28
Dago dwagi yai kolesaga dali, homu kolesaga si menade gegaibawe?
1 Te Jopgo po ma weyu, te po wali,
“Te bidi dabego tǫ aiyanu mu dogobo dao,
te silva dali, gol dali si sainu tibo dao.
Tama augwaligo te gol dali,
silva dali si ulabo madi geselebo dao,
te dwai pobelebage sela sąnama,
dwagi yai mu emainu.
2 Tama me ma, augwaligo
te ain sainogo tǫ dedage aiyanu mu dogobo dao.
Tama augwaligo tama masigi me
diganama, kapa mu sainu ulubo dao, siade.
3 Augwaligo tǫ dedage tomoba mu dogobo dao,
te ain dabe elalubo masigi dabe sainu tibo dao.
Augwaligo lam sole domanama,
te tǫ tomoba dogobo dao.
Tama te lamgo te tǫ dedagede ula ilama,
tama augwaligo te masigi dabe bugagia suyu,
tama augwaligo sabo dao.
4 Augwaligo te tǫ dogobo te digibulu
mu tama dogogi pabo dao,
te gasa bidi dabe me pisąma ebo digi.
Tama augwa naga bidiyu, sę ebo dao.
Augwaligo bono gebelama, tedu walawala dulubo dao,
te tǫ dedageba, te sę yainu.
5 Te bidi meba tǫ daide sę elama, nai dabe bulubo dao.
Tiali goli, te tǫ dedage tomode sę ebo bidi dabe da,
augwaligo masigi dabe haluama,
tǫ dabe begela tagalama ebo dao.
Tama tǫ dologo te isigo ula tiwai emainu ebo dao.
6 Te bidi dabe augwaligo te sawi yai masigi nogi sapaia
te tǫde masigi dabede sisi yai masigi sabo dao.
Te gol kapa elalubo masigi me augwaligo
te tǫde sabo dao.
7 Te ba kemodage dabego te bidigo
nigali tǫ dedage tomoba subo meni.
8 Te bulu yowi laion dali, me badu bomai hasa dabe,
augwali te bobobage tǫ dedage
te bidigo dogali tǫde bilibo meni,” wali.
9 “Augwaligo te bomai masigi bulu diganama,
te moni bulu du pageba pabo dao.
10 Tama augwaligo te masigi bulude
dedage nidigi pabo dao.
Tama augwali tomoba pabo sogo da,
augwaligo haniani dwagi yai
masigi dabe te tǫ tomode subo dao.
Bidi dabego te masigi abelebo
genuai monego abelabo masigi dabe
te tǫ tomode elalubo dao.
11 Tama te sę ebo bidi dabego sę ebadi yaide,
te dwasianu ulu wę subaso da,
te węgo te tǫ dedagede pągąidali weyu,
augwaligo wę palibo dao.
Tama augwaligo tǫde dualaluai nai dabe sabo dao,
tama buluba pepeli diliba sela asobo dao,” wali.
12 “Tiali goli, da menaba mu pelama,
te dwagi yai homu kolesaga dabe sigi pogowe?
Te dwagi yai homu kolesagago bulu menade elalubowe?
13 Te dwagi yai homu kolesaga, te da nai mu,
tama tego mone dabe edelai dao.
Tiali goli, we bidi augwaligo te kuna konebeo.
Tama te dwagi yai kolesaga da,
te tǫde we bidide me elalubeo.
14 Tama te tamu wę dali,
te bulu aiyanu yai digi agai e tama wali,
‘Te dwagi yai homu kolesaga ede me elalubeo,’ po wali.
15 Dago dwagi yai homu kolesaga abelainu te gol dali,
silva masigi si skel ebo usu me egobe.
Tagalao. Hobede mu dwali.
Dago te nai abelebo usu egobeo.
16 Awe, mu tama, dago wiegi yai
gol masigi Ofir bulude selama, abelabo da usu egobe.
Me te genuai mone sabo masigigo me,
dago dwagi yai kolesaga dali
homu kolesaga si abelegobeo.
17 Ma, dago homugo dwagi yai homu kolesaga abelainu,
tama dago te dwagi yai glas tiwai masigi dali,
te genuai monego abelebo gol masigigo
nigai au dobage nai me elalubaso,
te me usu egobe.
18 Te dwagi yai homu kolesagago
te tamu wę sanide au nai dabe me edelali.
Me te dilai tedela yai dila pai masigi
nogi jaspago ula edelali.
Te bidi dabego moni mone sąnama,
te tamu węde au yai beli tiwai nai abelebo dao.
Tiali goli, te beli tiwai nai abelebo moni tiwaigo
te dwagi yai homu kolesaga abelebo usu egobeo.
19 Dwagi yai sęwa yai masigi bulu nogi
Sudande sabo masigi topas,
me masigi gol isi ulama dwagi yai me,
te dwagi yai nai sigo me
te dwagi yai homu kolesaga abelebo usu egobeo.
Magi baso meni,
te homu kolesaga abelebo mone
te ugwanu mu dao,” wali.
20 “Teda, dago te dwagi yai
homu kolesaga menade mu gegaibawe?
Dwagi yai homu kolesagago bulu menade
mu elalubowe?
21 Te dwagi yai homu kolesaga aga
bulude geme mu dualalubo.
Tama te we bidigo me, te me badu
bidibo nai dabego me, munu me sugobeo.
Te ba dabe me dagalude bola bilibo.
Tiali goli, augwaligo me subo usu egobeo.
22 Isai bidigo bulude me e tama po walio,
‘Eno me eno ologo naga te dwagi yai
homu kolesaga po olo odali. Tiali goli, eno sube.’ ”
23 “Megi da, odao.
God agaduba deli naga te dwagi yai homu kolesaga
elalubo bulu koneanio.
Tama agaduba naga teba pabo sunumi koneanio.
24 Magi baso meni. Agai tǫ tigidali mu sulama,
tigidali dagalu dologode elalubo nai
tigidali sula silibo dao.
25 Polobadu mu Godigo dąį ilama dobolama,
tama waligo bomo me dąį ilama,
tama tamu wę elaluabo pesage me dąį ilai dao.
26 Tama God agai te tulubage
me te sisi pǫ elaluyu wali bilabo po dąų walai dao.
27 Tama Godigo te sę dabe ebo sogo,
agai te dwagi yai homu kolesaga suai dao.
Tama tigidali kolesaga sulama, agai osola suai dao.
Tama agai dwagi yai homu kolesaga dabe
bugagia elalumainu dąų walama,
augwali usu ilai dao.
28 Tama God da tǫde we bidibolo e tama wai dao,
‘Bidi ena Genuai Bidide wi eyu, ena dologode bidibo bidi,
agai te dwagi yai homu kolesaga
page konebo gagalai dao.
Tama dwai kolesaga tudiba mubo bidi,
te bidi da, dwagi yai homu kolesaga elalubo dao,’
Godigo te po wai,” * Tib 111:10; Prs 1:7; 9:10
Jopgo te po wali.