18
Te Devitgo asęani balia po me deli dao. Me sogo Genuai Bidi Godigo te Devit te Sol dali, gasa boi bidi dali augwaligo nogode ma sali sogo, te sogo Devitgo e balia po Genuai Bidibolo wai.
Te Godigo Devit tau sobaso, agai aga boi bidi dabe aiyaba elaluali
1 God, eno nage wei mu ebao.
Nago ena dąų walai.
2 Genuai Bidi agai ena tau sabo da.
Aga te eno bomai obo tiwai da.
Genuai Bidigo ena tonalubaso, tama te boi bidi dabego
ena me dologobeo.
Genuai Bidi te hwįbo sabele tiwai elama,
tama ena geme seselalubo.
Agai te ena ma selama,
tama ena tonaluabo bomo elalubo dao.
3 Dago te Genuai Bidigo nogi ugwaba sao.
Eno agaba gedu haluasa po weyu,
usu da obaso, te agai ena tau selama,
tama te boi bidi dabego dolainu yali usu ebeo.
4 Te pąde ena isainu yai,
tama te bonogo ena bomonama kęnani tiwai yali.
Te dwai sę ebo bidi dabego enaba bomonama hwįani,
tama augwali te genuai tamu ąį sigo
ena mesegelibo tiwai yali.
5 Te pąde ena isainu yali,
te bonogo ena bomonama kęnani tiwai yali.
Te gų pagego ena dalainu tonaluai.
6 Ena haliga sęgę dwai ebaso, tama eno Godiba i wai.
Eno gedu haluasa po te ena Godiba weyu,
te agai ena tau somainu yai.
Aga te aga wiegi yai be mude bidiyu, tama eno po odali.
Te eno gedu haluasa po wabo te agai oloba pedelali.
7 Tialima, megi da, Genuai Bidigo wado po elalubao.
Tama agai te tǫ mali mu ilali.
Tama te bulu du page dabe te mumunu ela silali.
8 Te hano aga gunide pedelali.
Tama aga pedauwalide dabo siago
te doado bage hauwa ulali.
9 Agai te pǫ dabe sela sąnama, tama aga aiyaba dulali.
Tama husugu yai pǫ te aga sągą dologode elaluali.
10 Aga te ensel dabe daide ugwadu dugulasa,
tama bola asai.
Te bogo te ba dabego bogo tiwai elalubao,
tama te God auwąsa polo mu asaibao.
11 Aga digi aga te hulia sigo haluali.
Aga te tulubage umabo mu elalubo
husugu yai pǫ tomoba duala sai.
12 Te pǫde be sele eyu, tama te bogoli mu elama,
te agaba kisa sigi pali.
Tama sia me talua ge tulubagego te husugu pǫ aluama,
tama aiyaba dulai dao.
13 Tama Genuai Bidigo te dagalude bomonama mu
i weyu, te pǫ kulukulu wabo tiwai yali.
Tama te bidi dabego te Ugwade Mu Bidibo Godigo
i wabo odali.
14 Agai te be selego te bidi dabeba ula enani,
te bidigo te boi bidi dabe
te enego enebo tiwai ebaso.
15 Genuai Bidi, nago te dwai sę ebo bidi dabeba
wado ebo sogo,
te bomai waligo augwali degelibo tiwai ebao.
Tama te tamu ąį dologode tigidali tǫ
te bulu ulaba hania pedelali, tama te tǫ page me
te hania pedelalio.
16 Genuai Bidi te dagalude bidiyu,
tama agai nogo te aiyaba muyu, tama ena tola sali.
Ena te aiyanu mu yai węde
te hagawainu ebo bidi tiwai ebadi,
tama Godigo ena ma salio.
17 Agai ena te boi bidi dabego bomai nogode me,
te ena wei isiąbo bidi dabego nogode ma salio.
Te bidi dabe augwaligo bomogo
te eno bomo aiyaba elaluai dao.
18 Polobadu, te dwai sęgo ena gegelama,
tama augwaligo enaba hwįagasali.
Tiali goli tagala, te Godigo ena tonaluali.
19 Agai ena tonalubaso,
tama eno te boi bidi dabe tagalali.
Agai ena wei mu elama,
tama agai ena ma sai dao.
20 Eno te doloba pai kolesaga wali pobaso,
tama Godigo wiegi yai sę enaba bugagia yai.
Eno dwai me deli ebeo,
tama tiyu, Godigo wiegi yai sę enaba mawai dao.
21 Magi baso meni, eno te Genuai
Bidigo bomai po bugagia wali pai.
Eno dwai sę me isiąma, tama ena God tudiba me mubeo.
22 Eno te agai doloba pai bomai po
te sesemane homu kone paliyu,
tama eno agai po tudiba me mabeo.
23 Te magi dwai sę me deli isiąbo te agai koneani,
tama eno te magi nai me delide magi sę me ebeo.
24 Tama tiyu, Godigo te eno doloba pai
kolesagade homu koneama,
tama agai ena bugagia mu tonaluai.
Magi baso meni, agai koneani,
te eno magi sę me isiąwai.
25 Te bidigo nage wali mu asobaso da,
teda nago te nago po dolo wali pelama,
tama nago aga tonalubo dao.
Te bidi dolasa biliyu, tama te magi naide
te magi me deli isiąbaso, nago agade te wiegi yai
homu ebo dao.
26 Te bidi me deligo te meda mu
meni yai kolesaga ebaso da,
teda nago me agaba te wiegi yai kolesaga ola mabo da.
