1 Me sogo Sabatde te Jisas me aga dali bidali bidi dabe me, augwali te gi tomodu pali. Tama te gide te rais tiwai nai wit holobo gi dao. Tama augwali pobadi, te bidi dabe augwaligo te wit ge togolama, nogogo pelegelama, te sabea wali ma te agau buluba tedela sąnama, te ge dabe tubo gagalali. 2 Tama Farisi hani sibi dabe me badu tede bidali. Augwaligo te sulama, te po hanalu wali, “Te dena bomo yai pode tama po wabo da, ‘Sabat sogode sę egio.’ Tama te po wai goli, dagego e sę magi baso ebawe?” wali.

3-4 Tama Jisasgo augwalibolo te po wali, “Te dagego te dena nǫų bidi nogi Devitgo yali sę po dagego nedebewe? Me sogo aga me, aga dali bidali bidi dabe me, augwali nai sili bidibadi tama moni nasi eyu bidali. Tama tibaso Devitgo Godigo lotu be tomoba pelama, te Godigo gesabide muani bret selama tuali. Aga hani dabego me tuali. Tiali goli, te bret te habu selai elaluai, tama te pris dabego naga tubo usu yaibao wai, te bomo yai pode. Tiali goli te bret augwaligo me tuali digi, Godigo gedude dwai sę ebeo. Dagego te asęani po nedebewe?” * Prs 24:9; 1 Sml 21:1-6 5 Tama Jisasgo augwalibolo te po wali, “Ena da, te Godigo Bidi Mu da. Ena da, te Sabat sogode te genuai bidi dao. Tama tibaso, bidigo Sabatde mena sę yagameo te eno waibao,” wali.

6 Te me sogo Sabatde Jisas te Juda dabego bomo yai po ola mabo be tomoba pelama, we bidibolo po ola mani. Tama tede te dolo nogo penenai bidi me deli bidai. 7 Tama te Juda dabego bomo yai po konebo bidi dabe me, te Farisi sibi dabe me, augwaligo Jisas gedu diliasa tonaluali. Magi ebowe weyu, te Jisas po tų ela mawai hagede te page gegali. Augwaligo Jisasgo te Sabatde te nogo dwai bidi dodologowe weyu, tonaluali. 8 Tiali goli, aga digi te bidi dabego ebo homu koneani. Tama agai te nogo penenai bidibolo te po wali, “Nage holaluao, te we bidi bidiboma teba tomoba dolaluagasao,” wali. Tama te bidi hodaluama, we bidi tomode dolaluagasali. 9 Tama Jisasgo te tonaluali bagebolo te po wali, “Te eno dagebolo hanalu obao, dago Sabatde dwagi yai sę yaibawe? Dago bomo yai po dabego mena po wabo dawe? Dago bidi dolabo sę yaibawe, ma dago tau saibawe?” te po hanalu wali. 10 Tama agai te bidi dabe gedu tonono biliama, te nogo penenai bidibolo te po wali, “Nago nogo debelao.” Tama te bidigo tama tilama, agai nogo bugagia ma gesa soali.

11 Te bidi Jisasgo te nogo dwai bidi ma dodolobo sę ebo tononaluali bidi dabe da, te bomo yai po konea pai bidi dabe me, te Farisi hani me augwaligo te sę ebo sulama, moni sębę eyu, guni bula salio. Augwa hasi augwaligo te bidi Jisas mu ela muabo sunumi gegabo po mibo po gagalobo sę yalio.

12 Te sogo Jisasgo Godibolo po wainu eyu, tama bulu duba holama, moni huli sesabi Godibolo po udali. 13 Tama te be posobo si, aga wali pabo we bidi aga pageba i olama, agai te bidi dabe nogo si olama, sągą me badu si dąį ilali. Tama nosali agai te bidi dabe “Eno tagala palabo bidi dabe da” wali. 14 Tama te bidi dabe nogi e dao, me Saimon (Jisasgo aga nogi Pita poai), me bidi nogi Andru, te Saimon aga amanu. Me bidi si nogi Jems me Jon. 15 Me bidi si nogi Filip, me Bartolomyu, me bidi si nogi me Matyu, me Tomas. Me bidi nogi Jems, te Alfiusgo ogwa da. Me bidi nogi Saimon, agai nogi me Selot. 16 Bidi me aga nogi Judas, te gasa bidi Jems aga ogwa dao. Gasa bidi aga nogi Judas, aga te Keriot bulu bidi dao. Nosali te bidigo Jisas te boi bidi nogoba muani, Jisas po hwa pabo bidi.

