20
Jeremaiago bomai po te pris Pasurba mawai
1 Jeremaiago te po pusali sogo, pris me deligo odai. Te pris nogi, te Pasur. Pasur aga te Imergo ogwa, tama aga te Genuai Bidigo be tonalubo bidi hanide te polalubo ofisa bidi dao. 2 Tama Pasurgo po obaso, te augwaligo keloago te Jeremaia elama, te augwaligo aga te Genuai Bidigo be obo sunumi pąde aga kalabus ilali, augwa te nogi poali, te Benjamingo Sunumi Ugwaba Dao wali. 3 Te do kigamu Pasurgo te Jeremaia kalabusiba muani tagala palobo si, te Jeremaiago agabolo te tiwai po wali, “Genuai Bidigo nage nogi Pasur wagobeo. Menio. Agai nago nogi te tiwai nogi yaibao, te Tigidali Badu Bidi Wi Ilibo Nai Dao, waibao. 4 Tama Genuai Bidigo nage dali te tiwai po elalueibao, ‘Te eno dwai sę nageba pedalumainogo ilama, tama nage dali, te naga abagi dabe dali, te wi dwai mu yaibao. Te nago naga abagi dabe te boi bidi dabe aselama, elagasobo sueibao. Te eno Juda dabe tigidali te Babilon kingo nogoba mueibao. Te agai meba ela muyu, te meba sela pelama, te Babilonba kalabus igi paibao. 5 Tama eno te boi bidi dabego te taunde tigidali mone somainogo ilaibao, te we bidi dabego wiegi wiegi yai tigidali doado bage, me te Juda king dabego mone doado bage saibao. Te boi bidi dabego hwįbo bomo elama, te tigidali nai gigilama, te Babilonba selasa paibao. 6 Tama Pasur, odao. Nage dali, naga bede bidibo hani me, dage te Babilonba kalabus igi paibao. Nago te tibo profet po te naga abagi dabebolo pusubao, te nage me, nage te abagi dabe dali, te Babilonde isaibao. Tama augwaligo dage te tǫ kantride pubulaibao.’ ” Te po wali.
Jeremaia haliga sęgę ebaso, te Genuai Bidiba hanilibo po wai
7 Genuai Bidio, nago ena homu bega siyu,
te nago sę emainogo yali,
tama eno nago te homu bega sabo po odali.
Nago bomo mu ebaso, te eno nago po
aiyaba elaluabo usu meni yai.
Tama megi da, te tigidali we bidigo enabolo posobo po
weyu,
te augwaligo ena sesemane sogo gisugu mabo dao.
8 Tigidali sogo eno nago po pusubaso,
nago enabolo te genuai po dagą weyu, te tiwai i
omainogo yaibao,
“Hwįbo pedelaibao. Dage dolaibao.”
Te bidi dabego te po odolama,
te augwaligo ena hale ilibo dwai po sesemane sogo
udubo dao.
9 Te ena digi eno te nageba homu kone me egobe weyu,
tama eno nago nogide po me pusugobe obaso da,
teda eno koneani, te nago po te genuai isi tiwai
eno haligade elalu, te eno dili dogwai tomode te isi
bogoli edubo tiwai ebao.
Eno nago po paliabo sę ebadi goli,
tiali te eno usu meni ebo dao.
10 Eno odali, te bidi hauwa augwa hasi pomu po dua
digi mia siyu, te tiwai po obao,
“Jeremaia aga te po wabo bidi,
‘Te bidi dabe wi ilibo sę eyu,
te tigidali badu bidaibao.’
Tegoba, dago aga po tų ilaibao.
Te megi tama po tų ilinao,” augwaligo te po wabo.
Te eno hai namu tigidaligo homu te dwai sę enaba
pedelama,
te ena aiyaba elalumainao homu ebao.
Tama augwa te tiwai po wali,
“Te dago aga gaga munama,
te dago aga aiyaba elaluama,
te agai yali dwai kolesaga wei ponaibao,” te po wai.
11 Tialima, Genuai Bidi, nage te bomai ami bidi me
deli tiwai elalu,
te nago ena tialu tau sainu elalubao.
Tama te bidi dabego enaba dwai sę pedalumainogo yali,
te dwai sęgo augwa aiyaba ma elaluama,
te augwaligo ena aiyaba elalueinogo ebaso,
usu me egobeo. Mu menio.
Te augwa dwai hale mu eyu,
tama augwa te hale te tigidali sogo elaludubadi,
te me siligobeo.
12 Te Tigidali Bomo Elalubo Genuai Bidi,
nago te doloba pai we bidi bidi dabe osola subo
dao,
tama nago te dago homu dali homu kolesaga
dagalobo dao,
te nago po tų dolasa ebo elalubao.
Tialima, eno te sęgę nago nogoba mubao,
tama nago te we bidi dabeba dwai dene mayu
dolobo sę eno sueibao homu ebo dao.
13 Te Genuai Bidiba balia po weyu,
agai nogi ugwaba saibao.
Magi baso meni, agai te walu doado bage meni yai bidi
dabe tau siyu,
tama te dwai sę ebo bidi dabego aga aiyaba me
elalugobeo.
14 Te ena idago ena ame nani sogo,
te sogode eno megi dwai homu mu ebao.
Eno homu te wiegi yai sę me deli te sogo pedalobeo,
te dwai bubuga me deli dao. * Jop 3:1-19
15 Te side bidi me deligo eno ayabolo po selasa pelama,
agabolo te tiwai po waligi pai,
“Nago wego ogwa ame nanio.”
Ayago odama, aga wiegi yai homu pemene mu yalio.
Tialima, eno ayaba po sela pali bidiba te Godigo
dwai sę emainao homu ebao.
16 Eno homugo te bidi dolomaina homu yali,
te Genuai Bidigo te taun dabe dolali tiwai gilama
emainogo yai.
Genuai Bidigo te taun dabeba te olo mu tau mabo wiegi
yai kolesaga me elamu da homu yalio. Menio.
Te kigamu mu te we bidi dabego te boi bidi sulama,
te augwali dwai gela mu wali.
Tama te giliga tomo yagasobode,
te boi bidi dabe te taun tomoba aselama,
te i bomonama weyu, hwįnao wali.
Eno homugo te bidi te yali deli kolesagago
dolomainogo homu yali.
17 Magi baso meni, agai ena te idago haligade ela
mubeo.
Te agai te tama tigi sogo da,
teda idago haliga te eno gų page tiwai pedaligi da,
te idago haliga me elalu digi dao.
18 Magi baso ena te idago haliga tagalaligo te tobage
dwai sę me sęgę enade elalu,
te sesemane sogo ena hale ebo sę idubo dawe?
Ena Jeremaia eno te homu ebao.