Polgo te Jisasgo po te haniani tǫ pedai kantride pusali
13
(Dąį 13:1-21:14)
Augwaligo Barnabas dali, Sol dali si Godigo po pusa maiabo bidi si tagala palali
1 Te Antiok bulude, te Jisasgo po wali pabo bidi tomode, te Godigo po pusa mabo bidi profetgo pusubo po tiwai po wabo tiwai bidi me badu te bulude bidali, te Godigo po te we bidi augwaliba ola mabo bidi dabe me badu me bidali. Te bidi dabe augwaligo nogi me Barnabas, me Simeon, agai nogi me Husugo Bidi, me bidi Lusius, agai page bulu Sairini, me bidi Manain, te moni gavman bidi Herot aga age, tama me bidi nogi Sol. 2 Tama augwaligo tubo nai osogo gisilama, Godibolo nage dwagi yai da obadi, tama Godigo Dwagi Yai Mobo Bidigo augwalibolo te po wai, “Te Barnabas dali, Sol dali si te tedali sę emainu tedali muao, te eno dąį ilali sę augwali sigo emai yaibao,” wali. 3 Tama te po odama, augwaligo nai ma osogo tagalama, God dali po olama, augwa nogo tega si toboluba mubadi, augwali sigo te yabo tedali sęde sa muani. Tama tilama, tega si te sęba tagala palali.
Barnabas dali Sol si te Saiprus buluba pelama, Godigo po pusali
4 Te Godigo Dwagi Yai Mobo Bidigo te Barnabas dali, Sol dali si tagala palama, augwali si te Selusia buluba pali. Tama Selusiade moni gebadu pelama, tama te tamu ąį bolama te Saiprus tǫ sabolali, te ąįgo u badu te e badu si bologobea sai tomo yagu tǫba sabolali. 5 Tama tede te be nani Salamis sabolama, augwali sigo te Juda dabego bomo yai po ola mabo be dabede Godigo po pusa mawai. Te bidi Jon, agai nogi me Mak, agai me tega si tau selama, te sę yali.
6 Te nosali augwaligo te Salamis bulu taga pelama, gasa habu badu, bulu me nogi Pafos, teba sabolali. Tama augwaligo te bulude Juda bidi me deli suali, agai nogi Barjisas. Te bidi agai dwai pobi dabe wabo bidi, tama agai tigidali we bidibolo tibo po ola mayu, “Ena Godigo po pusubo bidi dao,” wali. 7 Tama te bidi aga abagi te moni gavman bidi Sergius, aga nogi me Paulus, aga abagi dao. Tama Sergius, aga nogi me Paulus, agai te Saiprus bulu tǫde bidibo we bidi tigidali agai tonalubo da. Aga haniani kolesaga koneai bidi da. Tama te moni gavman bidigo Barnabas dali Sol si i olama, “Asao,” wali, agai homugo ‘Augwali sigo Godigo po enabolo ola mabo po odaio,’ te homu yai.
8 Tiali goli, te dwai pobi dabe wabo bidi Barjisas, te Grik pogo aga nogi Elimas, agai homugo ‘Moni gavman bidigo Godigo po wali pidali weyu,’ te homu elama, tega sigo wali po sela sąyani, te agai po ugwaba mu sali. 9 Te yali, te Sol agai nogi me Pol, agai gedugo te pobi wabo bidi bomonama tonaluali. Tama Godigo Dwagi Yai Mobo Bidi aga homude pągąnaluali. 10 Pol agai te po wai, “Nage da, te Satango ogwa dao. Te nago tigidali dwagi yai kolesaga boi bidi homu ąǫ, te ebe yabao. Nage dwai dwai kolesaga elama, tibo po wabo bidi me dao. Nago te Genuai Bidigo dwagi yai tų mu dolobao. Nago te tibo kolesaga tagalabo homu meniwe? 11 Tama Genuai Bidigo nogogo nage geduba elaibao. Nago gedu hulia selama, giliga ge osogo sugobeo,” Polgo te po wai. Tama polo te hano tiwai te bidi Elimas aga gedude halua selama, hulia si elaluali. Aga nogo dali sągą dali sigo naga tų gege pali. Agai homugo ‘Dego ena nogo tolama, tų ola magowe?’ te homu elama, bidi gegali. 12 Tama te moni gavman bidigo te ebo sę sulama, agai homu tigidali Jisasba muani. Aga noma mu sali, te Genuai Bidigo sę dabe augwali sigo aga ola mobaso tama noma sali.
