KOLIDI EBEKUꞌ ALEVE LINGE IZESUꞌ ZUHO MINANIꞌ NETI LUHUVO NITEꞌ PAULOꞌ GIZE-NGIDINEꞌ NABA 1
Pauloꞌ Gizineꞌ Luhuvo Niteꞌ Meꞌmi Monovo
Pauloꞌ nene Izesuꞌ zuho loloꞌ neivo Guvelesi veꞌmo tiꞌ lo lo-imineꞌ ve: Gaza nene vo heta Zuda ve minamaniꞌ atoꞌ ve engiꞌ nene nenikumuꞌ gamazi lamineꞌ nene lo-ngemeline lo gimiselelesuve. Neꞌmine lineꞌ nene Aposolo 26:15-18 neuꞌ ningelesane. Neꞌmine lavo mino alingeꞌ nene Pauloꞌ aza Zuda ve minamaveti misubo ato atoꞌ mukikuꞌ nene mone mone ogo Kilisitoꞌnimuꞌ lo-ngeme ngemeꞌ ineꞌ ve. Neꞌmine oꞌmo novo nGiliki aleveti misuboꞌninguꞌ nene vineꞌ ve. Aꞌmine misubouꞌ numuno ebeꞌ ma minineꞌ gulive Kolidi ve laaꞌ aniꞌ nene naba goloso minineꞌ ve. Aꞌminguꞌ nene Guvelesi vemuꞌ gamazi lamineꞌ nene lo soto sotoꞌ ogo lo-ngemelesa vineꞌ ve. Eveneꞌ aꞌminguꞌ mukiꞌ gidini minaniꞌ nene nGiliki ve minaniꞌ ve. Idoꞌ Loma vesi Zuda vesi nene ma minaniꞌ ve. Idoꞌ nGiliki alevesi Loma vesi nene soza oꞌmoso ato atoꞌ mukitoꞌ nene ngopoꞌni laaꞌ aniꞌ ve. Idoꞌ heneni nganeni di igaꞌ aniꞌ sipi nene ebeꞌ ato atoꞌ mukita vilisa igaꞌ vigaꞌ adoꞌ nene aꞌmine Kolidi numuno ebekuꞌ nesi vi minisa vaaꞌ aniꞌ ve. Aꞌmine ebekuꞌ nene initeꞌ ato atoꞌ vaiꞌ goloso igi mili minaaꞌ aniꞌ ve. Aꞌminguꞌ nene eveneꞌ vaiꞌ gidini monovo golosoloꞌ eꞌmeti minaaꞌ aniꞌ ve. Pauloꞌ nene aꞌminguꞌ kilisimasi hamokisi ikeꞌni sigisi neꞌminesi ivileꞌ ivosa mino gamazi lamineꞌ apize ngeme ngemeꞌ neivo Zuda ve lingesi idoꞌ Zuda ve minamaniꞌ heta atoꞌ ve vaiꞌ gidini neꞌminesi nene aꞌmidoꞌ gili eleꞌvoleꞌ igi Izesuꞌ zuho liliꞌ aniꞌ ve. Aꞌminemuꞌ nene Aposolo 18:1-17 neuꞌ nene gato gelezo. Nelotiꞌ alingeꞌ nene Pauloꞌ aza misubo gohi mauꞌ Eheso numuno ebekuꞌ nene vo minineꞌ ve. Aꞌmine Eheso numuno ebekuꞌ minineꞌ gameneuꞌ nene eveneꞌ malite igi aꞌmine Kolidi aleveti monoꞌ muliseꞌninguꞌ nene geni ma minekaꞌ minekaꞌ ineꞌ nene igi li-imaniꞌ ve. Aꞌmine geni nene ma neꞌmino neive: Eveneꞌ nene hoꞌli ato atoꞌ nivave. Idoꞌ ve maliꞌmo melehi elenahine dave. Idoꞌ Izesuꞌ zuho linge ma nete nene Izesuꞌ zuho linge nene ngeleꞌmize gonitoꞌ milii Izesuꞌ zuho minamaniꞌ zasila ngeleꞌmizi vaaꞌ nave. Idoꞌ Kolidi ebekuꞌ Izesuꞌ zuho minaniꞌ nete Pauloꞌni luhuvo niteꞌ huli-di gili guno ilisa longoꞌ i-daniꞌ ve. Idoꞌ longoꞌ i-daniꞌ nene nevoꞌmine initekumuꞌ nene longoꞌ i-daniꞌ ve: Izesuꞌ zuho nene veneꞌ daaꞌ idoꞌ veloꞌ vaaꞌ nene ha ilizahe. Idoꞌ soza oꞌmoso niteꞌ lehizi-ngidaniꞌ initekutiꞌ nene ha nalizahe. Idoꞌ Izesuꞌ zuho Oꞌmosoꞌmi Sikalahuliꞌmo lehize-ngidineꞌ amuzo ato atoꞌ nene nadiisa igi mili ilizave.
