1 E da te Israel dabego pesage nigilama bidali bulu dabe nogi dao. Augwali te Isip bulu taga solama, nosali te Moses de Aron sigo augwali tonaluai dao. 2 Genuai Bidi aga digi obadi, te Mosesgo te pesage nigilama, bida bida bilali bulu nogi asęani. Te bulu dabe nogi e tama dao.

3 Te Israel dabego Isip bulu te namba 15 deide, te namba wan poluade taga soali. Teda te Israel dabego te Godigo augwali bugagia bidimainu sula tagalali, te genuai nai ulali Pasova sogo nosali, Genuai Bidigo augwali tonalubadi, augwali te hanu Rameses tagalama pali. Tama Isip dabego augwali suali. 4 Te sogo te Isip dabe augwa gomunai ogwa dabe pubalobadi yaide. Te Genuai Bidigo augwali ela wialai. Te da, te Genuai Bidigo te tibo god dabego bomo aiyaba elaluama, tama agai bomo te Isip dabe augwalibolo ola mayu yai.

5 Tama Israel dabego te bulu Rameses taga pelama, tama hanu Sukotba solama, pesage nigilama bidali. 6 Tama nosali augwali Sukot taga pelama, bulu Etamba pesage nigigi pali, te nai meni yai wa pai bulu sesegeba augwaligo pesage nigigi pali. 7 Tama augwali te bulu Etam tagalama, tama te bulu Pihahirot te giliga asobo bulu Balsefon sabolama, tama te hanu Mikdol pąde pesage nigilama bidali. 8 Tama augwali te Pihahirot tagalama, tama te tamu wę Retsi nogelama, tama Surgo nai meni yai wa pai bulu sabolali. Tama te masigi kemi sane buludu augwali sela sogo pelama, tama augwali te bulu Maraba sabolama, tama tede pesage nigali. 9 Tama nosali augwali Mara taga pelama, augwali bulu Elimba saboligi pelama, tama augwaligo pesage tede nigali. Elimde te nogo si olama, sągą si ulu ąį elalubo, me te du tubo ni det te 70 tama elalubo.

10 Nosali augwali te bulu Elim taga pelama, te tamu ąį Retsiba sabolama, pesage nigigi pali. 11 Tama augwali Retsi taga pelama, tama augwali te bulu augwaligo te nai meni yai wa pai bulu Sen wabo, te buluba saboligi pali, tama augwaligo pesage nigali. 12 Tama augwali te bulu te nai meni yai wa pai bulu Sen taga pelama, augwali te bulu Dopkaba sabolama, tama pesage nigigi pali. 13 Nosali augwali te Dopka taga pelama, tama augwali bulu Alusba pelama, pesage nigigi pali. 14 Tama augwali Alus taga pelama, tama augwali te bulu Refidimba sabolama, pesage nigigi pali. Te bulu Refidim te tuabo wę meni yai bulu dao.

15-37 Augwaligo te bulu Refidim taga pelama, augwali te bulu dabede pesage nigigi peyu, ela pali: nai meni yai bulu Sainai, me bulu Kibrot, me Hatava, me bulu Haserot, me bulu Ritma, me Rimonperes, me bulu Lipna, me bulu Risa, me bulu Kehelata, me te bulu du Sefer, me bulu Harada, me bulu Makhelot, me bulu Tahat, me bulu Tera, me bulu Mitka, me bulu Hasmona, me bulu Moserot, me bulu Benejakan, me bulu Hor Hagigat, me bulu Jotbata, me bulu Abrona, me te hanu Esiongeber, me te nai meni yai bulu Sen, te gasa nogi wabo Kades. Tama nosali augwali te bulu du Hor te Idom bulu sesegeba sabolama, pesage nigali.

38-39 Augwali tede bidiyu, tama namba 5 poluago namba wan deide, te kibu be bidi sese si bidama Isip bulu taga solama nosali, te pris Aron aga Genuai Bidigo po wali pelama, te bulu du Horba holama, isali. Te aga 123 kibu be bidai dao. * Nam 20:22-28; Bom 10:6

40 Tama te bulu saut badu bulu Arat te Kenan badu tuni bidigo te Israel dabe asobo po odali. * Nam 21:1

41-49 Te Israel dabe augwali te bulu du Hor taga pelama, tama augwali te buluba dabe pali: te bulu Salmona, me te bulu Punan, me te bulu Obot, me te bulu Abarim, te bulu hanu dolai elaluali, te bulu Moapde, me te bulu Dibon Gat, me te bulu Almon Diplataim, me bulu du Abarim te bulu du Nebo pąde, me te bulu Moapgo malu bulu te Jeriko pąde, te Jordan wę u badu. Te hanu Bet Jesimot me te Abel Sitim bulu tomode augwaligo pesage tede nigali.

50 Augwali te Moapgo malu bulu, te Jeriko pąde, te Jordan wę u badu bidibadi, Genuai Bidigo Mosesbolo po meba mani, 51 te Israel we bidibolo pusumainu. Genuai Bidigo e tama po wali, “Dage te wę Jordan nogelama, Kenan bulu tomoba peyu da, 52 teda dagego te bulude bidibo bidi dabe sese sela sąyao. Tama augwali nigali tibo god dabe dolao, te augwali masigi dali ain dali sigo nigali god. Tama augwaligo lotu wabo pesage dabe me dolao. 53 Eno te tǫ dagebolo te mobao, tama dage te tǫ selama, tama dage tede bidiąo. 54 Tama dage satu gagali elama, tama duga hani deli deli wąį, me duga deli kaneme dabebolo dobayabo yali gilama tiao. Tama te tǫ te we bidi geninama elalubo hanibolo genuai tǫ mayu, me te we bidi dwasianu elalubo we bidi hanibolo tǫ dwasianu mayu yao. * Nam 26:54-56 55 Tiali goli, dagego te bulude bidibo bidi dabe sela sąsiąma yali da, teda augwaligo dagebolo dene me sęgę mawaibao, te sesane bonogo gedude me bogo badu enebo tiwai yaibao. Tama augwaligo dage te bidibo bulude dage dali hwįaibao. 56 Dagego augwali sela sąsiąma yali da, teda eno dage dolaibao, te eno augwali dolainu yali homu ebo tiwai gilama,” Genuai Bidigo te po wai.