1 Te Jisasgo te nogo si olama, sągą badu peda sigi soabo bidi si te augwali deliba sisinimainu i olama, tama agai augwaliba te genuai bomo me nogi mayu, te augwaligo te we bidi dabede dwai haubo noma bidi sela sąyu, tama augwaligo te tobage gasagi yai gasi dabe tigidali sela sąnama, usu ma ilabo bomo manio. 2 Tama God agai we bidi tonalubo po me, gasi yai we bidi tau siyu me emainu, Jisasgo augwali tagala palali. 3 Agai te bidi dabebolo te po wali, “Dage pelayu, magi nai me sela pigimio. Dono me, nai gonobo wa me, tuabo nai me, mone ge me, te ugwa si me, te tama nai dabe me sela pigimio, bede taga pao. 4 Dage mena buluba pobadi, augwaligo dage dali dwagi yai homu ebaso da, teda dage te bede naga bidao. Te be nani taga soabo bodolude taga soyu, te gasa buluba me peyu yao. 5 Te dage hanu me deliba pobadi yaide, te hanude bidibo we bidi augwaligo beba dage odasa pisąma, tama dagego wabo pode dwagi yai homu isąbaso da, te hanu bulu taga soao. Te dage soai hagede, te augwa kolesaga geda muani koneama sumai hagede, duga sągąde elaluali pu hola sąnama, taga soao,” Jisasgo te po wali. 6 Tama augwaligo Jisas taga pelama, tigidali be nani sisu pebelayu, Godigo dwagi yai po pusuyu, gasi bidi tau siyu ela pali.

7-8 Te Galili tǫ tonalubo tobolu bidi Herotgo te Jisasgo yali sę po dabe odali. Tama aga homu kone tųą pali. Magi baso menio. Bidi mebago te baptais mani bidi Jon ma hodaluama, bidibao, wali. Mebago “Te polobadu bidali profet bidi Elaija ma pedelama, bidibao,” te po wali. Mebago polobadu Godigo po ola mani bidi ma pedelalio wali. Te po hauwa obaso, Herot aga homu kone mu tųą pali. 9 Tama Herotgo te po wali, “Eno pode Jongo holo togwa sąwai goli dao, e ma niwai bidi po eno odobo agawe?” Tibaso, Herot agai ‘Jisas da, te polobadu bidali bidi Jon dawe?’ homu eyu, tama ‘Jisas sueibao’ wai.

10 Jisasgo tagala palali bidi dabe augwali Jisas pageba ma sabolama, te augwaligo yali sę po dabe ma pusagasali. Tama Jisasgo augwali oda selama, pali. Te gasa we bidi dabe bidibadi tagalama, te augwali naga te hanu me deliba pali. Te hanu nogi Betsaida dao. 11 Augwaligo te we bidi dabe taga pali. Umabo we bidigo augwali pali po odama, augwali me nosali pali. Aga pageba augwali sabolobaso, Jisasgo dwagi yai homu elama, God agai we bidi tonalubo po pusa mayu, gasi yali we bidi meba tau sali. 12 Giliga aiyaba osoga sobadi yaide, Jisas aga wali pabo bidi dabe augwali aga pageba aselama, agabolo te po wali, “E bidi meni yai digi dao. E we bidi tagala palama, augwa digi tuabo nai me, piabo be me gegemainao, te dwasianu be nani dabede me, te gi dabede me.” 13 Tiali goli, Jisasgo augwalibolo te po wali, “Tuabo nai duga digi mao.” Augwaligo wei ponoyu, te po wali, “Dago bret a naga badi, sųgų si badi elama naga, munalubao. Moni we bidi dabego tuabo nai dabe dago abelegi pomainu obawe?” (Tama tede bidibo bidi dabe namba nedebo te umabo mu, te 5,000 dao.) 14 Jisasgo aga bidi dabebolo weyu,” Te we bidi dabe dugayao po wao,” po wali. “Bugulama, te haniani nani elama, duga duga pao, te bidi sese si olama nogo si te 50 50 naga nidigi pelama, dugayao wao,” te po wali.

