3
Israel dabego Genuai Bidi tagalalio
1 Genuai Bidigo te tiwai po wai,
“Te bidigo aga we sela sąbaso, te wego aga
tagalama, te gasa bidiba pali,
teda te polasa sali bidigo te we ma sogobeo.
Te we agai ma siyu da,
teda agai bulu kantri te dwai meda mu eno gedude
pedelaibao.
Israel, nage te bidi hauwa dali penani ela bilama,
tama megi da, te nage enaba ma asainogo, ebawe? * Tede elalubo po tiwai te Jer 2:20 tede me elalubo suao.
2 Nago te ni meni yai bulu du dabeba tonao.
Te bulu du me deli elalu, tama nage teba pelama,
te penani kolesaga ebe da homu eba, agawe?
Nage te sunumi sesegede dugulalu,
te bidi dabe asobo tonaluali,
te Arebia bidi dabe te bulu tǫ wa pai pesage te
sunumi sesegede tonalu,
augwa te sunumi wali asobo bidi dabego nai wi
sainu tama tiali.
Te nago dwai kolesaga dabego,
me te penani ebo kolesagade,
te nago bulu tǫ kantri dwai meda mu yai eno
gedude pedalubao wali.
3 Te pagede naga te eno tulubage paliama,
tama te tulubage nago tǫba tulubeo.
Awe, te gi tau sabo tulubage asobeo.
Tialima, nago te penani wego hagoma ebo tiwai eyu,
te nage dwasianu hale me ebeo.
4 Megi tama nago enaba i weyu, te tiwai po wali,
‘Genuai Bidio, nage eno Aya dao,
te nago ena gesi ogwa wegi elalubadi godolo elama,
tama megi e sogoba usu nani,’ wali.
5 ‘Te nago enaba sesemane haliga sębę
elaluduabo homu igio.
Te nago wado ebo te silao homu ebao.’
Israel, nago tama tiwai po wali, tiali goli, nago te tobage
dwai kolesaga dabe idu,
te nago homude ebo kolesaga
simanigi pabo dao,” wali.
Te Israel dabe me Juda homu hasegeliąo wai
6 Te Josaia king bidali side, Genuai Bidigo enabolo te tiwai po wali, “Nago te enaba homu kęą pabo kolesaga tagalali we Israelgo ebo dwai kolesaga suyu digi eba, agawe? Aga te tigidali bulu duba holama, me te tigidali genuai ni dologoba pelama, te dwai penani kolesaga ebo dao. * 2 Kin 22:1–23:30; 2 Sto 34:1–35:27 7 Eno e tama homu yali, agai te hagoma kolesaga eyu bolo elama, tama enaba ma asaibao. Tiali goli, menio. Aga te ma asobeo. Te aga ama, Juda, te we sabo kolesaga togobo we, agai te Israelgo kolesaga suai. † Te Jeremaia profet bidali sogo, te tǫ kantri Israel te not badu te munu me elalubeo. Te boi bidi dabego polobadu digi dolalio. Te e wali po da, Godigo te we bidi dabeba te po weyu, te polobadu te Israel dabeba pedelali sę te ma homu kone palao po wali, tama ede te tiwai nogi “Israel” wali, te kantri tǫ we bidi dąį ilama, te kantri Judade polobadu bidali te po olama wali. Te Jeremaia buku pedai hauwa badu, te nogi Israel wali, te Jerusalem we bidi dao olama wali, te gasa pedai kantri Juda badu te po wai dao. Augwali hani me te Jekopgo bulai wąį dabe, agai gasa nogi me Israel wai dao. Tama te boi bidi dabego te Israel hani te not badu bidali bage selama, te gasa kantri tǫba kalabus igi pali, te kantri tǫ Juda we bidigo te nogi Israel ma selama, tama augwade digi te nogi wabo dao. Te po wai. 8 Israelgo we bidi dali bidibo tiwai elaluali, te togwali sogo te penani kolesaga hauwa mu ebaso, eno te bidigo we tagalobo pepa asęnama, te eno agaba menama, te aga sela sąwai. Aga ama, Juda da, agai tebo suali, tiali goli, aga wi dwasianu me ebeo. Menio. Tama eno suali, aga me pelama, te penani sę ebo kolesaga ela bilali. 9 Agai te penani kolesaga olo nai da homu eyu, te agai masigi me ni dabeba lotu wali. Tama te kolesagade agai te penani ela bilibo tiwai yalio. Tama agai te tǫ eno gedude meda dwai mu ilali dao. 10 Judago ena tagalama, te dwai kolesaga ela biliyu, tiali te agai haliga munu ma begelama, enaba ma begasa asobeo. Menio. Agai haliga tibo begelainogo ebo tiwai yagasali. Ena Genuai Bidi, eno te po wai dao,” wali.