17 Te Jisas te bulu dude bidama aiyaba ma dulai, aga tagala palabo bidi dabe dali dulali. Tama dulama, augwali te bulu odogo tǫ maluba sabolama, te aga hanide po pusali. Tama umabo we bidi aga pageba asali. Augwali me badu te Judia tǫdu asai, me badu Jerusalem be nanidu asai, me badu te nabis bulu sidu asai, me nogi Taia, me nogi Saidon, tedu me asali. 18 Augwali Jisasgo ola mabo po odagasai. Te gasi yai bidi dabe bugagia dodolomai hagede asai. Me badu we bidi dwai haubo bidibo we bidi aselama, Jisasgo te dwai haubo sela sąyu, “Te dage pao,” wali. 19 Jisas agai bomogo gasi yai we bidi hauwa usu ilibaso, mebago me Jisas agai tigi diąwainu yali, augwali dwagi yai ma emai hagede.

20 Te Jisasgo aga hani bidi dabeba tonono bilama, te po wali, “Te dage nai meni yai we bidi, bugai homu iyąo. God da dagego tobolu bidi dao. 21 Dage megi nasi ebo bage, dage bugai homu iyąo. Dage nosali tabiaibao. Dage megi gela wabo bage, dage bugai homu iyąo. Nosali duga gisugu waibao. 22 Megi dagego ena te Godigo Bidi Mu wali pobaso gasa bidigo dage dali sesanobo po weyu, dage buluba gudula palu, dage bidasabo po dwai weyu, dage dwai bidi dao obaso da, teda dage bugai homu pemene yao. 23 Magi baso meni, dage bugai homu elama, gawi iyąo. Tama tibaso, dagebolo maiabo nai genuai mu te dagalude elalubo. Dagebolo tama sę ebo bage augwa nǫų dabego me Godigo po ola mabo bidi dabebolo me polobadu tama teduai dao. 24 Tiali goli, dage megi nai hauwa munalubuo we bidi dabe dwai side bidaibao. Duga homu tegaluama, bugagia bidali sogo te ela pali dao. 25 Te nai dabe megi elalubo bage, dage dwai side bidaibao. Nosali duga nasi yaibao. Te megi gisugu wabo bage, dage dwai bede bidaibao. Nosali dage moni homu dene elama, gela waibao. 26 Tama tigidali we bidigo dage kegenano baso da, nosali dwai bede bidaibao. Augwa nǫųgo me te tiwai po naga tibo po pusa mabo profet bidibolo tebo po udai dao,” Jisasgo te po wali.

27 Te Jisasgo te po ma wadolu, te po wali, “Megi dage eno pusubo po odalubo bidi dabe, dagebolo eno megi e po pusubao. Dagego boi bidi dali dwagi yai homu eyu, dage sesalubo bidi dabebolo dwagi yai sę eyu iyąo. 28 Dage i ola mabo bidi dabebolo dwagi yai homu elama, dage dali dwagi yai homu isąbo bagede Godibolo po olama, dwagi yai homu ilabo po waiyąo. 29 Bidi mego nago nabogode ele baso da, me badu me elemainao. Bidi mego eda badu gulali holobo ugwa saket bomo elama sobaso da, te ugwadu tomode gudali holobo ugwa me somainao. 30 Mena bidi augwaligo nagebolo magi nai me mao obaso da, te nago mao. Bidi mebago nago nai bomonama sobaso da, te ena ma mao wagio, somainao. 31 Nagebolo gasa bidigo te dwagi yai sę emainao homu ebogia, te nago gasa bidibolo me tama tiyąo,” wali.

