31
Te Israel dabe ma aselama, te augwa tǫde digi bugagia bidaibao
1 Genuai Bidigo te tama po wai, “Te eno bodolu muani sogo yagasobode, teda ena te Israel hani tigidali augwa God bidaibao, te augwali eno we bidi hani mu pedelaibao. 2 Ena Genuai Bidigo, eno te po obao, te Israel dabe te boi bidide wi pelama, te masigi tǫ kemi bulude bidali. Tialima, eno augwali godolo elama, te eno augwaliba wiegi yai sę ebaso, te augwali toma nabo buluba soaibao,” wali. * Te ves 1 tedu gagalasa pelama, te ves 22 te tomode elalubo po dabe te Israel we bidi augwalide wali po polobadu te kantri Israel te not badu te kantri Judade bidali. Te hani augwaligo dwai kolesaga ebaso, te Godigo augwali te boi bidi dabego te augwa tǫ kantri bulu sela pelama, bidigi pomainogo yai, “te bulu kantri not badu dao.” (ves 8) Augwali te bulu kantride bobage sogo bidalio, tama megi da, Godigo te augwali ma odasa aselama, te tigidali Israel deli hani pedelama, te God dologode bugagia bidimainogo yalio. Samaria taun te (ves 5 tede wali) Israelde genuai taun elaluai. Te Efraim hanigo po ves 6, me 9, me 18, me 20, tede elalubao, te Israel hani dabede aga te genuai hani mu me deli elaluai, te Godigo Efraim nogi ebo sogo, agai te tǫ not badu bidali Israel hani tigidalide po olama te po walio.
3 Genuai Bidi te digibulu buludu aselama,
te ena, Jeremaiaba pedelama, te tama po wali,
“Dage Israel, eno dage sesemane sogo godolo elama,
te eno wiegi yai kolesaga dageba ebao,
te dage ena pageba asomainogo tebo dao.
4 Dage Israel, eno gedude dage te bidi dali pagela
pisąwai gesi we tiwai dao.
Tama te eno dage bomai hani we bidi ma pedalumainu
yaibao.
Te gesi ogwa wego pemene elama, hąbidi eleyu,
te tęąbi wabo hani dabe dali pemene ebo tiwai
dagego yaibao.
5 Tama dagego gesi wain gi te Samaria bulu du bagede
nigaibao.
Tama duga digi te wain dabego ge du saibao.
6 Te sogo te Efraim hanigo bulu dude bidibo tonalubo
bidi dabego, augwa te tama i waibao,
‘Tegoba, da te Saion bulu duba pinao.
Da Genuai Bidiba pobao, dena God dao.’ ”
7 Genuai Bidigo te tiwai po ma wali,
“Te Jekopgo haniba wiegi yai pemene ebo tęąbi po wao,
te hanigo te tigidali gasa hani dabe edelama,
polalubo mu dao.
Te enabolo genuai nogi mabo tęąbi weyu,
te tiwai po wao,
‘Genuai Bidi, naga we bidi dabe ma sao,
te me badu bidali hani Israel pedai dao,’ te po wao.
8 Mu tama, ena Genuai Bidigo eno te ena we bidi dabe
te tǫ kantri not badu,
me tigidali tǫ pedai badu selama,
te augwali ma odasa asaibao.
Te gedu widai dabe, me sągą dwai, me te haliga elalubo
we dabe,
me te wai tega painogo ebo we dabe,
augwali me asaibao.
Te Israel genuai hani mu pedelama,
te augwali augwa tǫba digi ma asaibao.
9 Te eno augwali odasa asobo sogo, augwa gela weyu,
enaba gedu haluasa po weyu, tama asaibao.
Te eno augwali dodolo asu,
te augwali eno wiegi yai wę elalubo pesageba
pedelama,
te eno augwali doloba pai sunumidu odasa asu,
te augwali me tula mugobeo.
Eno te tama tiwai yaibao, magi baso meni, ena te Israel
hani dabego Aya bidibao,
tama Efraim te eno gomunai wai tiwai dao,” wali.
10 “Dage te me badu tǫ kantri hani we bidi dabe,
dagego ena Genuai Bidigo poba bugagia olo muao.
Tama dagego eno te po te digibulu bidibo we bidiba
pusao,
te tamu ąį u badu bidibao.
Dagego te tiwai po augwaliba wao,
‘Genuai Bidigo te Israel dabe sela sąnama, tedela
palali,
tiali goli, agai augwali ma odasa asaibao.
