1 Abraham k'achı̨ ts'èko naìchì, Keturah wìyeh. 2 Yeza nìı̨laa sìı dıı hagìyeh: Zımran, Jokshan, Medan, Mıdıyan, Ishbak eyıts'ǫ Shuyah. 3 Jokshan weza nàke gòı̨lè: Sheba eyıts'ǫ Dedan gìyeh. Dedan wets'ǫ dǫ taı xàgeèɂaa gǫ̀hłı̨: Ashur got'ı̨į̀, Letush got'ı̨į̀ eyıts'ǫ Leum got'ı̨į̀ gìyeh. 4 Mıdıyan weza sìı Efah, Efer, Hanok, Abıda eyıts'ǫ Eldah gìyeh. Eyı dǫ haàtłǫǫ Abraham ts'èko naìchìı Keturah wets'ıhɂǫ̀ǫ-dǫǫ̀ agı̨ı̨t'e.

5 Abraham t'asìı hazǫǫ̀ wets'ǫ sìı Isaac weghaelı̨į̀ ayį̀į̀là. 6 Hanìkò ı̨łaà eda et'ıì wets'èkeè eyıì-le gıza sìı wets'ǫ t'asìı mǫ̀hdaa gota whela gà sa kàɂàa nèk'e ts'ǫ̀ nagoèhɂà, weza Isaac ts'ǫǫ̀ nıwà nagoèhɂà.

7 Hazǫǫ̀ t'à Abraham ı̨łèakw'eènǫ-daats'ǫ̀-łǫ̀hdı̨ènǫ-daats'ǫ̀-sı̨làı (175) xo ts'ǫ̀ ı̨ı̨dà. 8 Eyı tł'axǫǫ̀ Abraham nǫǫde xàèhjı gà ełaı̨wo, eyıts'ǫ wecho gots'ǫ̀ ajà. Sıì eneèko whelı̨ ts'ǫ̀ ı̨ı̨dà. 9 Weza Isaac eyıts'ǫ Ishmael, dèè Makpelah k'e kwe-yìı-gòɂǫǫ yìı wekw'ǫǫ̀ nègı̨į̀tǫ. Mamer nèk'e gà nıwà-le eyıts'ǫ Het got'ı̨į̀ Zohar weza Efron wedèè k'e. 10 Eyı dèè sìı Abraham Het got'ı̨į̀ goghǫ nàyeèhdì ı̨lè. Ekǫ Abraham wets'èkeè Sarah gà wekw'ǫǫ̀ whetǫ. 11 Abraham ełaı̨wo tł'axǫǫ̀ Nǫ̀htsı̨ Isaac xè sìghà hòɂǫǫ̀ ayį̀į̀là. Ekò k'e Isaac Ber-Lahaı-Roı gòyeh gà nàde ı̨lè.

12 Abraham weza Ishmael dıı hanì wegodıì dek'eèhtł'è: Wemǫ Egypt got'ı̨į̀ gots'ǫ ts'èko Hagar wìyeh sìı Abraham weza nìı̨htı̨ hǫt'e. Hagar, Sarah gha eghàlaedaa elı̨ ı̨lè.

13 Ishmael weza dıı hagìyeh, ełek'èdaà gıgǫ̀hłı̨ k'ę̀ę̀ gıızì dek'eèhtł'è: Ishmael weza t'akwełǫ̀ǫ̀ wegǫ̀hłı̨ı̨ sìı Nebayot wìyeh, wek'è Kedar, Adbel, Mıbsam, 14 Mıshma, Dumah, Masa, 15 Hadad, Tema, Jetur, Nafısh, eyıts'ǫ Kedemah. 16 Eyı dǫ haàtłǫǫ Ishmael weza agı̨ı̨t'e, eyıts'ǫ hoònǫ-daats'ǫ̀-nàke dǫ xàgeèɂaa gha k'aodèe sìı gıızì k'ę̀ę̀ gıts'ǫ kǫ̀ta hagòyeh agı̨į̀là. 17 Hazǫǫ̀ t'à Ishmael ı̨łèakw'eènǫ-daats'ǫ̀-taènǫ-daats'ǫ̀-łǫ̀hdı̨ (137) xo ts'ǫ̀ ı̨ı̨dà. Ishmael nǫǫde xàèhjı gà ełaı̨wo, eyıts'ǫ wecho gots'ǫ̀ ajà. 18 Wets'ıhɂǫ̀ǫ-dǫǫ̀ sìı Havılah nèk'e gots'ǫ Shur nèk'e hagǫǫwa ts'ǫ̀ nàgedè agejà. Kǫ̀ta Ashur ts'ǫ̀ ts'adè nı̨dè Egypt nèk'e ts'ǫ̀ nıwà-le agǫ̀ht'e. Hanìkò wets'ıhɂǫ̀ǫ-dǫǫ̀ ts'èwhı̨į̀ ełexè nàgedè ha dìì.