Tiali goli, te bidigo dwai kolesaga wali pobaso da,
teda nago agaba te dwai kolesaga wei ponobo dao.
27 Nago te augwa digi te haliga
aiyaba elalubo we bidi dabe augwali te ma sabo da.
Tiali goli, nago te augwa digi
augwa nogi ugwaba sabo we bidi
te aiyaba elaluaibao.
28 Te enade digi te Genuai Bidigo ula elalubao.
Awe, tama ena Godigo te enade
hulia sai elalubo te sela sąbo dao.
29 Godigo te boi bidi dabe dali
hwįbo bomo te enaba mawai.
Tama agai enabolo te augwaligo
seselalubo nai dabe dolobo
te genuai bomo mawai dao.
30 Te God da, agai kolesaga te wiegi yai mu elama,
tama dolo mu elalubao.
Te Godigo te magi nai me delide po dąų obaso da,
teda agai po te mu po naga wabo waibao.
Te agaba pabo bidi tigidali te agai bugagia tonalu,
tama te boi bidi dabede geme dualalubo da.
31 Genuai Bidi naga te God mu da.
Agaduba deli naga te dago boma pai obo dao.
32 Agai naga ena dąų walama, tama ena bilibo sogode
te bugagia tonalubo dao.
33 Agai ena te bulu uni kibu hasa
bugagia bilimainu ebo tiwai eyu,
tama ena te bulu du dabede bidibo sogo
agai ena tau sabo dao,
tama ena tulalu me ebo meni. * Hab 3:19
34 Agai enabolo te hwįbo ola mawai,
tama eno te bomai kapago nigai enesigi kegebaso,
usu yaibao.
35 Genuai Bidi, nago ena tonaluama,
tama ena ma dobola sabo dao.
Awe, nago dolo nogogo bomogo ena tau sabo dao.
Nago ena tau selama, tama ena te we bidi dabego
gedude genuai nogi elalubao.
36 Nago te eno sunumide tonalubaso,
tama te boi bidi dabego ena pageabi eyu,
te ena me tola sabeo.
Tama eno sągą te me kikila pisąma,
tama ena me tula mubeo.
37 Eno te boi bidi dabe pobelama,
te augwali tola sali.
Tama eno augwali polo me tagala palobeo.
Menio. Eno hwįnama, te augwali aiyaba elaluyu yai.
38 Eno te enego augwali enama,
tama augwali te ma hodaluainu
ebaso, te usu meni yai.
Augwali te isilama, tama te eno sągą pąde pila mubo
tiwai yai dao.
39 Naga digi nago ena te boi bidi dabe
dali hwįbo bomo dąų walai.
Naga digi nago ena tau selama,
tama eno augwali aiyaba elaluai.
40 Nago te boi bidi dabe tudi ola momainu ebaso,
tama enade wi pai.
Te enaba boi bidi yali bidi dabe
te eno augwali ela muani.
41 Te augwali bidi me deli tau somainu te i wali,
tiali goli dego augwali tau saibawe?
Te me deli meni yai.
Augwaligo te Godiba i wali, tiali goli agai augwaligo
te gela wabo me odobeo.
42 Eno augwali mu dolama,
tama augwali te waligo sela holobo tǫ hogomu
tiwai pedelali.
Eno te boi bidi dabe elaluama,
eno te sunumide agabo pu tiwai gagawai dao.
43 Nago ena tau siyu,
tama te hagoma ebo bidi dabego ena dolomainu
me ebeo.
Nago ena te we bidi hani dabego
king pedalumainu ilali.
Te eno konesiąwai we bidi augwali, te augwali aselama,
tama eno sę yagasai.
44 Augwaligo eno po odolama,
tama polo tama augwaligo wali pabo dao.
Te digibulu bulu bidi dabego
kidu sugunagasiyu, gagamu ebo dao.
45 Te augwaligo haliga nagamea pelama,
tama augwali didibili elama,
tama augwa bomai obo tomode bidali tagalama,
tama augwali ena dologoba bidagasobo dao.
46 Genuai Bidi bididubadi gebao.
Agai ena sesemane sogo bugagia seselalubo dao,
te moni dobo dwai masigi tiwaigo ena
mesegalobo dao.
Tama tiyu, eno agai nogi ugwaba sabo da.
God da, te ena tau sabo bidi da.
Tama tiyu, eno agai genuai nogi ugwaba sobao.
47 Agai naga ena tau selama,
tama eno te boi bidi dabe aiyaba elalubo dao.
Tama agai deligo naga te haniani we bidi hani dabe
ena dologoba mubo dao.
48 Genuai Bidi, naga digi ena tau selama,
tama te boi bidi dabego ena me dolobeo.
Mu tama, Genuai Bidi, nago naga
ena te hwįbode tau selama,
tama eno te boi bidi dabe
aiyaba elaluai.
Nago ena tau siyu, tama te hwįbo bidi dabego
ena me ela mubeo.
49 Tama tiyu, te haniani tǫde bidibo
we bidi hani dabe tomode
eno nago nogi ugwaba siyu,
tama eno nago nogi ugwaba sabo balia po waibao.* Rom 15:9
50 Genuai Bidigo ena Devit sa munama,
tama ena te king bidibao.
Tama agai eno te hwįbode
sesemane sogo te boi bidi dabe
aiyaba elalumainu ilali.
Agai ena godolo mu elama, tama te eno wąį nǫų,
te nosali pedalubo bagede me, te tama tiaibao.
Agai te da godolo mu ebo kolesaga munu me siligobeo.