Neꞌmine li longoꞌ ikevosa Pauloꞌ aza nene mene luhuvo niteꞌ monoꞌ godoloutiꞌ neineꞌ adoꞌ Pauloꞌ Luhuvo Niteꞌ Kolidi Alevetine Ve Lo Luhuvo Gize-ngidineꞌ Naba 1 meve nene neive. Aꞌmine luhuvo niteꞌ nene Izesuꞌ zuho Kolidi ebekuꞌ nizanguꞌ initeꞌ vo ladeni vadeni ineꞌ nemukisi idoꞌ longoꞌ i-daniꞌ mamukisi nene gize-ngidineꞌ ve.
1
Pauloꞌ Aza Izesuꞌ Zuho Kolidi Ebekuꞌ Minaniꞌ Nene Gekeꞌ Lo-ngedo Engikumuꞌ Oꞌmosola Isaaꞌ Neve Lo Opoꞌni Laaꞌ Ingumuꞌ Lo-ngimineꞌ
1 Izesuꞌ Kilisitoꞌ aposolo loloꞌ iline lo Oꞌmosoꞌmo gala gilidoꞌ neleꞌmize molave Pauloꞌ naza nene leze zuho Sositeniꞌ nesi makaꞌ mino 2 Kolidi ebeta Oꞌmosoꞌmi evenele lengita luhuvo initeꞌ mene nogize lingimuve. Lingine Izesuꞌ Kilisitoda igi giꞌmizikevo Oꞌmosoꞌmo eiꞌ evenele zuho minilizave lo do kegese-lingidineꞌ. Idoꞌ do kegese-lingidineꞌ nene ebeꞌ mukita engiꞌ Guveꞌinesi vesi leliꞌ Guvetesi vesi minive Izesuꞌ Kilisitoꞌni opoꞌni laaꞌ nave mukiꞌ nesi nene laminekovoꞌ lisiheꞌ igi minilizave lo eiꞌ evenele do kegeso lengeleꞌmize molaniꞌ ve. 3 Ee, naza nene luhuvo initeꞌ mene lengita nogize lengemo Oꞌmoso metehidasi Guvetesi ve Izesuꞌ Kilisitoꞌ eitasi nene lengiꞌ nasahiliꞌ i-lingidikesivo lengiꞌ muludinguꞌ nene hongu minelive lo engita noluve.