Augwali te Antiok buluba sabolali, te Pisidia tǫde
13 Te nosali Pol dali aga dali bidali bidi dabe augwaligo moni geba selama, Pafos bulu tagalama, tama tamu ąį daidu pelama tama augwali Perga be naniba sabolali, te Pamfilia tǫde. Tiali goli, Jon aga nogi me Mak, agai tede te bage tagalama, aga Jerusalemba ma geasa pali. 14 Tama augwali Perga be nani tagalama, augwali pelama, Antiok be naniba sabolali, te gasa me tedali Antiok, te Pisidia tǫde. Tama te Juda dabego Sabat sogo augwali te Juda dabego bomo yai po ola mabo be tomoba pelama, augwali dugayali. 15 Tama bidi mego Mosesgo bomo yai po asęani buku nedama, tama nosali bidi mego Godigo polobadu po pusa mani profet bidigo asęani buku me nedama, tama te tobolu bidi dabego Pol dali Barnabas sibolo po ola tolali. Augwaligo augwalibolo te po wai, “Ama dede, dagego dwagi yai po me elalubaso da, teda da we bidibolo dage sigo megi da ola maiąo,” te po wai. 16 Tama Pol hodaluama, agai “Dagego odao,” olama, nogo muani. Agai te po wai, “Eno homugo dage Israel bidi me, dage Israel isąwai bidi hani me, tiali goli dagego Godibolo po mu wabo dao, dagego bugagia olo munama, eno po odao. 17 Da Israel we bidi dago God, agai dago wąį dabe polobadu dąį ilali. Tama augwali te Isip tǫde bobobage sogo bidibadi, Godigo augwali te genuai hani mu nigilali. Tama God agai bomogo augwali te Isip tǫ taga solama, [Sai 1:7; 12:51] 18 te kemi tǫ bidi meni yai bulude bilidubadi, kibu be bidi sigo nogo sągą sese te 40 yia silama yali. Tama te kibu be tomode bidibadi, augwaligo dwai kolesaga ebo sęgę Godigo selama, agai tonaluali. 19 Tama Godigo te Kenan tǫde bidali hani a nogo olama, me badu nogo si wagi solama bidai bidi hani ela silali. Tama ela silama, Godigo te tǫ te Israel hanibolo mani.”
20 “Te augwali te tǫde bidama, te kibu be hauwa mu te 450 yia silali. Tama te silama, nosali Godigo te Israel hani dabe augwalibolo po tų dodolobo bidi dabe mawai. Tama me isibaso, hasegeleyu, hasegeleyu, tama ela pali. Tama bida bida pelama, te bidi Samuel dią holali sogo sabaligi pali, te Godigo po pusa mabo profet bidi. 21 Tama te sogo augwaligo Godibolo hanalu wali, ‘Da gegasa pabo bidi, moni genuai gavman bidi dabolo mao,’ wali. Tama God agai te bidi Kis aga ogwa Sol te sa muani. Te bidi agai hani nogi Benjamin. Agai augwaligo moni genuai gavman bidi nigilama, tama bidali. Te sę eyu bidibadi, kibu be te 40 yia silali. 22 Tama tilama, Godigo Sol hasegelama, Devit te moni genuai gavman bidi nigilama bidali. Tama Godigo te po Devitde wai,
‘Megi eno te bidi Devit sualio, te bidi Jesigo ogwa,
eno agade dwagi yai homu ebao. Nosali eno sę
tigidali agai yaibao,’
Godigo te po wai. 23 Tama Jisas, te Devitgo nosali hani bidi, te bidi Godigo selama, da Israel dabe tau sabo bidi nigilali, Godigo polobadu wali po tiwai. 24 Tama Jisas agai yali sę gagalisąbadi, Jon agai te Israel we bidi tigidalibolo te po wai, ‘Dagego dwai kolesaga ebo tagalama, homu begelama, eno dage baptais mawaibao,’ wali. [Mk 1:4; Lu 3:3] 25 Tama Jon agai sę silabo maga ebadi, agai te we bidibolo te po wai, ‘Dagego homugo ena de dawe?’ wali. ‘Ena te dagego tonalubo bidi menio. Tiali goli, dagego odao. Bidi me deli nosali aga ena tudi badu asaibao. Aga da, te genuai bidi mu da. Ena da nogi elalubo bidi menio. Eno agai sągą nadoba bono pisigabo sę yainogo ebaso da, teda te sę ebo eno usu egobeo,’ Jongo te po wai.”
