dubuini James maka.
20 Ye beika ya rofu bura reidari, bi Sei di nemokori ofa de nida!
21 Kamini koina niyori, na bi Syria ma Cilicia di gaganiri diyaka. 22 Mirona ituari Keriso di ekalesia vene Judea gaganiri bi na toto. 23 Idu neidegamadi maka bi: “Mina amiye kaere sena esika esika una magamo mokena vari gira aena moi no rigika reyo, bi gua ago buni niokudo!” 24 Ye na dada Sei di roka moi odoro riyadi.