Engita Monoliꞌmi Amuzo Sotoꞌ Ilingumuꞌ Pauloꞌ Aza Oꞌmoso Opoꞌni Lineꞌ
4-6 Naza Kilisitoꞌ gamaziꞌve lamineꞌ nene lo-lengemekuvo aꞌmine gamazi nene gilikevo lengita lutinguꞌ amuzo molosa minineꞌ ma neive. Neꞌmo nene lingine mo Izesuꞌ Kilisitoda igi giꞌmizikevo Oꞌmosoꞌmo nasahiliꞌ o-lengedo lutinguꞌ nene monovo danava laminekovoꞌ goꞌzo vaiꞌ lo-lengedave. Neꞌmo gele guno ogaꞌ nene lengita mo vaiꞌ lavo gamazi li sotoꞌ igaꞌ naniꞌ nene laminekutikovoꞌ laaꞌ nave. Ee, neꞌmino Oꞌmosoꞌmo lengiꞌ nasahiliꞌ o-lingidineꞌ nemuꞌ nene naza Oꞌmosola isaaꞌ neve lo gamene gamene opoꞌni laaꞌ nouve. 7 Idoꞌ Oꞌmosoꞌmo neꞌmino nasahiliꞌ o-lingidineꞌ nenako nemuꞌ nene Guvetesi ve Izesuꞌ Kilisitoꞌ ogo sotoꞌ neivo ningeloneꞌ gamenemuꞌ gizebo igi minangumuꞌ nene monovo danava lamineꞌ ato atoꞌ Oꞌmosoꞌmo eze evenele lehize-ledaaꞌ neingutiꞌ nene lingine monovo danava hamokisi ma viseꞌ isaꞌmave. 8 Oꞌmoso aza hize eleꞌ o-lengedeꞌmo vo neivo gamene naba aliteleseive. Neꞌmine ogavo Guvetesi ve Izesuꞌ Kilisitoꞌ alineꞌ gameneuꞌ nene okodidoꞌ gamazi nomivo laminekovoꞌ ha minilisave. 9 Oꞌmosoꞌmi gipele leliꞌ Guvetesi ve Izesuꞌ Kilisitoꞌ eikisi lutine hamoꞌ ogavo minilizave lo lengeleꞌmize molave eiꞌ nene gote izesaꞌmineꞌ ve. Idoꞌ eze gamazi lineꞌ nene vo haza amilineꞌ nenako nemuꞌ aꞌmine luvoniꞌ gamazi nene asiꞌve Oꞌmoso neꞌmo do sotoꞌ ogo do gihile izeleseive.
Kolidi Aleve Ingine Monokumuꞌ Ve Li Hoꞌli Vi Eza Ema Vangumuꞌ Pauloꞌ Lineꞌ
10 Agae, neze zuhokizo, Guvetesi ve Izesuꞌ Kilisitoꞌ eiꞌ velemuꞌ ogo gatine doo gamazi tiꞌ lo nolo-lingimuze. Gililo. Lingine gamazi ato atoꞌ li vi eza ema vamilo. Mukitoꞌ lingine gohi di bizii igi lutine di hamoꞌ igi hamoꞌ lutidokovoꞌ minilo. 11 Neze zuhokizo, naza mene gamazi noluvoniꞌ nene Koloveꞌ zuho linge malite lingine nene lutine aka ato atotoꞌ vavosa nene lolize hizi izi huki vi eza ema vaaꞌ nave li-nimikevosa nene noluve. 12 Neꞌminemuꞌ nene noluve: Lingine vi eza ema vi hamo hamoꞌ neꞌmine laaꞌ nave: Laza Pauloꞌni eꞌmetaaꞌ noune. Idoꞌ ma nete Apoloꞌni eꞌmetaaꞌ noune. Idoꞌ ma nete nene Petoloꞌni eꞌmetaaꞌ noune laaꞌ nave. Idoꞌ ma nete nene Kilisitoꞌni eꞌmetaaꞌ none laaꞌ nave. 13 Neꞌmine nene nanitekumuꞌ nilave. Kilisitoꞌ nene hoꞌlo ato atoꞌ vaiꞌ minamive. Pauloꞌ naza nene lengiꞌ do lunguꞌ izelesa lohotoꞌ zaloꞌ ma helamuve. Lingine noso hili-lingidaniꞌ nene neniꞌ Pauloꞌ muliseuꞌ nene ma imi hilamave. 