1 Te sogo te Israel dabego king bidi meni yai, te we sai Livai bidi me deli te Efraimgo bulu bagede bidai. Tama agai gasa we me deli te Betlehem bulu te Juda tǫde sai, te aga dali bidainu sali. 2 Tiali goli, te we te aga bidi dali bugagia bidisiąyu, penani ebo kolesaga yai. Tama te we te aga ayago bulu te Betlehemba wi ma pali. Tama aga ayago bede bidibadi, te polua me si me si bidai. 3 Tama nosali aga bidi hogodama, tama aga wali pelama, te aga dali po dodoligi pelama, te aga ma odasa asainu pali. Agai te aga sę ebo bidi me deli selama, te donki si me aga dali pali. Nosali te wego te bidi sulama, te aga selama, te aga ayago beba pali. Tama we aga ayago te bidi sulama, tama wiegi yai homu pemene mu yai. 4 Tialima te we aga ayago bomo eyu, te bidi aga dali bidao wali. Tama tibaso, aga sela sogo bidai, tama augwali nai tuyu, me wę tuyu yalio.

5 Tama te ene nanobo sogo me si me si tede te augwali si te kigamu mu hogodama, te augwa si painu doado bage sisi yali. Tiali goli, te we aga ayago te Livai bidiba weyu, te po wali, “Te nage nai tulama, haliga dąų waliyu bolo yao,” wai. “Nosali te naga pagameo,” wali. 6 Tama tibaso, augwali si dugulama, tama wę me nai me tuyu yai. Tama we aga ayago agabolo te po wali, “Eno homugo nage ede ma bidimainu elama, te da wiegi yai homu pemene emainao.” 7 Te bidi hogodama painu yali, tiali goli te wego ayago te aga bidimainu bomo mu yali. Tama tibaso, aga te deli sogo hulide aga dali bidai. 8 Te a naga sogo wabode te bidi te kigamu digi mu hogodama painu yali. Tiali goli, te we aga ayago te po wai, “Ae, te nage nai bolo tuyu bidi bolo yao,” wali. “Te giliga dwasianu kekeyu kedau ebo sogo da, teda naga pagameo,” wali. Tama tibaso, te bidi si dali nai ma tuali.

9 Tama te bidi aga we dali, te aga sę ebo bidi te augwali painogo sisi ebaso, te we aga ayago te po wali, “Suao, te giliga dega sigulainu ebao, tama dwasianu sogo tama be hulia sainu yali. Te wiegi yai mu tama te dage te sogo hulide bidiyu, te wiegi yai homu pemene yao. Do da, te kigamu mu, te duga hogodama, te duga buluba ma piagameo,” wali. 10-11 Tiali goli, te Livai bidi aga te gasa sogo hulide ma bidibo te aga hagela homu yali. Tialima, aga dali aga we me te augwa si hogodama palio. Augwa si te donki daide duabo nai sadel te donki side elaluali te donki tudide ąuasa pali. Te giliga dega sigulai madi augwali te Jebusba sabolali, te Jerusalem bulugo gasa nogi me dao. Tama te sę ebo bidigo te aga mama monubolo te tiwai po wali, “Te da te hanu Jebus tomoba pelama, tama hulide tede pinao,” wali.

12-13 Tiali goli aga mama monugo te po wai, “Menio, da te Israel hani ąǫ isiąwai bagego hanude me bidigobeo. Te da dwasianu ma pelama gana te Gibeade ma Rama tede piaibao,” wali. 14 Tama tiyu, augwaligo te Jebus hanu edelama, tama augwali palio. Tama be mu hulia sigilubode te augwali te bulu Gibeaba sabolali, te Benjamingo tǫ pedai badu dao. 15 Augwaligo te genuai sunumi tagalama, tama augwali te hanu tomoba pelama, te piabo pesage gegegi pali. Tama augwali te bidi dabe sisinama po mibo pesageba duadalalugi pali. Tiali goli, te bidi me deligo augwali te aga beba me odasa pabeo.

