1 Tama Mosesgo po geninama pusuyu, te po wali, “Tama nosali da te notba polo badu da pali. Te bulu Basanba pabo sunumidu pali. Tama te tuni bidi Ok aga hani bidi dali asali, te da dali hwįainogo, te hanu Edrei pąde. 2 Tiali goli, Genuai Bidigo enabolo te po wali, ‘Nage te bidide wi me elamuo. Te eno aga, me aga we bidi tigidali, me tǫ dali, sese tama nagebolo mawaibao. Tama nago te Amor dabego tuni bidi Sihon dali yali kolesaga tiwai me aga dali yaibao,’ Genuai Bidigo te po wali.”

3 “Tama tialima, Genuai Bidigo te tuni bidi Ok me aga we bidi sese dago nogoba mubo si, dago tigidali mu ela silai dao. 4 Tama te sogo dago agai hanu dabe sese dago selama, tama deli me tagalai menio. Mu menio. Dago te bulu Argopde dago te 60 hanu mu sese tama sai dao. Te da, te tuni bidi Okgo bulu tiai dao. Ok aga te genuai hanu Basande bidiyu, tama te bulu me hanu tonaluai dao. 5 Tigidali te hanu dabe te masigigo nigai moni obo mu elama, tama bomai sunumi mu nigali, tama augwaligo te sunumi dabe te bomai ain dili dabego dąų waliyu yali dao. Tama te obo meni yai dwasianu bulu dabe hauwa mu elaluali. 6 Dago te tigidali hanu dabe doliyu, me te we bidi me wai dabe dago sese mu ela muna silai dao. Dago te deli kolesaga tiwai naga dago te Sihon te Hesbon hanu tuni bidi dabe dali dago tama tiai dao. 7 Tama dago te kau kibu dabe, me te hanude elaluali nai dabe sese tama sai dao.”

8 “Tama tialima, dago te tuni bidi sigo tǫ dago sai dao, te Amor dabego tuni bidigo tǫ, te Sihon me Ok si. Te tǫ te wę Jordan te giliga asobo badu elalubao. Tama te wę Arnondu gagalama, tama pelama, te bulu du Hermon te sautba sabolama, tama te notba saboligi pali. 9 Tiali goli, te Saidon bidi dabego te Hermon wabo dao, te Amor dabego te Senir wabo dao. 10 Dago te malu bulude elaluali bulu dabe dago sai dao. Tama dago te Gileat tǫ dabe, me Basan tǫ, me te hanu si Saleka me Edrei hanu tǫ me, sese tama dago salio. Te tǫ dabe sese te tuni bidi Okgo tǫ dago sese tama sai dao,” Mosesgo te po wali. 11 (Te tuni bidi Ok aga te Refaim dabe sabi simanobo tuni bidi dao. Aga pubulabo halobage augwaligo te masigigo nigali. Te halobage bobobage te 4 mita, tama genuai te 2 mita tama. Te da, te hanu Raba te bulu Amonde elalubao.)

12 Mosesgo te Israel dabebolo te po wali, “Dago te hanu dabe sela silibo si, eno te Ruben hani me Gat hani dali sibolo tǫ mani, eno te hanu Aroerdu gagalama, te wę Arnon pąba saboligi pelama, te dąį ilali. Tama eno augwalibolo te Gileat bulu du si badu augwalibolo eno mawai dao. Te aga hanu dabe dali sese tama mawai dao. 13 Tama eno te Gileat me te Basan tǫ sese te Manase hani bugai mebabolo mawai dao. Basan te tuni bidi Okgo polobadu tonaluai tǫ badu dao. Te tǫ tigidali te Manase hanibolo mawai dao,” wali. (Te bulu augwaligo Argop dao wabo dao. Polobadu augwaligo te Basanbolo te po wai dao, te Refaim dabego tǫ dao po wai dao. 14 Nosali te Manase hani bidi me Jairgo te bulu Argop sese tama sali. Te tǫ augwaligo te Basan te wabao. Te tǫ dąį te bulu Gesur me Maka bulu si sesegeba te dąį igi palio. Tama aga digi aga nogi te bulu dabe poali. Tama tialima, te bidi dabego te po wabo dao, te bulu dabe te Jairgo bulu dabe dao wabo dao.)