14-15 Idoꞌ eveneꞌ ma nenikuꞌ imi hilikevo naza nene neniꞌ Pauloꞌ gulivelokovoꞌ noso holo-ledave li gilikelizave lo lingine noso hili-lingidangutiꞌ ve sitakovoꞌ Kilisipoꞌni ve Gaioꞌni ve engiꞌ nevoꞌ nene neniꞌ noso holo-ngedo gohi ma holo-lengedamuvoniꞌ ma nene lamineꞌ ve lo nogiluve. 16 Idoꞌ ma nene Setehanoꞌ ve eze zuhosi noso holo-ngiduvoniꞌ nenako nelotiꞌ nene noso ma holo-ngiduhe holo-ngedamuhe gelamuve. 17 Kilisitoꞌ aza nene eveneꞌ monoꞌ noso holo-ngedeline lo nimiselamive. Eiꞌ gamaziꞌve lamineꞌ nene lo-ngeme ngemeꞌ iline lo lo-nide neineꞌ ma neive. Nemuꞌ nene naza lengikutiꞌ mukiꞌ noso holo-lengedamuvoniꞌ nene lamineꞌ ve lo nogiluve. Idoꞌ naza gamazi lo sotoꞌ sotoꞌ ogo gamazi loloniꞌ nene Kilisitoꞌ lohotoꞌ zaloꞌ hilineꞌ gamaziꞌmi amuzo nene molo hitalonako eveneꞌ gamazi monovo gili miniꞌ miniꞌ igi gepeꞌ gamazivoꞌ laaꞌ navete laaꞌ naniꞌ neꞌmino lamo haza gili ngolosi gililizadokovoꞌ lolosuve.
Oꞌmosoꞌmi Amuzoꞌvesi Idoꞌ Gala Lamineꞌ Gelaaꞌ Neineꞌ Nesi Kilisitoda Mo Neive Lo Pauloꞌ Lo-ngimineꞌ
18 Kilisitoꞌ do luꞌ izelesa hilineꞌ neꞌmi gamazi mamuꞌ aka golosouꞌ nivaniꞌ eveneꞌ nete nene negi gamazi laniꞌ ne neive laaꞌ nave. Neꞌmine laaꞌ naniꞌza Oꞌmosoꞌmo do luꞌ izo do eita eita oꞌmo novineꞌ aleve leliꞌ nete nene aꞌmine gamaziuꞌ Oꞌmosoꞌmi amuzoꞌve sotoꞌ ogo neineꞌ nene ningo gele none. 19 Ee, idoꞌ Oꞌmosoꞌmo aꞌminemuꞌ lineꞌ gamazi monoꞌ godolouꞌ ma tiꞌ li gizi nizaniꞌ ma neive:
Naza nene gamazi monovo gilaaꞌ navete gamazi gilaaꞌ naniꞌ nene
do goloso o-ngedelesuve.
Idoꞌ luꞌine gaꞌninguꞌ gamazi lamineꞌ minineꞌ nene lokuvo vo haza oloseive.
20 Tiꞌ lo lineꞌ nemuꞌ gamazi monovo gilaaꞌ avemukisi idoꞌ initeꞌ mukikumuꞌ sukulu li osuꞌ lavemukisi idoꞌ gamazi li voleloꞌ meloꞌ igi initeꞌ monovo viseꞌ igaꞌ ave idise gameneuꞌ nizave nemukisi nadive lo gelelone. Me misubouꞌ minunive nene aꞌneꞌmine vete laniꞌ gamazimuꞌ gamazi gihile ve lo giluneꞌ gamazi nene Oꞌmosoꞌmo lavo haza gopo negi gamazi loloꞌ oganako nemuꞌ nene aꞌneꞌmine ve ingine nene mo haza ve loloꞌ ikeve lo gelelesune. 