16 Augwali tede duadalaludubadi, tama monu dabe bidi me deli asali. Te aga gide sę yali silama, tama aga ma asali. Te bidi te Efraimgo te bage bulude bidai bidi, tiali goli aga aselama, te Gibea buluba bidagasali. Tama te Gibeade te Benjamingo hani bage bidaluai. 17 Te monu dabe bidigo te Livai bidi dali, te aga sę ebo bidi me, aga we dali, te bidi dabe po mibo pesagede dudulalubo suali. Tama agai augwaliba hanalu wali, “Dage menadu asaliwe? Tama dage menaba sobawe?”

18 Tama te Livai bidigo te po wali, “Da te Betlehem, te Juda buludu asali, tama da te eno bulu te Efraimgo bage bulu tomode elalubo buluba sobao. Tiali goli, te bidi me deligo da te aga beba me odasa pabeo. 19 Tagalao. Dago te dena nai dabe tigidali elalubao. Te donki sigo tuabo nai me elalubo, te eno bret me wain dali me, te eno sę ebo bidigo doado bage me elalubao,” wali.

20 Te monu dabe bidigo te po wali, “Te wiegi yai dao. Te dage eno beba asiąo! Te eno tigidali nai dabego te dage mayu gesaibao. Tiali goli, dage te po mibo pesagede te hulide me bidigobeo,” te po wai. 21 Tialima, agai augwali te aga beba odasa pelama, tama agai te donki si me nai mani. Agai te wę augwaliba menama, tama augwali sągą wę tedelama, tama nosali augwali nai me wę me tuali.

22 Te augwali wiegi yai homu pemene elama bidibadi, tama te hanude dwai kolesaga ebo bidi meba aselama, te be bagua sagaselama, tama te be sunumiba bebego wabo sę iduali. Tama augwaligo te monu dabe bidiba po waliyu, te po wali, “Te nago bede nage dali bidibo bidi, te aga buluba dinao. Te dago aga penani yaio,” wali.

23 Tiali goli, te monu dabe bidi buluba teda solama, tama augwalibolo walali, “Menio. Te eno ama dedeo, dagego te tiwai kolesaga me elamuo. Te e bidi eno beba asobaso, te eno aga tonalubao. Dagego te dwai kolesaga me elalumu dao. 24 Odiąo! Te eno gesi wegi ogwa we, me te e bede bidibo bidigo we me bidibao. Te eno augwali si odasa aselama, tama dagego augwali si penani yagameo. Tama duga te godolo ebo sę te duga homugo yagameo. Tiali goli, dagego te bidiba te hale ilibo kolesaga me elamu dao.” Monu dabego te po wai.

25 Tiali goli, te bidi dabego agai po me odisiąwai. Tama tibaso, te Livai bidigo te aga we selama, tama augwaliba mani. Tama augwaligo aga selama, tama aga tąnama, te agaba haniani dwai kolesaga idubadi te be mu posa palio. Tama nosali augwaligo aga tede bididubadi taga pali. 26 Tama te we asama, tama te monu dabe bidigo be sunumiba degagasali. Te aga bidi te bede bidai. Tama we te sunumide pila mudubadi te giliga pedelali.

27 Tialima, te kigamu te aga bidi hogodama, tama sunumi dalama, tama painu yai. Te agai sunumi dabadi, te sogo te aga we tede pila mubo suai, aga nogo si te sunumiba muainu yali, tiali goli usu meni yai. 28 Tialima te Livai bidigo te po wali, “Te hodaluama, da pinao,” wali. Tiali goli wego te po wei me ponobeo. Tama tibaso, agai te donki tudiba te we aunama, tama aga buluba palio.

29 Te aga buluba sabolama, te aga be tomoba pelama, tama hwą ge me deli sali. Tama aga te isai wego tigi tologali, te nogo si olama, sągągo si pedai pedelali. Tama agai te pedai deli deli te Israel hani te nogo si olama, sągągo si haniba todolo palio. 30 Tigidali bidigo te wego tigi pedai sulama, te po wai, “Dago te tobage tiwai sę te polobadu me subeo. Te da Israel dabego wąį dabego te Isip taga soyu asela bidali te e sogo megiba usu nagasali, te tiwai kolesaga me pedalubeo. Dagego mena tiwai homu ebawe? Te dago magi yaibawe?” augwaligo te po wai.