15 Tama Mosesgo po ma wadolama weyu, te po wali, “Eno te Gileat tǫ te Makir dabego somainu sa muai dao. Te Makir dabe te Manase hani bugai meba dao. 16 Tama te Ruben hani, de Gat hanibolo da, eno te tǫ te Gileat tǫdu gagalama, tama Arnon węba tama usu nigi pelama mawai dao. Augwaligo dąį te saut badu gagalama, te wę tomoba saboligi pai dao. Tama augwaligo tǫ dąį te giliga asobo badu pelama, tama te Jabok węba saboligi pali. Tama te wę Jabok te Amon bulu dali dąį elaluali wę dao. 17 Tama te giliga dega sabo badu da, te augwaligo dąį te Jordan węba dąį igi pali. Te dąį te sigi wę Galilidu te not badu gagalama, tama pelama, te sigi wę Detsi te saut badu tama pelama, te bulu du Pisgadu pelama, te sigi wę Detsiba saboligi palio,” wali.

18 “Tama te sogo naga eno te Ruben hani dali, Gat hani dali, te Manase hani dali, augwalibolo te po wali, ‘God dago Genuai Bidigo dagebolo te tǫ te giliga asobo badu te Jordan wę badu dage mani dao, te dage tede bidimainogo. Megi da, dagego bidi dabego te hwįabo nai dabe sao. Tama dagego augwali polasa te Jordan wę nogelama, tama augwali augwa ama Israel dabe nosali ilama, tama pelama, te tǫ somainogo tau sigi pao. 19 Tama dagego we wai dabe augwali te dagebolo eno mani te hanu dabede tagalao, augwali tede tonalumainu yao. Eno koneani, dagego kau kibu hauwa bidibao. Tiali goli, augwali me te hanu dabede bidimainao. 20 Dagego duga ama solo tau sela mao, tama augwali te God dago Genuai Bidigo augwalibolo mawainu yali te Jordan ąį pabo badu te giliga dega sabo badu tǫ sabo si tagalao. Dage augwali dali bidibadi, te Genuai Bidigo augwali te tǫde bugagia bidimainu sula tagalobode tagalao. Te agai dage dali yali sę tiwai tama ebaso. Tama nosali da, teda dage duga eno dagebolo mani tǫba ma piagameo,’ wali.” * Jos 1:12-15

21 “Nosali eno Josuabolo te po wali, ‘Nago polo suali dao, God dago Genuai Bidigo te tuni bidi Ok de Sihon side agai tigidali sę yali. Te agai te tiwai deli kolesaga naga te dagego hwįnama, tama te augwaligo tǫ sainu ebo bage dali tiaibao. 22 Dage augwalide wi me elamuo. Magi baso meni, God dago Genuai Bidigo dage tau selama, tama augwali dali hwįaibao,’ eno te po wali,” Mosesgo te po wai.

23 Te Mosesgo te po wali, “Te sogo eno gedu haluasa po bomo elama, te po wai dao, 24 ‘God, Genuai Bidi, eno koneani, nago enabolo nago genuai yabo sęde te sę dwasianu deli naga me nago enabolo ola manio. Te gasa god dagalude me tǫde me bidibeo, te nago te genuai sę nago polo yali, te sę tiwai yabo. 25 Megi eno homugo nago ena te Jordan ąį nogelama, u badu pomainogo yao. Tama eno te wiegi yai ili yai tǫ me, wiegi yai bulu du me, te Lebanon bulu du me sugi pomainogo yao,’ eno tama po wali.”

26 “Tiali goli, menio. Dagego geda muanigo dagego dolaligo da, Genuai Bidigo ena dali sębę elama, tama olo palialubao. Agai te po wali, ‘Penane pania sao,’ wali. ‘Nago enabolo te nai po ma hanalugio. 27 Nage te Pisga bulu duba pelama, tama te notba me sautba tonoyu, me giliga asobo badu tonoyu, me giliga dega sabo badu tonoyu yao. Nago te buluba dabe bugagia mu tonono bilao. Magi baso meni, nage te ąį Jordan nogelama, te tǫ tomoba nage pogobeo. Mu menio. * Nam 27:12-14; Bom 32:48-52 28 Josua bugagia ola mao, tama agai homu kolesaga bugagia dąų walao. Magi baso meni, aga digi aga te we bidi te wę u badu odasa paibao. Tama augwali nago megi te suabo tǫde bidaibao,’ wali. 29 Tama tialima, da te odogo bulude bidai dao, te hanu Betpeor u badu,” Mosesgo te po wali.