15 Te Jisas aga dali bidibo bagego agai wali po selama, dugaya baso, duga duga pali. 16 Tama Jisasgo te bret a naga badi, sųgų si badi selama, dagaluba tonalu, Godibolo nage usu dao wali. Nage usu da olama, te nai pebedama, Jisas aga dali bidibo bagebolo menama, te bagego ma te we bidi dabebolo doboba pali. Te tibadi yaide, te tubo nai kua pali. Augwaligo te nai tulama, tabiali. 17 Tama Jisas aga wali pali bagego te we bidigo tulama me badu tagalali nai dabe nedama, bonou wa nogo si olama, sągą si peda sigisu pągą yani.

18 Te me sogo Jisas agaduba Godibolo po odubadi yaide, aga wali pali bage aga pageba asali. “We bidi augwaligo ena da de da wabo dawe?” augwalibolo tama hanalu wali. 19 “Mebago nage da te we bidi baptais mani bidi Jon dao wabo dao,” augwaligo te po wali. “Mebago ma nage Elaija dao, te wabo dao. Mebago ma polobadu Godigo po ola mani bidi ma hodaloai bidi dao wabo dao,” augwaligo te po wali. 20 “Dagego homugo ma ena de da wabo dawe?” wali. Pitago te po wei ponoyu, te po wali, “Nage da, Krais da, Godigo da Juda we bidi tau somai hagede tagala palali bidi dao,” Pitago te po wai.

21 Jisas agai augwaligo te po mebolo waidali weyu, bomona hageali, “Te po mesegeleiąo,” wali. 22 Agai te po me wali, “Ena da, Godigo Bidi Mu da. Tama nosali te Juda dabego genuai bidi dabego me, te pris tobolu bidi dabego me, te Juda dabego bomo yai po ola mabo tobolu bidi dabego me, augwaligo ena buluba ela palama, dene genuai mu mawaibao. Augwaligo ena isilama, nosali sela wali sogo ena hodaluaibao,” te po wali.

23 Jisasgo tigidali we bidibolo te po wali, “Te ena wali me niwai bidi asainu da, aga tobade homu konebo gegeda pelama, ena tigide ebo dene tiwai aga bidibo donolama iduabo bidi, ena wali asao. 24 Bidi me aga e tǫde bidibo sogo aga tobade aga tigi sese yaida homu eyu da, te doaibao. Me ma, bidi me ena wali asobadi yaide, aga tǫde bidibo sogo sia sobaso da, nosali bidibo ula selama, ma bidaibao. 25 Bidi mego e tǫde elalubo nai tigidali aga sai goli, aga digi ma dolu ma aga ma aiyaba elalu, te nai dabego aga mena tama tau sabo usu egowe? Te menio. 26 Bidi mego enade hale eyu, eno ola mabo pode hale eyu ebaso da, teda nosali eno te bidide hale yaibao. Nosali Godigo Bidi Mu aga bomo dabe dali, aga ayago bomo dabe, moni ensel dabego bomo dabe dali asobo sogo, te hale yai bidi suyu, ena Godigo Bidi Mu eno me te bidide hale yaibao. 27 Te po koneao. Dage megi e bidalubo bidi dabe me badu isisąbadi, Godigo we bidi tonalubo sę sueibao,” Jisasgo te po wali.