26 Te bidi Polgo te po olama, po me ola mani, “Ama dede, abe dede, dage Abrahamgo hani bidi dagego me, odao. Dage Juda bidi hani isąwai bidi, dage God wali pabo dao, dagego me odao. Godigo agai da ma dobola sabo tų nigali po te da tigidalibolo tagala palali. 27 Tama te Jerusalemde bidibo we bidi me, augwaligo tobolu bidi dabe me, augwaligo te bidi Jisas agai yali sę page konebe, agai wali po page me augwaligo konebe. Augwaligo te Godigo po polobadu pusa mani bidi profet dabego wali po tigidali Sabat sogode odama, tama augwaligo te po page bugagia konebe. Tiali goli, augwaligo homugo Jisas elaibao homu e baso, polobadu Godigo po pusubo profet bidi dabego wali po megi nai gilama mu walalio. 28 Jisasgo dwai kolesaga munu me isąbadi, augwaligo Jisas olo dali po tų ela mani. Augwaligo te bidi Pailat agabolo moni po dagą weyu, te po wali, ‘Te bidi Jisas elao,’ wali. 29 Polobadu Godigo po pusa mani bidigo bukude asęani po tiwai augwaligo te sę Jisasgo tigide ela silama, bidi sigo aga ni pedaide daganama, agai tigi selasa pelama, moni masigi dudulawe tomoba mugi pali. 30 Tiali goli, Godigo aga ma hodolama, tama ma bidibao. 31 Tama nosali te polobadu aga dali Galilide bilali hani bidi dabe me aga dali Jerusalemba pali, agai augwalibolo hauwa sogo dią holali. Te hani augwali tigidali Israel we bidi tomode bilu, te ebo suali sę po pusubo dao.”
32-33 “Tama dadi si me dage pageba sabolama, te Godigo dwagi yai gesi po dagebolo pusa mobao. Tama te bomo yai po Godigo polobadu dago wąįbolo walai po dao. Tama megi te po augwaligo wai puluba da pagede mu pedalalio, da tau somainu yai. God agai Jisas gų pagede ma hodolai dao. Polobadu bidi me deligo te Godide dwagi yai homu eyu wabo tęąbi buku yabe side te po asęani,
‘Godigo te po wai, “Nage eno ogwa mu dao. Tama
megi nage eno ogwa mu nigilai dao.” ’ [Tib 2:7]
34 Jisas isilama, Godigo aga gų pagede ma hodolai, agai tigi nosali damua pogobe. Tama polobadu Godigo te sę yabo homu ebadi, te po wai, te bukude asęani,
‘Polobadu eno Devitbolo po ola mawai, agabolo
dwagi yai sę yabo po. Tama megi eno nagebolo
me te po e mobao.’
[Ais 55:3]
35 Tama te asęani buku yabe mede Devitgo te po me Godibolo wali,
‘Naga dwagi yai sę ebo bidi naga agai tigi gų pagede
damua pomai hagede tagalogobeo,’ [Tib 16:10]
wali. 36 Tama Devit agai Godigo sę aga hani we bidi tomode elama, tama aga nosali isai. Tama isąma, augwaligo aga wąįgo masigi dudulaweba mugi pai. Tama tede aga tigi damua pai. Tama dago Devitgo polobadu wali po koneao, te po wali Devit aga tigide wabe. Agai tigide wabeo. 37 Tiali goli, te Godigo ma hodolali bidi agai tigi damua pabeo.”
38-39 “Ama dede, dagego te sę bugagia koneao. Dago dagebolo Jisasgo tigidali yali sę dagebolo pusa mobe dao. Tama agai dago tigidali dwai sę ebo sela sąyabo tų nigali. Duga bugagia koneao. Niwai we bidi augwaligo augwa homu Jisasba mubaso da, teda Godigo augwaligo yali dwai sę sela sąwaibao. Tiali goli, Mosesgo bomo yai po dabe augwaligo dagego dwai kolesaga ebo sę sela sągobeo. 40 Tama dage dua dao. Te Godigo po polobadu pusa mani profet bidi dabe augwaligo wali po dage pagede mu pedalidali weyu, dua dao. 41 Augwaligo te po asęani, Godigo te po wai,
‘Odao, dage Godigo po sela sąbo bidi dabe dao.
