1 Nosali Josuago te Rubengo hani me, te Gatgo hani me, te Manasego hani me badu me, te augwali i olama, tama augwali deliba sisinagasali. 2 Tama agai te tiwai po augwalibolo wali, “Dagego te tigidali sę te Moses, te Genuai Bidigo sę bidigo, te dagebolo weyu, te yao po wali sę te tigidali ela silali. Tama dagego eno po tigidali wali pai. * Nam 32:20-32; Jos 1:12-15 3 Te tigidali sogo dagego te duga ama dede dabe tau sali, te megi e sogoba usu nani. Te deli sogo me dagego te augwali me tagalubeo. Dagego te Godigo po dabe bugagia wali pali, te dago Genuai Bidi dao. 4 Megi te God, te dago Genuai Bidigo, te boi pilama wiegi yai pemene ebo sogo te dagego ama dabebolo mayu, te polobadu agai po dąų wali tiwai gilama yali. Tialima, dage te duga beba ma geasa pelama, te tǫ pedai te Jordan wę u badu, polobadu Moses, te Genuai Bidigo sę bidigo, te dagebolo mani. 5 Tama dagego homu kone bugagia palama, tama te Genuai Bidigo sę bidi te Mosesgo po dabe me te bomai po te dagebolo mani, bugagia wali pao. Te bomai po page e tiwai dao, dagego duga Genuai Bidi God godolo mu iyąo. Tama dagego agai homu kolesaga me, po me, wali pao. Dage te aga dali bidiyu, tama dagego homu kolesaga me bomo tigidali te agaba munama, tama agai sę yao,” agai te po wai.

6 Tama Josua te wiegi yai po mobo augwali menama, tama agai augwali te Jordan wę boloyu, augwa beba ma pomainu tagala palali. 7 Mosesgo te Basan tǫ te Manasego hani me badubolo mani, te Jordan wę u badu, te giliga pedalubo badude. Tiali goli, Josuago te Manase hani me badubolo te tǫ mani, tama te gasa Israel hanibolo me, te Jordan wę e badu, te giliga dega sigilubo pedai badu, te tǫ me mani. Te Josuago te hani te augwa buluba ma tagala palali sogo, agai te po mobo augwaliba mayu, 8 tama agai te po wali, “Dagego te boide sali doado bage hauwa elalubao, tama megi dage duga buluba ma piąo. Dagego te bulmakau hauwa elalubo, me silva, me gol, me bras, me ain, tama ugwa me hauwa elalubao. Tama dagego te boi bidide sali doado bage meba te duga ude bidali abagi dabe mao,” wali.

9 Tialima, te Rubengo hani bidi dabe, me te Gatgo hani, me te Manasego hani, te augwali te augwa buluba ma soali. Te hanigo te gasa Israel hani dabe te Silo bulu te Kenan dabego tǫde taga soyu, tama augwali te Gileat, te augwa tǫba soali. Augwaligo te tǫ sali te Genuai Bidigo augwalibolo te Mosesgo pedauwalide wali pode tiwai gilama te tǫ polobadu sali.

10 Augwali Gelilotba sabolali, te Kenan dabego tǫ te Jordan wę sesegede, tama augwaligo te genuai alta me deli te bulu te wę pąde dodolali. 11 Tama tigidali gasa Israel dabego te tiwai sę yali po odali, “Odiao! Te Ruben dabego, me Gat, me Manase me badu, te tama hani bagego te alta me deli te Gelilot bulu, te Kenan tǫ sesegede, te Jordan wę pąde, te da bidibo pedai badu te alta nigalio,” te po wabo odali. 12 Augwaligo te po odama, tama tigidali te Silo buluba sisinama, tama augwaligo te hani sela dali boi hwįainogo sisi ilali. 13 Tialima, te Israel dabe augwaligo te Finias tagala palali, te pris bidi Eleasargo ogwa, te Rubengo hani me, te Gatgo hani me, te Manasego hani badi, te hani sela bidibo madiba te bulu Gileatba pai. 14 Tama te nogo si tobolu bidi dabe te Finias dali pali. Te bidi dabe augwali tigidali te Israel bidi dabe naga, tama te augwa deli hani sibi tobolu bidi dabe dao. 15 Augwali te Gileatba sabolama, tama augwaligo te tiwai po te Rubenbolo me, te Gat me, Manase me badu, te hani bage selabolo te po wali, 16 “Te Genuai Bidigo po odobo we bidi tigidaligo te tiwai po wali, ‘Magi baso dagego te dwai sę dena Godibolo yaliwe? Dagego te Genuai Bidigo po sela sąnama, tama dagego te duga alta te nigalio! Dagego te Genuai Bidi wali pabo ąǫ me ebeo! * Bom 12:6 17 Polobadu dago te bulu Peorde te dwai sę yali, tama Genuai Bidigo te gasi tagala palama, tama aga we bidi dolali. Dagego homugo te dwai sę yali te usu ebe homu elama, tama dagego gasa dwai sę me ma yali da, agawe? * Nam 25:1-9 18 Magi yaliwe, megi dagego te Genuai Bidi wali pabo hagela homu ebaso yaliwe? Te dagego agai po megi sela sąwani wida, teda do agai da Israel dabe tigidalibolo wado po waibao. 19 Te dage Genuai Bidigo gedude meda elaluyu, tama dagego tǫde lotu wabo te usu meni ebaso da, teda dage te Genuai Bidigo tǫba asiąo, te agai ugwa be elalubo buluba. Tede Godiba nai ula mabo alta elalubao, te dago Genuai Bidi dao. Tama dagego te da tomode te tǫ meba siagameo. Tiali goli, tiyu, te dagego Genuai Bidigo po sela sąyu, dagego te alta nigali gilama idalio. 20 Dagego te Akan te Serago bulali wąį ogwa te homugo gegeda palamuo. Te hasia Godigo te Jeriko hanude nai sigio olama, habu selali elalubadi, tama Akango te po sela sąnama, tama te nai meba sali. Tama te tigidali Israel dabego te dwai sę yali sęgę tolali. Te Akango yali dwai sę te Akan aga delide naga me elalubeo. Menio! Te gasa Israel we bidi dabe augwali me dolai dao!’ we bidi tigidaligo wali,” augwaligo te po wai. * Jos 7:1-26