11 Tama Genuai Bidigo enabolo po ma weyu, te tiwai po wai, “Israel me Juda, augwali si te bidi tagalubo we si tiwai yali. Augwaligo te enaba homu kęą pabo kolesaga tagalai dao. Tiali goli, te Judago yali dwai sę te genuai mu elama, te Israelgo ebo dwai sę aiyaba elaluai dao,” wali. 12 “Tama Jeremaia, nage dolugulama, te not badu bidibo Israel haniba i wao. Nago Genuai Bidi eno po te tiwai pusao,
‘Israel, nage da, te aga bidiba homu kęą pabo kolesaga
tagalobo we da,’ wao,
‘nage enaba begasa ma asao.
Ena Genuai Bidi, eno te po obao,
eno nageba haliga sębę munu ma egobeo.
Magi baso meni, ena te olo mu tau sabo
wiegi yai homu kolesaga ebo God dao,
te eno haliga sębę ebo
te sesemane sogo elalua pidugobeo.
13 Israel, nago te tiwai po dolasa hanilama pusao,
“Eno te dwai sę yai da,” po wao.
“Eno God, nage ena Genuai Bidiba hagoma yali,
te ena tigidali genuai ni dologoba pelama,
te tibo god dali dwai kolesaga yali.
Te eno nago po sela sąwani.”
Israel, ena Genuai Bidigo, eno te po nageba mobao,’ ”
wali.
14 “Ena Genuai Bidi, ena digi eno te po dolo obao. Dage ena tagalali we bidi, dage enaba ma begasa asao, magi baso meni, dage da, dage te eno Kęąni we tiwai elaluyu, tama ena da, te dagego bidi tiwai dao. Te dage deli deli eno te boi bidi dabego hanu taun dabede, te duga hanide selama, te eno dage Saionba ma odasa asaibao, te eno bulu dao. 15 Tama eno wiegi yai tonalubo bidi te ena kolesaga tiwai wali pabo bidi dabe nigilaibao. Augwaligo wiegi yai homude koneani kolesaga elalubao, te augwaligo dage bugagia tonalueibao,” wali. 16 “Te ena Genuai Bidi, eno te po obao. Nosali dage te duga tǫ kantride hauwa mu pedelaibao. Tama te sogo dagego te Genuai Bidi, eno Dąų Wali Bomai Po Munolubo Halobage po me wagobeo. Tama te bokis kontrakde po me wasiąma, tama dagego tede homu hauwa me egobeo. Tama dagego gesi te tobage Halobage me nigigobeo. Menio. 17 Te sogo te we bidi dabego te tiwai po waibao, ‘Jerusalem digi te Genuai Bidigo dugabo sia sai tiwai dao,’ waibao. Te tigidali kantri tǫde bidibo hani we bidi te Jerusalemba asiyu, te enaba genuai nogi magasaibao. Te munu ma augwa te hagoma isiąma, te augwa homude digi ebo dwai kolesaga wali munu me pelamu dao,” wali. 18 “Te sogo te Juda dabe augwali te Israel augwali dali deliba sisinama, te augwa kantri te not badu, te megi bidibo madi tagalaibao. Tama augwali te eno duga wąįba mani tǫba bidagasaibao, te augwa hanigo te tǫ sesemane elalua pidu bidaibao,” wai.
