11
Gesi noma tuni bidigo bugagia bidabo page dodolaibao
1 Te Jesigo hani te ni bidi dabego gelai ni tane
tiwai bididuali.
Tiali goli, gesi age te ni tanede ma
Awe, te ni tanedu te gesi ni tigi holama,
tama nologo me deligo du walaibao. * Ped 5:5; 22:16
2 Te Genuai Bidigo Spirit Mobo Bidi
aga dali bidagaselama,
tama aga te wiegi yai homu kolesaga dabe
magasaibao.
Tama agai aga we bidi tonalubo homu
kolesaga wiegi yai mu saibao.
Tama aga bomai tuni bidi bidiyu,
tama agai aga we bidi tonalubo kolesaga wiegi yai
mu elaluaibao.
Agai te Genuai Bidigo homu kolesaga koneaibao.
Tigidali sogo aga te Genuai Bidi dologode naga bidaibao.
3 Tama te kolesagago aga wiegi yai
homu ilibo geninaibao.
Tama agai te po tų odobode da,
agai te bidi dabego po wabode naga
o gedugo suali pode naga osola suyu
egobeo. Menio.
4 Te po tų odobo dolo naga agai
te nai meni yai bidi dabego
homu sęgę elalubo po odama, te bagenu tau saibao.
Te gasa bidi dabego augwali aiyaba
elaluama, augwali dolama,
dwai sę yali dabede agai pode
te tiabo sę yali we bidi dabe dene saibao.
Tama te dwai sę ebo bidi dabe da isaibao. * 2 Te 2:8
5 Te tama doloba pai kolesagago
tama aga we bidi tonaluaibao.
Aga bomo elama bidiyu, aga sę bugagia yaibao. * Ef 6:14
6 Te bulu yowi de sipsip kibu gǫų si
aga bugagia deliba bilaibao.
Tama te lepat moni hasa dabe
te meme kibu gǫų dali piyu yaibao.
Te kau kibu gǫų dabe,
me te laion yowi gǫų dabe dali,
deli hodobo nai tudu bilaibao.
Tama dwasianu wai dabego augwali tonaluaibao.
7 Te kibu bulmakau de te bulu hasa bea
aga si nai deliba tuaibao.
Tama augwa wai dabe augwa hasi deliba piaibao.
Tama te laion dabego te bulmakau kibugo nosai tubo
tiwai yaibao.
8 Te wai bǫų dwasianu ame tubo dabe
augwali te dwai gula manego
tǫ dedage pąde gagali yaibao.
Awe, te waigo aga nogo te bidi gąų kelebo hasamanigo
pibo madiba muaibao,
tiali goli te hasamanigo aga gąų kelegobeo.
9 Te Genuai Bidigo bulu du ugwadu
te tigidali nai dabe augwa hasi
bugagia deliba bidaibao.
Te mego me dali dwai sę me egobeo. Magi baso meni.
Te tigidali tǫde nai dabe sesego
Genuai Bidi mu konea pela silaibao.
Te kolesaga te tigidali tǫ mu usu nigi paibao,
te tamu ąįgo aga dąįba usu nani tiwai yaibao.* Ais 65:25; Hab 2:14
Genuai Bidigo aga we bidi ma sisinaibao
10 Tama te sogo Genuai Bidigo gesi tuni bidi me sa muaibao, te Jesigo hani bidi me deli dao. Agai te tigidali we bidi deliba ma sisinabo dąį tiwai bidaibao. Augwali te tigidali tǫ pedai kantri tedu augwali agaba asaibao, te Israel hani isąwai bage. Tama agai hanu da, genuai nogi mu elaluaibao. * Rom 15:12
11 Tama te sogo Genuai Bidi agai bomo te si wabo sogo ma ola mayu, tama aga we bidi hani augwa buluba ma odasa asaibao. Te we bidi dabe te bulu Asiria, me Isip, me Sudan, me Elam, me Babilon, me Hamat, me te Mediterenian tamu ąįde ailande bidibo dabe me dao.
12 Te Genuai Bidigo dąį me deli dodolaibao
te tigidali tǫ pedai kantri we bidigo sumainogo.
Tama agai te Israel me Juda we bidi dabe ma sisinaibao,
te boi bidi dabe kalabus elama
odasa pali we bidi dabe.
Megi augwali tigidali tǫde bida bida pabo.
Tiali goli, Genuai Bidigo augwali ma odasa asaibao.
13 Te bulu Israelgo te bulu Juda dali
dwai homu me egobeo.
Tama Juda dabego Israel dabe dali
boi bidi homu me egobeo. Menio.
14 Augwali si talua selama,
tama augwaligo te giliga pabo badu
buluba hwįgi peyu,
te Filistia dabe dali hwį yaibao.
Tama me, augwali sigo te giliga
asobo badu we bidi dabego
nai dabe hwįgi pelama, augwaligo nai dabe saibao.
Te augwali sigo te bulu Idom we bidi, me Moap,
me Amon we bidi dabe
augwali sigo elaluaibao.
Tama augwali sigo te bulu dabe tonaluaibao.
15-16 Genuai Bidigo tamu wę Retsi
sula somainu yaibao.
Tama agai bomai posolai wali pedalomainu yaibao.
Tama te waligo te wę Yufretis
sula selama, dwasianu emainu yaibao.
Te wę te a naga olama, me badu nogo si
wę gamiadu pomainu yaibao.
Tama tibaso, we bidigo te wę nogebo usu yaibao.
Tama tiali, te sogo te sunumi genuai bage mu yaibao,
te we bidi dabe te Asiria tagalama, asela yabo.
Te yaide te Genuai Bidigo te Israel dabe Isip tagalama,
asomainu sunumi genuai yali tiwai yaibao.* Ped 16:12
*11:1: Jesi te king Devitgo aya dao, te po te buku 1Samuel, Dąį 16:10-13, tede elalubo suao. Te nide gesi ni hogodo pedalubo tiwai yaibao, agai te dąį ilali po te gesi king te Devitgo hanide pedelabo po olama, wai dao.