21 Tialima, te Rubengo hani, me te Gatgo hani me, te Manasego hani meba me, te augwaligo te hani sibi tobolu bidi augwalibolo te tiwai po wei ponani, 22 “God te tigidali bomo elalubo! Agaduba deli naga te Genuai Bidi dao! Te dago magi baso te sę yali, te agai koneani. Tama dago homugo te dagego me konemainogo yaibao! Te dago Genuai Bidigo po sela sąnama, tama dago agai bomai po wali pisąwai baso da, teda dagego da te bidibo ula elalu bidimainu me gogolamu dao! 23 Te dago Genuai Bidigo po sela sąnama, tama dago te dena alta digi nigilama, tama te ofa ebo nai ulai digi, te wit ofa ilabo me, te deli homu ilabo ofa me, te sę yaibaso da, teda Genuai Bidi agai digi da dene ilimainogo yao. 24 Tiali goli, meniama, dago te sę isąbaso da, magi baso, te da wi eyu, tiyu te nosali dagego wąį dabego te tiwai po weyu, ‘Te magi baso dagego te God, da Israel dabego Genuai Bidibolo lotu po obawe?’ po waibao. 25 ‘Genuai Bidigo te wę Jordango da dąį tomode muani, tama dage te Ruben me Gat tego hani we bidi dabe, dage te Genuai Bidigo hani meni,’ te po waidalio. Tama tiyu, te dagego wąį dabego te dago wąį dabe paliama, tama augwaligo te Genuai Bidibolo lotu po me wagobeo.”

26 “Tama tibaso, dago te alta nigali. Te ofa yabo nai dabe, me te gasa tobage ofa, te ofa dabe yabo te me egobeo. Menio! 27 Te dago hanide dąį me deli, me te dage hanide dąį tama te dago wąį dabe ola mani, te aga ugwa bede dago lotu te Genuai Bidiba naga weyu, tama dago te ofa ebo nai dabe ulubo da, tama te dwai sę ebo ofa, me te deli homu ebo ofa me, te ofa yaibao. Tiyu nosali dagego wąįgo te dago hanibolo te tiwai po waidalio, ‘Dage te Genuai Bidigo hani menio,’ te po waidalio! 28 Dago te tiwai homu yali, ‘Te tobage posobo po te dabolo me te dago wąį dabebolo wabo side, teda dago te po wainogo, “Suao, te alta dago aya dabego nigali, te dagego alta tobage deli tiwai e elalubao,” omainogo yali. Tama te olo nai dabe me te dwai ofa ebo te tiwai me ebeo. Menio! Te alta da, te dago hani dali, te dage hani dali, te dąį deli naga iliyu hanilama tiwai yali,’ dago te homu yali. 29 Dago te olo nai, te hasa, me te wit, me te dwai sę ilibo ofa te tiwai me ebeo. Dago te tiwai sę ebo hagela yai. Mu menio. Te dago tama tiyu da, te Genuai Bidigo po sela sąnama, tama tudiba muaibao. Dago te Godigo alta te me hasegelegobeo, te dago Genuai Bidi, te alta aga ugwa be te gedude dolalubao.” Te Ruben, Gat, te Manase bage meba me, te hani selago te po wai.

30 Te pris bidi Finias te augwa we bidigo genuai dabe dali, te augwali te Israel hani sibi dabego tobolu bidi dao, augwaligo te Rubengo hani me, te Gatgo hani me, Manasego hani, te augwaligo wabo po odama, tama augwali wiegi yai homu pemene yai. 31 Tialima, Finias, te pris Eleasargo ogwago te Ruben, me Gat, me Manase, te hanibolo te tiwai po wali, “Megi dago koneani, te Genuai Bidi da dali bidibo, magi baso meni, dagego agai po me sela sąbeo. Tama tibaso, Genuai Bidigo da dali wado po me wagobeo,” wali.

32 Nosali Finias, me te tobolu bidi dabe, augwaligo te Ruben, me Gat, me Manase, te hani augwali te Gileat bulude taga peyu, tama augwali te Kenanba ma pelama, tama te wali po dabe te Israel dabebolo pusigi pali. 33 Tama te Israel dabego te augwaligo pusagasali pode te augwali wiegi yai homu pemene yai. Augwaligo te God nogi ugwaba siyu, tama augwaligo te Ruben, me Gat, te augwali dali boi hwįgi pabo homu eyu, te augwali bidali tǫ doligi pabo homu yali, te homu kone munu me ebeo. 34 Tama tialima, te Ruben dabe, me te Gat dabe, te augwaligo te alta nogi poali te “Hania Haninama Pusali,” magi baso meni, augwaligo te po wali, “E altago da tigidalibolo dąį iliyu, hanilama e po oda mabo dao, te Genuai Bidi aga deli naga te God dao,” wai.