Te Israel dabe augwa yali dwai sę tagalama, tama augwali Genuai Bidiba ma asaibao
14
(Dąį 14)
Hoseago Israel dabeba te po weyu, augwali te Genuai Bidiba ma asiąo wai
1 Te Israel dabe, dage te Godiba ma asiąo, te duga
Genuai Bidi dao,
magi baso meni, te duga dwai sęgęgo
dage tulalumainu yali dao.
2 Dage te Genuai Bidiba ma aselama,
tama te gedu haluasa po dagego
Godiba te ofa tiwai iyagameo.
Dagego gedu haluasa po e tiwai wagameo,
“God, nago dago sęgę tigidali sela sąyu,
tama dago gedu haluasa po wabo odao.
Tama dago te bulmakau elama,
tama nageba ofa ebo usu egobeo. Menio.
Te dago te dena polobadu dąų walali po wali gilama,
te dwagi yai kolesaga naga yaibao.
3 Te Asiria dabego da ma dobola sogobeo, usu egobeo,
tama te hwįbo hos dabego me da tau me sogobeo.
Te usu egobeo.
Dago te tibo god nigali,
te dago te tiwai po augwaliba ma weyu,
‘Dage te dago god da,’ me wagobeo.
Genuai Bidi, nago dabolo te homu dene eyu,
tau sabo wiegi yai kolesaga ebo dao,
magi baso meni,
da te aya meni yai wai puluba bidibao,
te tau sabo usu meni yai bidibo dao.”
Dagego tama gedu haluasa po agabolo wao.
Genuai Bidigo te po weyu, te Israel dabe bugagia dugulalu bidaibao wai
4 Genuai Bidigo te po wai,
“Tialima, ena te tagalali we bidi dabe eno
ma dobola saibao.
Te eno haligago augwali godolo mu eyu,
te eno augwaliba wado yabo homu begelama,
munu me egobeo.
5 Te eno Israel dabeba wiegi yai sę ilaibao,
te tulubage segeni te wa pai tǫba tulama,
te telabo tiwai yaibao.
Te augwali te gasa wiegi yai sawi yai
plauwa tiwai pedaliyu,
tama te tǫ kantri Lebanonde
te genuai bomai ni dabe tiwai pedaliyu yaibao.
Te ni dabe sele te tǫ aya tomoba mu dulali
tiwai ebo dao.
6 Te augwali wiegi yai mu te gesi ni yabe
pedalubo tiwai eyu,
te oliv ni wiegi yai pedalubo tiwai yaibao.
Tama te we bidigo augwalide wiegi yai
homu pemene eyu,
te augwaligo te Lebanon wiegi yai ni
sida dabe te wiegi yai denami ebo tiwai yaibao.
7 Te augwali ena dali ma bidagasobaso,
te eno augwali tonaluaibao.
Tama augwa gide te nai umabo hauwa
walama, elalueibao.
Te augwa wai hauwa ame naibao,
te gide wiegi yai ni wain augwa
nai wai ge hauwa walobo tiwai yaibao.
Tama augwa te genuai nogi elalu,
te Lebanonde polalubo wain tiwai gilama elalueibao.
8 Tama te sogo te Israel dabego te tibo
godiba lotu munu me wagobeo.
Te enaduba deligo naga augwaligo
gedu haluasa po wabo odaibao.
Te eno augwali bugagia tonalu,
tama augwali te ena dologode bidiyu,
te bidi te genuai ni wuli dologo
tiwąi madi te giliga nanu posolo ebaso
bidibo tiwai yaibao.
Ena digi ena te tigidali wiegi yai nai
augwaligo sabo page bidi dao,”
God Genuai Bidigo te po wai.
Po silagasu wabo po
9 Te wiegi yai homu kolesaga elalubo bidi dabe,
augwaligo te e bukude elalubo po konea sao.
Tama eno homugo te augwaligo homu kone palama,
tama te po wali pomainao.
Te Genuai Bidigo kolesaga te dolo naga elalubao,
tama te doloba pai bidi dabego
te kolesaga wali peyu bidaibao.
Tiali goli, te dwai sę ebo bidi dabe,
te augwaligo Genuai Bidigo kolesaga wali pogobeo.
Tama tiyu, augwali tulalubo dao.