10
1 Dza maindzi ga kufwa gavundisavyo mafuha ga kunukato
uzuzu mchache nkuangamiza ikima na ishima.
2 Moyo wa mutu wa ikima nkumlongoza kuhenda mambo manono
ela moyo wa mzuzu nkumuhenda akosere.
3 Mzuzu nkukosa achili hata napho a njirani,
na kuonyesa chila mmwenga kukala iye ni mzuzu.
4 Mkpwuluo achikureyera, usiriche kazi kpwa riro,
mana uporeo unaweza kukuhenda ukafutirwa makosa makulu.
5 Kuna uyi wanjina nriouona phapha tsini ya dzuwa. Afalume na atawala nkuhenda makosa makulu, 6 anaphoapha azuzu vyeo vya dzulu na kupuza matajiri. 7 Nikaona atumwa akapanda dzulu ya farasi, na akulu ananyendeka na magulu dza atumwa.
8 10:8 Zaburi 7:15; Misemo 26:27Atsimbaye dibwa anaweza kuvoromoka mumo ye mwenye,
na abomolaye ukuta anaweza kuondzwa ni nyoka.
9 Atsongaye mawe ganaweza kumlumiza mwenye,
na aahulaye mbao zinaweza kumlumiza.
10 Mutu ahumiraye mbadzo ambayo taikanolwa, nkuhumira mkpwotse munji.
Ela ikima ichihumirwato nkumuhenda mutu aongokerwe.
11 Kuhumira mihaso ya kuzuwiya usiondzwe ni nyoka
kuna fwaida yani napho nyoka ikakuondza kare.
12 Maneno ga mutu mwenye ikima gana chibali;
ela mzuzu nkubanangbwa ni manenoge.
13 Mazungumuzoge nkuandza na uzuzu,
na mwishirowe kukala uyi na koma zenye,
14 naye karemwa kugomba.
Takuna awezaye kumanya ndigohendeka,
takuna awezaye kumuambira ndigohendeka bada ya kufwa.
15 Mzuzu nkuremwezwa ni kazi ndide,
hata asimanye njira ya kuphiira mudzini.
16 Shauriyo uwe tsi, ambaye mfalumeo ni barobaro,
na vilongozio anahenda sharee ligundzu.
17 Baha uwe tsi, uriye mfalumeo ni wa chivyazi cha chifalume,
na vilongozio anahenda sharee wakati wa sawa
ili aphahe nguvu wala si kpwa sababu ya ulevi.
18 Kpwa sababu ya uvivu, paa ra nyumba nkuhopa,
na kpwa kudzisagarira bure, nyumba nkuvudza.
19 Sharee nkuhendwa kpwa sababu ya kudziburudisha,
uchi nkuchangamusha maisha,
ela pesa ndiyo suluhisho ra chila chitu.
20 Usimlani mfalume hata kahi za maazogo,
usimlani tajiri hata uchikala mwako chumbani.
Mana nyama wa mapha anaweza kuhala kauliyo,
au chiumbe cha kuuruka chikaphirika habari.