Te agai augwali bugagia mu tonalu,
te tonalubo bidigo aga sipsip dabe
tonalubo tiwai ebo dao.’ Te po wao.
11 Ena Genuai Bidi, eno augwali te Jekopgo hani dabe
ma saibao.
Awe, te boi bidi dabego bomogo augwaligo bomo edelai
goli,
eno augwali te bomai boi bidi dabego nogode
ma dobola saibao.
12 Tama augwali te Saion bulu duba dolugulama,
te augwali wiegi yai pemene mu elama,
te i umabo mu udaibao.
Te ena Genuai Bidigo augwaliba te wiegi yai nai mu
mobaso,
te augwali wiegi yai pemene yaibao.
Te augwaligo wiegi yai pemene ebo te nai witba,
me wain, me oliv wel, me te kibu sipsip dabeba,
me eno mabo bulmakau dabeba te augwaligo homu
pemene yaibao.
Te wiegi yai mu pedalama,
te gi wę usu elalubo gi tiwai dao.
Te augwali dwai munu ma bidibeo.
13 Te sogo te wegi ogwa we wiegi yai homu pemene
elama,
te tęąbi po weyu, te gesi bidi me, monu dabe me,
pemene yaibao.
Eno augwali homu dene ebo silama,
te augwali bugagia haliga tegalumainogo yaibao.
Te eno augwali haliga nagame elama, dua digi bidiyu,
pemene emainogo yaibao.
14 Te we bidi dabego ofa hauwa enaba selasa asaibao.
Tama tibaso, te pris dabe augwa nai hauwa elalueibao.
Tama eno te wiegi yai nai hauwa te eno we bidi dabeba
mawaibao.
Ena Genuai Bidi, eno te po wai dao,” wali.
Genuai Bidigo olo tau mabo wiegi yai kolesaga te Israel dabeba yaibao
15 Genuai Bidigo te tiwai po wali,
“Genuai gela wabo me, te hobede ebo po me,
te Rama taunde pedelaibao.
Te we Reselgo aga wai dabe isaide te hobedai gela
Te aga te we bidi dabego wiegi yai haliga penebo aga
hagela homu yali,
magi baso meni, aga wai dabe tigidali te munu
me bidibeo. [Gag 35:16-19; Mt 2:18 ]
16 Tialima, ena Genuai Bidi, eno po obao,
Resel, nage gela munu ma wagio.
Nago gedude gela ąį hola sąyao.
Nago gela odolali me wabeo. Menio.
Te nago hani wai dabe augwaligo boi bidi dabego tǫ
kantri tagalama,
nageba ma asaibao.
17 Ena Genuai Bidigo eno te po obao,
nago homu te pedelainogo ebo naiba kone palama,
tama te naga te hani wai dabe te augwa page
buluba ma asobo sogo tonaluagameo.
18 Te Efraim hani dabego gela wabo eno mu odalio.
Augwa gela weyu, te tiwai po wali,
‘Genuai Bidi, nago da keloago elali, te nago da dodolali,
te bidigo te hagoma ebo ogwa bidi bulmakau elibo
tiwai yai.
Genuai Bidi, nage naga dago God,
te da nageba ma asabo homu ebao.
Tama tialima, nago da odasa asao.
19 Dago nage tagalali, tiali goli, megi da,
dago haliga begelalio.
Te dago dena yali dwai sę koneama, da hale mu elama,
dago tobolu basi gulali.
Polobadu dago hani dabe augwali te gesi we bidi tiwai
bidalu,
te dwai kolesaga hauwa yali.
Tialima, megi da,
da dena te dwai kolesaga yalide hale dwai mu ebo
dao.’
Te Efraim hani bagego te po wabo eno odali.
20 Ena Genuai Bidi, eno te po obao,
eno Efraim te godolo mu yali, aga eno ogwa dao.
Tigidali sogo eno aga nogi wedu,
eno agade homu kone yai.
Eno haliga agaba mu mudubadi ebao.
Tialima, eno olo tau sabo wiegi yai kolesaga agaba yai
dao.”
21 “Dage Israel, eno gedude dage te bidi dali pagela
pisąwai dwagi yai gesi we tiwai dao.
Tama dagego te duga page bulu tagalabo sogo,
te dagego wali pabo sunumi bugagia koneao,
tede te dąį dabe ilao.
Magi baso meni, nosali te dage ma asobo sogo dagego
te duga sunumide muani dąį sulama,
te sunumi bugagia wali pomainogo tama yao.