28 Te po olama, Sarere deli bidama, Pita badi, Jon badi, Jems badi, tama bage Jisasgo selama, bulu duba Godibolo po wainu holali. 29 Tama agai Godiba gedu haluasa po obadi yaide, aga megi tama elaluali tigi gesabidi tagalama, gasa tigi yai gesabidi hasegelama, aga ugwa dabe me te gasa tedela yai mu gagalama, te ula umagi mu pedelalio. 30 Te sogo naga polo tama bidi si aga dali po udubo suali, te bidi Moses dali Elaija si dao. Te Moses, polobadu mu te bidibolo God agai te bomo yai po Juda dabebolo mani. Te bidi Elaija aga nosali bidiyu, Godigo agabolo ola mani po agai te Juda bagebolo pusali bidi dao. 31 Te bidi si asali, te Godigo ula dali pedelama, te dagalude elalubo pǫ tedela mu tiwai yali. Te bidi sigo Jisas dali po uduali. Godigo polobadu wali po te dolo wali pomai hagede eyu, Jisas Jerusalemde isabo bodolu maga baso, augwali sigo te po aga dali miduali. 32 Te sogo Pita me, aga abagi si me gedu magane ebaso, godege piai goli, hodaluama, te Jisasde te dagalu pǫ tedela ula tiwai ula Jisasde elalu, te aga dali dolaluali bidi side me te tiwai ula elalubo suali. 33 Tama te bidi sigo Jisas taga pidali weyu, Pitago Jisasbolo te po wali, “Genuai Bidi, da ede tama bidibo da usu dao. Da selago ugwa be sela sęnama, me nage osogo bidabo be sę eyu, me Moses osogo bidabo be sę eyu, me Elaija osogo bidabo be sę eyu yaibao,” te po wali. (Pita noma siyu, agai wali po page kuna konesiąma tama wali.)

34 Pita agai po odubadi yaide, pǫ pedalama, pǫ tiwaigo augwali mesaga sali. Tama te pǫgo augwali mesaga sagasobadi yaide, te Jisas dali bilali bage wi yali. 35 Te pǫ tomode po me dagayu te po wali, “E eno Ogwa dao. Agai eno sę emainu sa muani Ogwa dao. Dagego agai wabo po odao.” 36 Te po togwa sobadi yaide, Jisas agaduba bidibo suali. Te pedelali sę dabe augwaligo osogo hogwa selama, tama tiali po te we bidibolo dwasianu me pusube.

37 Te sogo do te Jisas aga wali bilibo bidi dabe dali te bulu bubia bidu aiyaba dulubadi, te we bidi umabo te Jisas tiąba asali. 38 Te we bidi tomode bidi me deligo moni hai i olama, te po wali, “Po ola mabo bidi, eno nagebolo hanalube dao, e suao. Eno ogwa deli digi tama dao. 39 Dwai noma bidigo tuai digi, moni hai olama, nogo sągą didigi ebo dao. Te aga kele dawede pesą dini pągąna pabo dao, kelelaude. Tama tiduama, bomonama, dene ilama, taga pabo da. 40 Naga wali bilibo bidi dabe augwaligo te dwai haubo noma bidi sela sąmainu eno hanalu wali goli, augwaligo usu selama, usu meni baso, tagalai,” te po wali.

41 Jisasgo wei ponoyu, te po wali, “Magi baso dagego homu enaba begi pisąma, gagega pidubawe? Ena dage dali nisu naga sogo bidigowe? Nisu naga sogo dagego sęgę eno tologowe?” wali. Tama te ogwa aga ayabolo te po wali, “Nago ogwa eba sesao.” 42 Te ogwa Jisas pageba asobadi yaide, te dwai haubo noma bidigo elama, tǫba degasa pelama, aga nogo sągą didigi yali. Tama Jisasgo te dwai haubo noma bidibolo hagebo po weyu, te haubo bidi sela sąyu, te ogwa ma sana palama, aga ayabolo ma mani. 43 Godigo moni bomo sulama, tigidali we bidi noma mu sali.

Te we bidi Jisasgo te yali sę tigidali sulama, noma sali homu me elalubadi yaide, agai aga wali bilibo bidi dabebolo te po wali, 44 “Megi eno dagebolo wabo po munu me kegeda pigimio. Augwaligo te ena Godigo Bidi Mu e tǫde bidigo bomoba mawaibao.” Te po page mena tama waliwe augwaligo konebe. 45 Te po page augwaligo koneidali weyu, Godigo dualali. Tama te po page Jisasbolo ma hanalu wabo augwali wi yali.

