1 Genuai Bidigo Aronbolo e tama po walali, “Te nage, me Livai dabe, me nago ogwa dabe, dagego eno ugwa bede sę dolo isąma ebaso da, teda duga digi geda muani dao, tama te sęgę duga tolaibao. Tiali goli, ma nage naga ogwa dabe dagego te pris sęde dolali da, teda dage naga te sęgę saibao. 2 Tama naga hani bidi naga sao, te augwali te Livai bidi hanigo bidi dabe sao, naga wąį dabe, tama augwali nage dali sę elama, nage tau saibao, te nage naga ogwa dabe dali eno ugwa bede sę ebo sogo. 3 Augwaligo te nago mabo sę me eyu, me augwa sę me te ugwa bede yao. Tiali goli, augwaligo te Tedali Gasagi Yai Be Habude munalubo nai me, ma te altade elalubo nai dabe, augwaligo nogo me dįąnamu dao. Ma, augwaligo nogo toyu da, teda nage me augwali dali isaibao. 4 Te Livai hani dabe naga eno ugwa be tomode sę emainao. Tiali goli, te bidi dabe eno sa musiąma yali bidi dabe, augwali nage dali sę egobeo. 5 Nage me, nago ogwa dabe dagego naga eno te habu selai be tomode sę eyu, me altade sę eyu, iyąo. Tama tiyu da, eno dage dali sębę elama, dage Israel dabe me ma dologobeo. 6 Odao, ena digi eno nago hani sa muai dao. Te Livai dabe te Israel hani tomode eno dįą selama, tama eno augwali nagebolo me nago ogwa dabe dagebolo mawai dao, te wiegi yai nai tiwai dao. Te bidi dabe augwali eno mu dao, te augwaligo eno ugwa be tomode sę emainogo. 7 Tiali goli, nage dali nago ogwa dabe dagego naga te pris sę eyu, me te altade sę eyu, me te Tedali Gasagi Yai Mu Be Habude sę eyu, tama iyąo. Eno te pris sę dagebolo te wiegi yai nai tiwai tama mawai dao. Tama tialima, te pris sę, me altade sę, me te Tedali Gasagi Yai Mu Be Habude sę, te dagego sę mu dao. Ma, te bidi me aga eno sa musiąwai bidi aga te sę yainogo asobaso da, teda dagego aga ela muiąo,” Genuai Bidigo te po Aronbolo wai.

8 Tama Genuai Bidigo Aronbolo po ma weyu, e tama po wali, “Odao, eno digi eno te hasa mi dage dabe te we bidi iside ulisąma enabolo masiąma yali te nagebolo mobao. Te ofa yali nai mi dage dabe te nagebolo me nago wąį hani dabebolo tigidali sogo mu mabo dao, tama dagego tuiagameo. 9 Te ofa nai dabe te tedali gasagi yai nai mu dao, te eno nai mu dao weyu, tama augwaligo ulisąma yali te dabe dage pris dabego siąo. Te da te wit ulubo ofa, me te sęgę sela sąbo ofa, me te nai dabe wei ponobo te ofa dao. Te we bidi dabego enabolo mabo te nai dabe eno ofa mu dao. Eno te nagebolo me nago ogwa dabe dagebolo mobao. 10 Dagego te hasa dabe te eno ofa mu tiwai suiąo. Tama tialima, dagego te nai dabe te ugwa be obo tomode tuiąo, te bidi dabego naga tumainao,” wali.

11 “Te me ma dagego te gasa ofa te Israel dabego ena mabo te ofa siagameo, te da te pris dabe nogo tulama, eno gedude te hogayu, ugwa eda ebo te ofa dao. Eno te nai nage, naga ogwa wegi dabe dali, te nai eno tigidali sogo te mobao. Te nago we bidi hani tigidali eno gedude wiegi yai mu polo pedalai dao, augwaligo te hasa nai dabe tumainao.”

12 “Te meba gasa Israel dabego te tigidali hasia podolali nai wiegi yai oliv wel, me wain, me wit deli deli kibu bede enabolo mabo dao. Tama eno te nai dabe dagebolo mawaibao. 13 Te hasia tau yali nai dabe te Israel dabego enabolo maiabo nai, te dagego dao. Te tigidali dage hani we bidi eno gedude wiegi yai dao, te augwaligo selama tumainao. 14 Te tigidali nai dabe enaba mani te Israel dabego augwaligo augwa ma abelegobeo, teda dagego mu dao. * Prs 27:28 15 Te Israel dabego gomunai wai dabe, me hasa dabego gomunai wai dabe, augwaligo enabolo ofa sesebo, te me dagego mu dao. Tiali goli, te hasa meba augwali te ofa maiabo wiegi yai nai mu menio, te tobage hasa gomunai wai dabe te ofade sigio. Te page bidigo monego te hasa gomunai wai hasegeleyu, tama te mone nago sao. Te me te Israel dabego augwa gomunai wai augwali monego hasegelama abelemainao. 16 Te Israel dabe augwaligo augwa wai dabe te a naga silva mone gego abelemainao, te waigo polua deli ebo si,” wali.