Dage Israel, megi da, dage te duga taunba ma asao.
22 Dage te ena wegi wai tiwai,
tiali goli, dagego ena tudiba muani.
Mena sogo te dagego haliga si ebo tagalama,
te enaba ma asaibawe?
Ena Genuai Bidi, eno gesi noma kolesaga te tǫde yaibao.
Te kolesaga e tama dao.
Wego digi te bidi pageabi elama, te agaba hanalu,
te aga godolo eba waibao,” wali.
Genuai Bidigo we bidi augwali bugagia dugulalueibao
23 Israel hanigo God, aga Tigidali Bomo Elalubo Genuai Bidi, agai te tiwai po wali, “Nosali eno te kantri Juda bugagia elalumainogo yaibao, te Juda dabe augwatǫ te augwa taunde bidaibao. Te augwa te po waibao, ‘Nage Genuai Bidigo bulu du, Genuai Bidi nagede bidiyu, te wiegi yai doloba pai kolesaga mu ebao. Genuai Bidigo nageba wiegi yai sę bugagia mu emainao,’ te po waibao. 24 Te gide sę ebo bidi dabe, me te sipsip tonalubo bidi dabe me, augwali te Juda dabego tǫde bidiyu, te taun dabede me bidaibao. 25 Te bidi me deligo tigi bomo silibaso da, teda eno aga dąų walaibao. Tama te bidi aga haliga sęgę elalubaso, te eno agai haliga usu naibao,” wali.
26 Tialima, ena, Jeremaia, ena hodaluama, tononobilibadi, te ena bugagia godege piali homu ebo dao. ‡ Te po page bugagia mu konebeo, tama me te dego te po pusali homu ebao. Te Jeremaia aga digi, ma gasa bidigowe?
27 “Ena Genuai Bidi, eno te tiwai po wai, eno tebodolu me deli munama elalubo, tama te sogo eno te webidi dabe, me te hasa sibi hauwa, te Juda tǫde me Israeltǫde pedalumainogo ilaibao, te bidigo gide sę elama, naihauwa pedalubo tiwai yaibao. 28 Polobadu augwali enotonaluali, te gudumainu, me augwali alumainogo eyu, meaugwali aiyaba elalumainogo eyu, augwali dolomainuelama, te dwai sę augwaliba emainogo yai. Tialima, megi da, ena Genuai Bidi, eno te po obao, te augwali enotonalu, te augwali nigilama, te augwali bulama, te augwalibugagia bidaibao wai dao. 29 Tama te sogo da, dagewe bidi dabego te tiwai po begelama, munu me wagobeo, ‘Te aya idago te wain du tau isąwai tuali. Tialima, te augwa wai puluba pedauwalide ha yalio,’ me wagobeo. [Ese 18:2] 30 Menio. Te sogo da, te bidigo dwai sę me ebaso da, te aga digi naga isaibao, te aga wai dabe tede isigobeo. Te bidigo te tau isąwai wain du tuali tiwai ebaso, te aga pedauwalide digi naga ha yaibao,” wali.
31 Genuai Bidigo po ma weyu, te tiwai po wai,
“Odao, eno te sogo bodolu me deli muai,
tama eno gesi noma dąų wabo po te Israel hani dali,
me Juda dabe dali dąų waibao.
[Mt 26:28; Mk 14:24; Lu 22:20; 1 Ko 11:25; 2 Ko 3:6]
32 Te dąų wabo bomo yai po te polobadu eno duga
wąį nǫų dabe dali yali tobage tiwai meni,
te eno augwali te Isipde selama,
te augwali nogo tolasa odasa asai.
Augwali te eno we tiwai bidibaso,
te ena, Genuai Bidi, ena te augwa bidi tiwai bidali.
Tiali goli, augwaligo te polasa dąų wai elaluali bomo ya
i po te bolai dao.
33 Tialima, eno te Israel we bidi dali dąų wainu ebo
bomo yai po e tiwai elalubao.
Te eno bomo yai po augwaligo homude munama,
te augwaligo haligade te bomo yai po asębo tiwai
yaibao.
Te ena augwaligo God bidiyu,
te augwali eno we bidi hani dabe bidalueibao.
[Hi 10:16]
34 Te ena Genuai Bidi, eno po dolo obao,
te sogo te bidi dabego te augwa abagi dabe,
me augwa ama dede, te po ola mabo po weyu,
te tiwai po weyu, ‘Dagego Genuai Bidi koneiąo,’
po me wagobeo. Menio.
