11
Sofari naye anagomba
kpwa kano ya kpwandza
kpwa kano ya kpwandza
1 Ndipho Sofari kula Naama achijibu achiamba,
2 “Dze, uno unji wa maneno usijibiwe?
Kuno kugombako sana kukuhende kukala una haki?
3 Dze, cho chibakocho chihende atu anyamale?
Na uberapho atu, usitiywe waibu?
4 Kpwa mana unaamba, ‘Mafundzo gangu ni manono,
chisha sina lawama mbere za Mlungu.’
5 Kalapho Mlungu angegomba,
kalapho angefwenula kanwaye akakujibu,
6 angekuambira siri za ikima,
mana ikimaye ni nyinji.
Chisha umanye kukala Mlungu akakutiya adabu chidide kuriko irivyostahili.
7 Dze, we unaweza kumanya siri za Mlungu?
Au kumanya mwisho wa iye Mwenye Nguvu Zosi?
8 Ukuluwe unatsupa mlunguni, we unaweza kuhendani?
Na chinache chinatsupa kuzimu, unamanyani we?
9 Chipimoche ni chire kuriko dunia,
na ni mpana kuriko bahari.
10 Achimtiya mutu jela,
na kumwiiha kotini, ni ani awezaye kumkahaza?
11 Kpwa kpweli anamanya atu asiokala na mana,
na aonapho uyi kaupuza.
12 Ela mutu mzuzu andaphaha ikima,
wakati foro andavyala mwanadamu.
13 Uchitakasa moyoo,
na umgolosere mikonoyo,
14 uchiika kanda yo dambi iriyo mwako mkpwononi
na usiriche uyi ukahenda mizi mwako nyumbani,
15 ndipho undaunula usoo bila lawama,
undaimarika na kundaogopha.
16 Undayala mashakago,
gandakala dza madzi garigotsupa.
17 Nago maishago gandangʼala kuriko mwanga wa mutsi,
na jizare rikale dza ligundzu.
18 Kpwa kpweli undakala salama, mana undakala na tumaini,
undarindwa na kuoya salama.
19 Uwe undalala na taphana ndiye kuondosa,
na anji andakuendza uaterye.
20 Ela matso ga atu ayi gandafunga jiza,
na njira zosi za kuchimbirira taandaziona,
nao andaona baha afwe.”