46 “Da tomode de genuai mu dawe?” te po olama, Jisas wali bilibo bidi augwa hasi konila yali. 47 Augwaligo te konila ebo homu Jisasgo koneama, dolo po mu oba homu emai hagede, wai bǫų me deli oda selama, aga panogo badu dualali. 48 Augwalibolo agai te po wali, “Bidi mego enade homu kone palu te ena tobade e wai bǫų tiwai dali bugai homu eyu, tau sali da, te agai enade bugai homu eyu, tau siyu tebao. Bidi mego ena asobadi, bugai homu eyu tau sobaso da, teda ena tagala palali bidi dali bugai homu eyu tebao. Magi baso meni, bidi me aga digi nogi elaluama, te dage tigidali tomode aga nogi dwasianu mu elalubo bidi yai baso da, te aga polalubo bidi mu bidaibao,” Jisasgo te po wali.

49 Te bidi Jongo po dagalama weyu, “Genuai Bidi,” te po wali. “Bidi mego Jisas nago nogide dwai noma haubo bidi dabe sela sąsą bilibo dago sulama, te bidiba dago hagebo po wai dao. Aga nage wali pabo bidi meni baso, dago aga habu seliyu, hageai dao,” wali. 50 Tiali goli, Jisasgo te po wali, “Dagego te tobage bidi hagegi biligimio. Gasa bidi agai dageba boi bidi ebo sę isąbaso da, te duga abagi hani bidi dao,” wali.

51 Te Godigo Jisas dagaluba odasa holabo magabadi yaide, Jisasgo koneama, aga te Jerusalemba pabo homu mu elama, pabo gagalali. 52 Magi magi nai dabe sisi ela mumainu, po wagi pabo bidi dabe tagala palali. Augwali te Samaria dabego be naniba sabolama, tama augwaligo agai nai me doado bage dodolama, sisi ilainu yalio. 53 Tiali goli, Samaria bagego aga Jerusalemba soabo po odama, tama augwali te Jerusalem bage dali boi bidi homu ebaso, augwaligo agade bugagia gesabo homu ebe. 54 Tama Jisas aga wali bilibo bidi si Jems de Jon dali sigo te Samaria bagego te tama tebo kolesaga ebo sulama, augwali sigo Jisasbolo hanalu te po wali, “Genuai Bidi, nago homugo dago dagalu badu isi i olama, te bage isigo domai hagede yaiwe?” 55 Tama Jisas tudiba begelama, augwali siba wado po weyu, hageali. 56 Tama tiyu, aga augwali dali gasa be naniba pali.

57 Te augwa tų sisu pebelabadi yaide, bidi mego Jisasbolo te po wali, “Nage pabo digi, ena me nage wali paibao.” 58 Jisasgo te po agabolo wali, “Te uni yowi dabe da, augwali pibo dedage te tǫde elalubao, tama te ba dabe da, te augwali me pibo be elalubo dao. Tiali goli Godigo Bidi Mu da, te aga tobolu munama piabo digi te bulu pesage menio,” wali.

59 Agai gasa bidibolo te po wali, “Ena wali asao.” Tiali goli te bidigo te po wali, “Genuai Bidi, hasia bolo eno aya isibo tonaluaibao. Isibaso da, pubulaibao. Nosali ena nage wali asaibao.” 60 Tama Jisasgo wei ponoyu, te po wali, “Te Godigo po odisąbo isai bidi tiwai bidi dabe augwa digi te isai bidi dabe pubalomainao. Nage pelama, Godigo we bidi tonalubo po pupusu biligi pao,” te po wai.

61 Bidi mego agabolo te po wali, “Genuai Bidi, ena nage wali pai hagede digi, te hasia bolo ena pelama, ena ida aya dede dabebolo te augwali tobaligi pabo po wagi pabo usu egowe,” wali. 62 Jisasgo agabolo te po wali, “Bidigo eno sę gagalama, te sę ebadi tagalo baso da, te Godigo we bidi tonalubo pesagede te bidigo sę ebo usu egobeo,” wali.