21 Ee, misubouꞌ ve nete Oꞌmosoꞌmi monovomuꞌ gele veveselone li viseꞌ aniꞌza aza Oꞌmosoꞌmo gala lamineꞌ gilidoꞌ do molo lavo engiꞌ gili vevesaaꞌine nene eze monovo ningilizadoꞌ lisiheꞌ amivo eze monovo nene mo ningamaniꞌ ve. Idoꞌ neꞌmine igi engiꞌ gamazi laminekutiꞌ nene eze monovo ningamanako nemuꞌ Oꞌmosoꞌmo eiꞌ luloloꞌ do molo aꞌmine negi gamazi ve laaꞌ naniꞌ gamazi nene nolo-ngimunivo ve ma ingine aꞌmine gamazi gili eleꞌvoleꞌ ave nene Oꞌmosoꞌmo do nguꞌ izaaꞌ neive. 22 Gili eleꞌvoleꞌ ave nene ha do nguꞌ izaaꞌ neiha ingine Zuda ve nete nene tiꞌ li laaꞌ aniꞌ ve: Oꞌmosolatiꞌ gamazi nene mo eitatiꞌ neive lo gele eleꞌvoleꞌ oloneꞌ nene atoliꞌmine suno ma sotoꞌ ogavo ningosavoꞌ nene gele eleꞌvoleꞌ olosune. Neꞌmine lisa haza minaaꞌ nave. Idoꞌ heta atoꞌ ve nGiliki aleve ingine nene initeꞌ ato atoliti gamazi gihileꞌvemuꞌ nene viseꞌ iꞌmi vi minaaꞌ naniꞌza 23 laza nene Kilisitoꞌ do luꞌ izelesa lohotoꞌ zaloꞌ hilineꞌ neꞌmi monovoꞌvevoꞌ nene lo sotoꞌ ogo lo-ngeme ngemeꞌ ogaꞌ noune. Neꞌmino nonivo Zuda ve nete lohotoꞌ za nene initeꞌ goloso mamuꞌ nilave li olovoꞌ goloso igaꞌ nave. Idoꞌ heta atoꞌ ve nete aꞌmine gamazi nene gamazi gihile nevoba negi gamazi ve lii gili eleꞌvoleꞌ isaꞌmave. 24 Ingine nene neꞌmine igaꞌ naniꞌza laza Zuda vesi nGiliki vesi Oꞌmosoꞌmo elese molo limidoꞌ eꞌmetunive nene Oꞌmosoꞌmo gala lamineꞌ gelaaꞌ neineꞌ nesi amuzoꞌve nesi nene Kilisitoda neineꞌ nene mo gele none. 25 Ee, Oꞌmosoꞌmo ogaꞌ neineꞌ initeꞌ nene negi initeꞌ ogaꞌ neive laaꞌ naniꞌ neꞌmo nene evenelite gaꞌine lamineꞌ gili igaꞌ naniꞌ initeꞌ nene ivileꞌ ogosa initeꞌ gihile neive. Idoꞌ Oꞌmosoꞌmo ogaꞌ neineꞌ initeꞌ nene amuzoꞌvesi nomineꞌ initeꞌ ogaꞌ neive laaꞌ naniꞌ neꞌmo nene evenelite amuzo mili igaꞌ naniꞌ initeꞌ mukiꞌ nene ngivileꞌ ogo amuzoꞌvesi initeꞌ neive. Neineꞌ nenako nemuꞌ nene Oꞌmosoꞌmo gala lamineꞌ gelaaꞌ neineꞌ nesi idoꞌ amuzoꞌvesi nene Kilisitoda mo neineꞌ nene gele none. Idoꞌ me misubouꞌ alevelite gamazi lamineꞌ ve li gilaaꞌ naniꞌ gamazi nemuꞌ nene Oꞌmosoꞌmo gilivo haza niteꞌ loloꞌ ogaꞌ neineꞌ nesi nene mo gele none.