Te nogi meni yai bidi, me nogi elalubo dabe,
tigidaligo ena koneaibao.
Magi baso meni, te eno augwa sęgę tagalama,
te eno augwaligo yali dwai sę homu kone munu me
egobeo,” wali. [Hi 8:8-12; 10:17]
35 Genuai Bidigo giliga muani te ula momainogo yali,
tama agai polua me hǫ dabe dąį ilali,
te hulide ula momainogo muani.
Agai te tamu ąį hodolobaso, te genuai ąį dini pedalu,
te genuai u wabo.
Aga nogi e tiwai, Tigidali Bomo Elalubo Genuai Bidi dao.
Agai te tama po wai,
36 “Ena Genuai Bidigo, eno po dolo obao,
te Israel hani dabe sesemane bidada paibao,
te giliga, me polua, me hǫ dabe elalubo tiwai yaibao.
Tama te giliga, me polua, me hǫ dabe,
te augwaligo eno augwaliba mani sę isąbaso da,
teda te sogo naga te Israel hani dabe sia sigi dao.
37 Ena Genuai Bidigo, eno te po obao,
te bidigo dagalu tigidali badu habu usu sobaso,
usu yaibao weyu,
te bidi mego te tǫ bulali pageba mu aiya dulama,
te tigidali habu badu subaso, usu yaiba obaso da,
teda te sogo naga tama eno te Israel we bidi tigidali
tudiba mueibao,
te augwa yali dwai kolesaga wei ponoyu, tiaibao.
Ena Genuai Bidigo, eno te po wai dao,” wali.
38 Genuai Bidigo po ma weyu, te po wai, “Eno te bodolu muani sogo, te augwaligo Jerusalem ma nigaibao, te eno taun dao. Te Jerusalem genuai obo dąį te not badu, te Hananel te Tauade gagalama, te Dagebadu Sunumiba usu nigi paibao. 39 Tama dąį ebo te giliga dega sigilubo badu, te dwasianu bulu du Garep teba usu nigi pelama, te begelama, te bulu Goaba pedelaibao wali. 40 Tama te tǫ bogo me saut badu, te bulu odogode te gų page me elalu, te keli sąbo pesage me elaluali, te taun dąį yali tomode elalueibao. Te giliga pedalubo badu, te tigidali tǫ pedai te odogo bulu te ąį Kidron sesegeba usu nigi paibao, te me te taun tomode elalueibao. Te dąį pabo te Hos Dabego Sunumi te not badu usu naibao. Tama te taun tomode tǫ tigidali te gasagi yai tedali tǫ dao, te ena Genuai Bidigo tǫ elalueibao. Te boi bidi dabe aselama, te taun dolama, te aluama, te doado bage me sagasogobeo. Menio. Te taun te sesemane sogo bugagia elalueibao,” Genuai Bidigo te po wali.
*31:2: Te ves 1 tedu gagalasa pelama, te ves 22 te tomode elalubo po dabe te Israel we bidi augwalide wali po polobadu te kantri Israel te not badu te kantri Judade bidali. Te hani augwaligo dwai kolesaga ebaso, te Godigo augwali te boi bidi dabego te augwa tǫ kantri bulu sela pelama, bidigi pomainogo yai, “te bulu kantri not badu dao.” (ves 8) Augwali te bulu kantride bobage sogo bidalio, tama megi da, Godigo te augwali ma odasa aselama, te tigidali Israel deli hani pedelama, te God dologode bugagia bidimainogo yalio. Samaria taun te (ves 5 tede wali) Israelde genuai taun elaluai. Te Efraim hanigo po ves 6, me 9, me 18, me 20, tede elalubao, te Israel hani dabede aga te genuai hani mu me deli elaluai, te Godigo Efraim nogi ebo sogo, agai te tǫ not badu bidali Israel hani tigidalide po olama te po walio.
†31:15: Resel te Jekopgo we, tama te Israel augwaligo homugo te augwa auwa mosi da homu yali. Te Resel pubulali gų page te taun Ramade elaluai. Tibaso, te hanigo po begelama weyu, te tiwai po wai, Resel te taun Ramade bidiyu, te aga hani wąį nǫų wai puluba dabe hagawalio homu idubao, te agai homu dene ebo gela umabo wabo dao. Te po wai.
‡31:26: Te po page bugagia mu konebeo, tama me te dego te po pusali homu ebao. Te Jeremaia aga digi, ma gasa bidigowe?