17 “Tiali goli, augwaligo te hasa dabe eno gedude wiegi yai tedali gasagi yai, augwaligo ma abelebo usu egobeo. Te da te kau kibugo gomunai wai, me sipsip kibugo gomunai wai, me meme kibugo gomunai wai dabe me, te augwaligo ma dobolama abelegobeo. Magi baso meni, te augwali te eno mu dao, tama te ofa yabo nai dabe dao. Dagego augwali ela munama, tama augwaligo kaneme te altaba te ofa tiwai sąyao, tama agai ili te altade ofa tiwai ulao. Tama eno te ofa ulubo nai denami odama, tama eno godolo mu yaibao. 18 Tama te ofa ebo nai mi dabe te dagego dao, te dagego te Israel dabego mabo ofa eno gedude ugwaba edaba te hogayali, te ofa bau me, dolo sągą me mabo ofa tiwai dao, te dagego sabo nai dao. 19 Te Israel dabego enabolo mabo te ofa dabe meba, megi da, eno nage dali naga wai dabe dali tigidali sogo mawaibao. Eno tede te kontrak nage dali, me nago wai hani dali, te kontrak tigidali sogo mu te ebao, tama eno te kontrak toga sągobeo. Mu menio,” wali.

20 Tama Genuai Bidigo Aronbolo e tama po wali, “Dagego te Israel bulu tomode tǫ me selamu dao, te dage isibaso, dagego wai dabe nosali bidabo. Me dagego te Israel tǫde te gasa mone sabo sę me egobeo. Magi baso meni, te dagego habuge yali nai dabe dagego enade siagameo. Ena Genuai Bidide,” tama po wali.

21 Tama Genuai Bidigo po genina ma weyu, e tama po wali, “Te Israel dabego te nai dabe nedama, nogo si wabo nai deli me bogelama, enaba magasobo si da, teda eno te nai deli dabe te Livai dabe mawaibao. Te da, te augwaligo pe tiwai, te sę ebo masigi tiwai sabo dao, te eno ugwa bede sę ebo pe tiwai dao. * Prs 27:30-33; Bom 14:22-29 22 Te tigidali sogo nosali me te Israel dabe eno ugwa be pąba me peyu me elamuo. Ma, augwali pąba pali da, teda augwa dagede augwali elama isilaibao. 23 Te Livai dabe augwaligo naga te ugwa be tonalubo sę eyu, augwaligo te ugwa bede sę eyu emainao. Ma, augwaligo te sę bugagia me isąma yali da, teda augwa te sęgę augwa tolomainao. Te bomai po te me tama elalubadi, nago wąį nosali pedalobo te hanigo me wali pomainao. Te Livai dabe augwali te meba Israel dabego yali gilama, augwali tǫ menio. 24 Magi baso meni, eno te Israel we bidi dabego mabo te nogo si nai me deli bogelama mabo, te nai dabe te Livai dabe augwali mabo dao. Te tama po pagede, eno augwalide te e tama po wali dao, ‘Augwali te Israel tǫ tomode augwaligo tǫ me sogobeo.’ ”

25 Genuai Bidigo Mosesbolo 26 te Livai dabebolo e tama po wao po wali, “Te meba Israel dabego te nogo si nai deli me bogelama, Genuai Bidi mobaso da, tama te nai te Genuai Bidigo dagebolo mawaibao. Tama dagego te nai dabe sabo sogo da, teda dagego te nai dabe bugulama, nogo si nai nigilama, te nai nogo si wali deli bogelama, Genuai Bidi mao, te ofa tiwai mao. 27 Tama dagego te tama mabo ofa te Genuai Bidigo ofa te gesi gi nai ofa, te gesi wit me wain, te bidi dabego agabolo mabo nai te tiwai gilama ebao waibao. 28 Dagego te tama tiyu da, teda dagego te ofa te Genuai Bidibolo mawainu ebo usu yaibao, te Israel dabego hasia nai tau nogo si nai deli selama, dagebolo mabode, te dagego nogo si nai ma nedama, deli me te pris bidi Aronbolo mao. 29 Dagego te sabo nai wiegi yai dabe bugagia bugulama, tama te wiegi yai nai te Genuai Bidigo nai sa muao, tama dagego agabolo mao. 30 Te dagego te wiegi yai nai dabe te Genuai Bidibolo polo menama da, tama da, te Livai dabe dagego te me munalubo nai sagameo. Te bidigo ofa elama, te nai meba nosali sabo tiwai yali gilama tama yao. 31 Te nai dabe da, te dagego te Godigo ugwa be tomode dagego sę ebo pe tiwai dao. Tialima, dage pelama, dage duga we wai puluba dage duga te nai dabe meba elalubo te nai tugi piąo. 32 Dagego te wiegi yai nai dabe hasia ofa bolo elama, tama nosali dagego meba nai dabe tuyu da, teda dage me geda mugobeo. Tiali goli, ma dagego ofa bolo isąma, dagego bolo tuali da, teda dagego te Israel dabego ofade dagego geda muyu, tama dagego duga dagede Genuai Bidigo dage ela isilaibao,” Genuai Bidigo te po wai.