Israel dabego tibo god tagaliąo wali
19 Genuai Bidigo po ma weyu, te po walio,
“Israel, polobadu eno homugo nage ena wai puluba mu
bidiyu,
eno dage dali te ayago ebo kolesaga elama,
tama eno nage wiegi yai tǫ mu me deli mawaibao,
te gasa tigidali hani we bidigo tǫ aiyaba mu elaluali.
Eno te homu yali.
Tama me eno te homu yali, nago enaba Aya nogi yaiba
homu yali.
Tama nago ena sesemane sogo wali asiyu,
tama nago ena munu me
tagalogobeo, te homu yali.
20 Tiali digi, menio.
Dage Israel we bidi hani, dagego ena tagalama,
te wego aga bidi tagalobo tiwai yali.
Ena Genuai Bidi, eno te po wai dao.”
21 Genuai gela te ni meni yai bulu du bagede wali.
Te Israel we bidi dwai gela weyu, Godiba i olama,
te Godigo olo tau mabo wiegi yai
kolesaga augwaliba emainu wali.
Magi baso meni,
augwaligo te Genuai Bidi augwa Godiba homu kone
palobo gegeda palama,
te dwai sunumidu wali pai dao.
22 Genuai Bidigo te po wai, “Dage te hagoma ebo wai
puluba dabe,
dage enaba ma asiąo.
Te eno dagego ena te duga tudiba mubo
kolesaga dodolama,
te dage ena dali bugagia bidimainu yaibao.”
Tama te we bidi dabego po wei ponoyu, te po wai,
“Awe, megi da, da nageba ma asaibao, magi baso meni,
nage God, te dago Genuai Bidi dao.
23 Mu tamao, te bulu du dabede penani sę ela bilibo
kolesagago te da tau sabo usugobeo,” wali.
“Genuai Bidi, dago God, nage deligo naga da Israel ma
sobaso usu mu yaibao,” te po wai dao.
24 “Tiali goli, dago te Balba lotu wali,
te hale ebo god dao,
tama te tebo kolesagade dago tigidali sipsip,
me bulmakau, me wai ogwa dabe, me wegi dabe,
me te tigidali wiegi yai nai
te wąį nǫų dabego sę dene elama sali nai tigidali
odolali sisai dao.
Tama te tibo god Balgo te nai dabe sese dalama tuali.
Dago te kolesaga te da gesi ogwa bidide gagalama yali,
te megi e sogoba usu nagasobao,” te po wali.
25 “God, Genuai Bidi, da me, dena wąį nǫų dabe dali,
dago te nageba dwai sę yai,
te da gesi ogwa bidide digi usu nama,
megi sogoba usu nagasobao.
Dago nago po wali me pisąwai.
Tama tiyu, da dwai hale mu selama,
te gesabidi tǫba mu mugulaibao,” wai.
*3:1: Tede elalubo po tiwai te Jer 2:20 tede me elalubo suao.
*3:6: 2 Kin 22:1–23:30; 2 Sto 34:1–35:27
†3:7: Te Jeremaia profet bidali sogo, te tǫ kantri Israel te not badu te munu me elalubeo. Te boi bidi dabego polobadu digi dolalio. Te e wali po da, Godigo te we bidi dabeba te po weyu, te polobadu te Israel dabeba pedelali sę te ma homu kone palao po wali, tama ede te tiwai nogi “Israel” wali, te kantri tǫ we bidi dąį ilama, te kantri Judade polobadu bidali te po olama wali. Te Jeremaia buku pedai hauwa badu, te nogi Israel wali, te Jerusalem we bidi dao olama wali, te gasa pedai kantri Juda badu te po wai dao. Augwali hani me te Jekopgo bulai wąį dabe, agai gasa nogi me Israel wai dao. Tama te boi bidi dabego te Israel hani te not badu bidali bage selama, te gasa kantri tǫba kalabus igi pali, te kantri tǫ Juda we bidigo te nogi Israel ma selama, tama augwade digi te nogi wabo dao. Te po wai.