32 “Dagebolo dwagi yai homu ebo bidi dabebolo naga duga dwagi yai homu eyu da, magi baso Godigo te dagebolo dwagi yai homu yao po waibawe? Dwai dwai sę ebo bidigo me augwalibolo dwagi yai homu ebo bidi dali dwagi yai homu ebo dao. 33 Ma, te dagebolo dwagi yai sę ebo bidi dabebolo naga duga dwagi yai sę eyu da, magi baso Godigo dagebolo dwagi yai homu yao po waibawe? Dwai dwai sę ebo bidi dabego me te tama naga te tiwai sę ebo dao. 34 Dugabolo wei maiabo homu ąǫ ebo bidibolo naga te nai osogo mayu da, te magi baso Godigo dagebolo dwagi yai homu ilao po obawe? Dwai dwai sę ebo bidi dabego me te tama naga tebo dao. 35 Tegio. Boi bidibolo dwagi yai homu elama, augwalibolo dwagi yai sę iyąo, nai olo menama, wei ma sigimio. Genuai Godigo te agabolo nage usu dao wasiąwai bidi dabebolo me, te dwai sę ebo bidi dabebolo me dwagi yai sę ebo da. Tama tibaso, dagego te sę yalide, dage maiabo nai genuai mu nosali elalubo. Tama dage Genuai Godigo ogwa dabe yaibao. 36 Duga Ayago we bidi hobede elama, tau sabogia, dagego me we bidi hobede elama, tau siąo,” Jisasgo te po wali.

37 Jisasgo po ma wadolama weyu, te po wali, “Dagego gasa bidi dabe dagalama, augwali dwai bidi dabe da po weyu, posobo po wagimio. Tama tiyu da, Godigo dage dagalama posogobeo. Sęgę yai po dagego dobagio. God agai dagebolo sęgę yai po dobaidali weyu, dagego gasa bidibolo sęgę yai po wagimio. Gasa bidigo dagebolo dwai sę yali te sela sąnama, kegeda paliąo. Tama tiyu da, teda Godigo dagego dwai sę yali kegeda palaibao. 38 Gasa bidibolo nai maiąo. Godigo dagebolo me tiwaibao. Te wei Godigo dagebolo edelama, duga nogoba gelaibao. Duga gasa bidibolo mani tiwai, Godigo dagebolo ma tama mawaibao,” Jisasgo te po wali.

39 Jisasgo e po digi po augwalibolo pusali, “Gedu widai bidi mego me gedu widai bidi tų ola magobeo. Tama tiyu da, augwali si dali si te ąį gamia soabo dedageba tulalueibao. 40 Skul wai mego aga tisa ela holai elalubeo. Tiali goli, aga skul silama, sę usu selama, aga tisa dali usu si yaibao. 41 Magi baso nago naga amago gedude elalubo dwasianu pobele bage suai, tiali goli nago naga gedude elalubo genuai pobele bage te bǫ nami tiwai te nago magi baso subo meniwe? 42 Nago naga gedude te genuai bǫ nami tiwai elalubo pobele bage sela sąsiąbadi, te nago magi baso naga amabolo te po weyu, ‘Ama, nago gedude elalubo pobele bage eno sela sąwaio,’ te po obawe? Nage ugwadu homugo naga po wabo bidi, hasia bolo nago naga gedude te bǫ nami tiwai elalubo pobele bage guda sąyao. Tama tiyu nosali te nago gedu bugagia wiegi yai ebaso, teda naga amago gedude elalubo pobele bage sela sąyu guda sabode nage usu yaibao,” Jisasgo te po wali.

43 Jisasgo te po digi po ma wadolali, “Bugagia pua pai holai nigo du dwai walobo menio. Ma, haganawai nigo du geswai walobo menio. 44 Ni aga du dagego subaso da, te ni dagego konebo dao. Magi baso menio. Bidigo te sesani yai bono dilibide siga du togobo meni. 45 Sesani yai bono dilibide me bobi dabe togobo meni. Geswai bidigo aga homude pągąnalubo dwagi yai sę ebo dao. Dwai bidigo da, aga homude pągąnalubo dwai sę ebo dao. Bidi aga homude pągąnaluai po aga pedauwaligo wabo dao,” Jisasgo te po wali.

46 Te Jisasgo te po digi po ma wadolu, te po wali, “Te dagego eno yao wali sę isąnama, magi baso enabolo ‘Dago Genuai Bidi dao’ po ola obawe? 47 Eno wabo po odagasama, wali pabo bidi da, mena tama tiwai yali wenama sumainu, ola mawaibawe? 48 Aga be sę eyu, be beli ni aiyanu mu diganama, masigi daiba bululama, sę yani bidi ąǫ, te elalubao. Te be sęnama, nosali te pabo ąį asobo si, te be degelebe, te be degebe. Magi baso meni. Te be sę yani bidigo gisiga sę yai eyu, degebe. 49 Tiali goli, eno po odama, wali pisąbo bidi da, te bidi aga be beli ni bugagia bulisiąwai digi, wę asiyu pogolobode polo mu pagesa soali. Tama te be mu dolali,” Jisasgo te po wali.