19 Abraham weza Isaac dıı hanì wegodıì dek'eèhtł'è:

Abraham, Isaac wetà hǫt'e. 20 Isaac dı̨ènǫ weghoò ekò Rebekah xè honìdza. Rebekah, Aram got'ı̨į̀ Betuyel wetì hǫt'e, Padan-Aram nèk'e gots'ǫ dǫ hǫt'e, eyıts'ǫ Laban wedè hǫt'e.

21 Isaac wets'èkeè Rebekah chekoa wets'ǫ-le t'à yegha gots'ǫ̀ K'àowo ts'ǫ̀ yaı̨htı. Gots'ǫ̀ K'àowo yets'àı̨dı t'à wets'èkeè hotıeda-le ajà. 22 Bebìa nàke weyìı ełets'agehchı t'à hadı, “Sexè dàgot'ı̨į̀-agot'ı̨?” Yek'èezǫ ha nıwǫ t'à gots'ǫ̀ K'àowo daehke.

23 Gots'ǫ̀ K'àowo yets'ǫ̀ hadı,

24 Hòt'a weza gıgǫ̀hłı̨ ha nìkw'o ekò ełèchǫekèa dǫzhìa nìı̨la. 25 T'akwełǫ̀ǫ̀ wegǫ̀hłı̨ı̨ sìı wekwǫ̀ ekìı dek'o lanì. Hazǫǫ̀ ts'ǫ̀ wezhį̀į̀ k'e weghàà dehshoa lanì, eyıt'à Esau wìyeh agı̨į̀là. 26 Wek'è wechı wegǫ̀hłı̨ ekò edı̨ı̨de Esau wekehtà yàıtǫ̀ hanì wegǫ̀hłı̨. Eyıt'à Jacob wìyeh agı̨į̀là. Isaac ek'ètaènǫ weghoò ekò wets'èkeè ełèchǫekèa nìı̨la.

27 Eyı chekoa geèzǫ, ǫhdah gı̨ı̨lı̨į̀ agejà. Esau t'aa nàzèe-dǫǫ̀ elı̨ gha nàghò. Ekìı-ka nàzè wegha nezı̨. Ekò Jacob t'aa hotıı̨t'ee-dǫǫ̀ elı̨, edekǫ̀ wheda zǫ lanì. 28 Isaac ekìı-ka ts'ǫ bò wegha łekǫ t'à Esau ghǫneètǫ, ekò Rebekah t'aa Jacob ghǫneètǫ.

29 Įłàà Jacob bò xè tıwo dek'oo ehtse ekò Esau ekìı-ka nàzèe gots'ǫ nǫ̀ǫtła t'à bò ghaàwo. 30 Jacob ts'ǫ̀ hadı, “Sıì bò ghaehwhı dìì! Įwhąą̀ eyı tıwo dek'oo mǫ̀hdaa sàı̨dı!” yèhdı. (Eyı ts'ıhɂǫ̀ Esau Edom sı wìyeh. Edom gedı nı̨dè “dek'o” gedıì-agedı.)

31 Jacob yets'ǫ̀ hadı, “Età weza ǫhdaà nelı̨ t'à wets'ǫ t'asìı deɂǫ̀atłǫ nets'ǫ̀ ade ha sìı dıì-t'ıì sets'ǫ̀ neghǫ nàèdì nı̨dè tıwo neghàehdı ha,” yèhdı.

32 “Hòt'a bò dę t'asahde ha nìkw'o. Età weza ǫhdaà ehłı̨ı̨ sìı segha ayìı welè?” Esau yèhdı.

33 Jacob yets'ǫ̀ hadı, “T'akwełǫ̀ǫ̀ yatı nàtsoo seghàı̨ɂà,” yèhdı. Eyıt'à Esau yets'ǫ̀ yatı nàtsoo whehtsı̨ t'à goza ǫhdaà k'ę̀ę̀ t'asìı wets'ǫ̀ ade ha ı̨lèe sìı wechı ts'ǫ̀ weghǫ nàèdì.

34 Eyı tł'axǫǫ̀ Jacob, łèt'è eyıts'ǫ tıwo dek'oo Esau ghàı̨dì. Esau shètı̨ tł'axǫǫ̀ nıìtła gà xàèhtła. Eyıt'à Esau goza ǫhdaà k'ę̀ę̀ wetà ts'ǫ t'asìı weghǫ̀zhe ha ı̨lèe sìı wegha t'asìı wı̨ı̨zìı nadlı̨-le.