1 Te Israel dabego te Kenan tǫ sali. Te pris bidi Eleasar, me Josua te Nungo ogwa, tama tigidali Israel hani tobolu bidi dabego hani sibi deli deli augwalibolo te tǫ dobayali. 2 Hasia bolo Genuai Bidigo Mosesbolo te po wali gilama eyu, te tobolu bidi dabego te mena hani sibigo te mena tǫ sabo po dodolama, tama te tǫ te a naga olama, me si me si haniba dobayali. Tama augwaligo te tiwai yali. [Nam 26:52-56; 34:13] 3-4 Tama polobadu Mosesgo te tǫ deli deli pedai badu te hani sibolo mayu, tama gasa Israel hani me badubolo mayu, te Jordan wę te giliga pedalubo badu mobadi yali. Te Josepgo hani wąį dabe te hani si bugali, Manase me Efraim. Tiali goli, Mosesgo te Livai hani dabebolo te tǫ me mabeo. Augwaligo te hanu meba naga sali. Tama te hanude te augwaligo bulmakau me sipsip dabe elaluali, te hanu dabe pąde nosai elalubo digi me augwaligo sali. [Nam 32:33; 34:14-15; Bom 3:12-17] 5 Te Israel dabe augwaligo te tǫ tama dobayali, te Genuai Bidigo Mosesbolo wali gilama tama tiali.

6 Te tǫ dobayabo sogode, te Juda bidi dabe meba te Josua bidibo digi te Gilgalba sabolali. Tama Kalep te Jefunego ogwa, te Kenas bidi, te e tiwai po Josuabolo wali, “Nago koneani, te polobadu Genuai Bidigo te Godigo sę bidi Mosesbolo te po wali, te da sibolo te Kades Barneade wai dao. [Nam 14:30] 7 Te sogo eno kibu be te bidi sese si, te 40 yia elalubadi, tama Genuai Bidigo sę bidi Mosesgo ena te tǫ Kades Barnea te ena geme sa pabo bidi tagala palali. Tama eno tede suali nai po mu te po eno te Mosesba wagasali. [Nam 13:1-30] 8 Tiali goli, te ena dali pali bidi dabe augwaligo te we bidi wi ebo sę ilali. Tiali goli, eno te dago Genuai Bidi Godigo po bugagia dolo wali pali. 9 Tama tibaso, Mosesgo te tiwai po me deli ena dali te sogo dąų wali. Agai te po wai, ‘Nago te God wali bugagia pali, te dago Genuai Bidi da, tama tibaso, nage me, nago ogomani dali, te nage bilali tǫ pedai badu siyu, tama augwaligo te tǫ sesemane sogo elalua pidu, mu elalua paibao,’ te po wai.” [Nam 14:24]

10 Tama Kalepgo te tiwai po ma weyu, te po wali, “Nago odao. Genuai Bidigo Mosesbolo te tama po olama, tama nosali te Israel dabe augwali te masigi kemi tǫde bilalubadi, tama megi da, te kibu be bidi sese si olama, a naga silalio. Tiali goli, Genuai Bidigo ena tau sobaso, tama ena megi e sogo me bidibao. Tialima, nago ena suao. Eno kibu be te bidi sese me si me si elama, te nogo a naga, te 85 kibu be yalio. 11 Tiali goli, megi te eno bomo me elalubo, te polobadu ena teba biligi pomainu tagala palali tiwai gilama elalubo. Te ena bomo me elalubadi, tama eno te boi hwįgi pelama, tama tigidali sę eno ela silabo megi me usu dao, te eno polobadu yali gilama elalubo. 12 Tialima megi da, te Genuai Bidigo enabolo te mawaibao wali te bulu du tǫ pesage te enabolo mao. Te polobadu sogo nago odali, te ena me, te ena dali pali bidi dabe, dago te nai suali po Mosesbolo pusali. Te Anakde moni bidi dabe te bulude bidalubadi, tama dago nagebolo wai. Augwali te genuai obo yai hanude bidalubo po wali. Te Genuai Bidi ena dali bidiyu da, teda te bidi dabe augwali eno ela gudulaiba homu ebao, te agai wali po tiwai gilama yaibao,” Kalepgo te po wai.

13 Tama Josuago te Kalepgo wali po odama, tama agai te Godigo nage dali dwagi yai sę emainao po te Kalepbolo wali, tama te Hebron hanu agabolo manio, te aga sabo tǫ mu tama dao. 14 Kalepgo Godigo po bugagia wali pali da, God da te Israel dabego Genuai Bidi dao. Tama Hebron hanu te Kalepgo wąį hanigo tǫ gagalama bidali, te Jefunego ogwa, te Kenas bidi dao. 15 Polobadu te Hebron hanu nogi te Kiriat Arba nogi yali. Tama Arba te Anak bulude te moni bidi me deli bidai.

Tialima, te tǫ Kalepgo selama, tama te sogo da te bulude wąbi munu ma hwįsąma, bidaluali.