26 Neze zuhokizo, lingine nene Oꞌmosoꞌmo eiꞌ ve lo elese molo lingimive ma nene nizave. Idoꞌ naniꞌmine aleve nizahe nemuꞌ gililizaniꞌ nene gamazi neuko luvoniꞌ mautiꞌ nene gamazi gihile neive li gili ngoloꞌ li gililisave. Idoꞌ lengiꞌ monovotine nene neꞌmino neingumuꞌ noluve: Me misubouko eveneꞌ mukiꞌ nete lengikumuꞌ nene gilavo lengikuꞌ nene gatinguꞌ gamazi lamineꞌ minive nene mukiꞌ ma minamave li gilaaꞌ naniꞌza lengiꞌ aꞌneꞌmine ve nene Oꞌmosoꞌmo eiꞌ ve lo elese molo-lengedo lengeleꞌmize molaniꞌ ve. Idoꞌ eveneꞌ amuzo malehe nene lengikuꞌ mukiꞌ nizamavo idoꞌ eveneꞌ ma izeꞌninge meꞌninge eveneꞌ naba nizavo sotoꞌ adiꞌmo guveꞌinesi ve gili nizaniꞌ aleve nene lengikuꞌ mukiꞌ ma nizamaniꞌza lengiꞌ neꞌmine aleve nene Oꞌmosoꞌmo eiꞌ ve lo elese molo-lengedo lengeleꞌmize molaniꞌ ve. 27 Neꞌmino leleꞌmize molaniꞌ nene eveneꞌ naba nevoꞌminevoꞌ leleꞌmize molaniꞌ nevoba Oꞌmosoꞌmo me misubouꞌ aleve malite eveneꞌ mamuꞌ negi nizave li li-ngidaaꞌ nave ma ngeleꞌmize molokuvo ingine eveneꞌ gaꞌine gili lamineꞌ igaꞌ ave di limi-ngidikevo ngovozo hili minilizave lo aꞌneꞌmine ve do kegeso ngeleꞌmize molaniꞌ ve. Idoꞌ me misubouꞌ alevelite eveneꞌ mamuꞌ gilizevo nizave li li-ngidaaꞌ nave ma ngeleꞌmize molokuvo ingine eveneꞌ amuzo malehe nizave di limi-ngidikevo ngovozo hili minilizave lo Oꞌmosoꞌmo aꞌneꞌmine ve do kegeso ngeleꞌmize molaniꞌ ve. 28 Ee, misubouꞌ aleveti veꞌnidoꞌ nene haza ve limi minii haza niteꞌ gehepeve gili minave nene Oꞌmosoꞌmo do kegeso ngeleꞌmize molavo aꞌneꞌmine ve nete eveneꞌ none laaꞌ ave nene ngivileꞌ igi minikevo haza niteꞌ loloꞌ ilisave. 29 Idoꞌ Oꞌmosoꞌmo neꞌmine ogaꞌ neineꞌ nene eveneꞌ malite eiꞌ veleloꞌ oti mini engiꞌ okoꞌine di hozi likelizave losa engiꞌ akaꞌine nene hize tile-ngedosa neꞌmine ogaꞌ neive. 30 Neꞌmine ogaꞌ neineꞌza lengiꞌ nene Oꞌmoso neꞌmo Izesuꞌ Kilisitoda do imineꞌ molo-lengedave. Neꞌmine ogo aꞌmine Kilisitoꞌni nene gateuꞌ gamazi lamineꞌ minineꞌ neꞌmi izelehine loloꞌ o-dave. Idoꞌ loloꞌ o-davo asiꞌve neꞌmo nene lelitoꞌ medelo minevoꞌ alevoꞌve hulo helo Oꞌmosoꞌmi veleloꞌ eveneꞌ lisiheꞌ laminekovoꞌ minilizave lo goloso initeꞌ apase-ledoo Oꞌmosoꞌmi evenele loloꞌ o-ledo aza golosoutiꞌ mudise leleꞌmize lamineꞌ oloseive. 31 Idoꞌ Oꞌmosoꞌmo neꞌmine neineꞌ nene monoꞌ godolouꞌ gamazi ma tiꞌ li gizaniꞌ maloꞌ nene eveneꞌ mukiꞌ eꞌmetilizave losa neꞌmine ineꞌ ve: Ve ma aza eiꞌ okoꞌnomuꞌ olize noizelineꞌ nevo alamo Guvelesi vemukovoꞌ olize izelive.