Dagego tonaluama, moni homu elama, nosali noma
siąo. Tiali goli, dage isaibao. Eno dage pagede
sę ebadi, dagego te sę ebo dagego homugo mu
konegobeo. Tama bidi me deligo dagebolo te sę
page pusa mobadi, dagego agai wabo po page
bugagia konealugobeo,’ [Hab 1:5]
Godigo te tama po wai,” Polgo te po wali.
42 Te Pol dali Barnabas dali si te Juda dabego bomo yai po ola mabo bede po pusulama buluba dią sobadi, te we bidi augwaligo tega sibolo te po wai, “Me Sabatde dage sigo dabolo te po ma ola magameo,” wali. 43 Tama te we bidi tedela pelama, te Juda dabe hauwa augwali si wali pali. Tama te Juda hani isąwai we bidi hani Juda haniba wadolagasali, augwali me te Pol dali Barnabas dali wali pai. Tama augwali sigo augwalibolo te po ola mani, “Dagego Godigo po odoyu, bugagia bidiąo. Tama God agai bomo dologode bidiąo, agai dage tau somainu, te dage bugagia bidimainu tama yao,” wali.
44 Te nosali Sabat sogode te be nani we bidi tigidali pąde sisinagasali, tega sigo Genuai Bidigo po wabo odainu yali. 45 Tama te Juda dabe me badu augwaligo te umabo we bidi sulama, augwali Pol dali Barnabas side dwai homu yali. Augwaligo Polgo wabo po sela sąnama, aga nogi aiyaba elaluali. 46 Tiali goli, Pol dali Barnabas sigo bomo selama, wi isąma, te po wai, “Dago koneai, Godigo po hasia bolo dage Juda haniba mawainu yai. Tiali goli, dagego agai po sela sąbaso da, teda dago dage Juda hani taga paibao. Duga homugo tama te da, dagego bugagia bida bida pabo kolesaga sogobeo homu ebaso da, teda da te Juda hani isąwai we bidi haniba tau sigi paibao. Godigo dabolo te bomo yai po wai dao,
47 ‘Nage eno sole tiwai nigilibe dao, te Juda
hani isąwai te tigidali tǫ pedaide bidalubo we bidi
augwaliba ula ilimai hagede ebao. Tama nago
tigidali tǫde bidibo we bidi tau selama, Godigo
augwali ma somainu yao,’ [Ais 42:6; 49:6]
wali,” Polgo te po wai. 48 Tama te Juda hani isąwai we bidi augwaligo Polgo wali po odama, augwaligo bugai homu mu yai. Bugai homu mu elama, augwaligo te Genuai Bidigo po ugwaba sai. Tama tigidali we bidi Godigo sesemane bida bida pabo kolesaga somai hagede polobadu sa muai we bidi, tama augwaligo megi Godigo po odama, te po mu po dao homu elama, te poba augwa homu tigidali muani.
49 Te tǫde bidibo we bidi augwaligo Genuai Bidigo po oda pela silali. 50 Tama te Antiok be nanide te Juda hani isąwai genuai we dabe bidali. Tiali goli augwaligo Godibolo lotu po wabo dao. Tama te Juda dabe augwaligo te nogi yai we dabe dali, te kaunsil bidi dabe dali tigidalibolo bidi geme posobo po wali, Pol dali Barnabas si elemainogo yai. Tama augwaligo tega si gasa tǫba gudulali. 51 Tama tibaso, augwali sigo sągą nadobade elaluali tǫ hogomu sela sąwani. Te yali sę te page elalubo. Augwali sigo te bidi dabego dwai kolesaga ebo sulama, te sę yali. Tega sigo te po wai, “Duga sę dao.” Tama augwali si te Aikoniam buluba pali. [Mt 10:14; Mk 6:11; Lu 9:5; 10:11] 52 Tama te Antiokde bidali Jisasgo po wali pabo we bidi augwali bugai homu yali, te Godigo Dwagi Yai Mobo Bidi augwaligo homude pągąnaluali.